Ìfẹ́kúfẹ̀ẹ́ Ayé

À ń bẹ̀rẹ̀ ìrìn àjò yí nípasẹ̀ dída t'ọwọ́ wa sílẹ̀. Bíbélì sọ fún wa wípé, gẹ́gẹ́bí ọmọlẹ́yìn Kristi, àwọn tí a ti fi ẹ̀jẹ̀ Jésù rà, tí a ti fi Ẹ̀mí náà kún inú wọn, wípé a kò gbúdọ̀ fẹ́ràn àwọn afẹ́ ayé yìí. Mo mọ̀ wípé èyí yàtọ̀ gedegbe sí púpọ̀ nínú àwọn ẹ̀kọ́ tí à ń gbọ́ lónìí, àmọ́ a gbọ́dọ̀ mọ̀ wípé, gẹ́gẹ́bí ọmọlẹ́yìn Kristi, a ní láti ṣé ara wa, kí a gbé àgbélébùú wa, kí a sì máa tẹle Jésù.

Àpọ́sítélì Pọ́ọ̀lù sọ fún wa ní Róòmù 12 wípé a kò gbọ́dọ̀ da ara wa pọ̀ mọ́ ayé yìí. Kàkà bẹ́ẹ̀, ńṣe ni kí a para dà, kí ọkàn wa di titun, kí á lè mòye ohun tí ó jẹ́ ìfẹ́ Ọlọrun, tí ó dára, tí ó yẹ, tí ó sì pé. Ọ̀rọ̀ yí, ìsọdọ̀tun, jẹyọ látinú ọ̀rọ̀ Gíríìkì, anakainosis, èyí tó túmọ̀ sí ṣíṣe àtúnṣe. Tí a bá ma wòó báyìí, ó túmọ̀ sí wípé a gbọ́dọ̀ da gbogbo ọ̀nà tí a ń gbà ronú, hùwà, gbé ìgbésí ayé wa ní àtijọ́ nù, kí a wá bẹ̀rẹ̀ sí ní rọ́pò ǹkan wọ̀nyí pẹ̀lú àwọn ǹkan ti Ọlọ́run.

Nínú Jòhánù Kínní 2:15-20, ó kì wá nílọ̀ nípa àwọn tó wonkoko mọ́ ayé yìí, ǹkan tí èyí ma dá sílẹ̀, àti ìtumọ̀ ìkìlọ̀ náà. Ó ní tí ẹnikẹ́ni bá nífẹ̀ẹ́ ayé yìí, ìfẹ́ Baba kò sí nínú rẹ̀. Ó tún sọ̀rọ̀ nípa ìmúlẹ̀mófo ayé yìí àti àwọn afẹ́ inú rẹ̀. Àmọ́ àwọn tó bá ńṣe ìfẹ́ Ọlọ́run yóò wà títí láé.

Bí a ti ń bẹ̀rẹ̀ ètò ọlọ́jọ́ mọ́kànlélógún yìí, a gbọ́dọ̀ tiraka láti já ara gbà kúrò lọ́wọ́ ìfẹ́kúfẹ̀ẹ́ ayé yìí. A kò lè sin ọ̀gá méjì – a gbọ́dọ̀ yàn láàárín Ọlọ́run àti ayé yìí. Lọ́gán tí a bá yan Ọlọ́run, a gbọ́dọ̀ yàgò fún àwọn ìfẹ́kúfẹ̀ẹ́ tó sì lè fara ṣoko sínú ọkàn wa.