Ìmọ̀ Tara Ẹni Nìkan

Bí a ṣe lè pa ohun tí ó ti wọ́pọ̀ nínú ayé òde òní tì ni a máa gbé yẹ̀ wò lónìí.

Ohun tí à n ṣe, nínú ìjọ àti ní gbangba, gbọ́dọ̀ jẹ́ láì sí èmí ìlépa ara tàbí ogo asán. Yálà a wà ní ibi iṣẹ́, tàbí ní ilé ìwé, tàbí pẹ̀lú àwọn ọ̀rẹ́, tàbí ará ilé, nínú ọjà, tàbí níbi tí a ti n ṣe ìṣẹ́ olórí, èròngbà wa ṣe kókó.

Ìbéèrè tí ó yẹ kí a máa bi ara wa kọ́ ni pé, “Kíni ó dára jù fún mi?” Dípò bẹ́ẹ̀, ó yẹ kí a máa bi ara wa léèrè, “Kíni ó dára jù fún Ìjọba Ọlọ́run?” Ìfojúsùn wa gbọ́dọ̀ jẹ́ bí a ṣe lè wá ọ̀nà tí ó dára jù lọ láti ṣe ìfẹ́ pípé Ọlọ́run.

Nínú Fílíppì 2:3-4, ó sọ wí pé kí a má ṣe fi ìlépa ara tàbí ògo asán ṣe ohunkóhun. Ohunkóhun túnmọ̀ sí ohunkóhun. Báwo ni ayé wa ì bá ti yàtọ̀ tó, nígbà tí a bá n ṣe ohun gbogbo fún rere Ìjọba Ọlọ́run dípò ara wa?

1 Kọrinti 10:24 ṣ'àlàyé ìlànà yìí síwájú síi nígbà tí o sọ pé kí ẹnikẹ́ni má ṣe ronú nípa ara rẹ̀ nìkan; ṣùgbọ́n kí olúkúlùkù máa wá rere ọmọnìkejì rẹ̀. Báwo ni ìjọ ì bá ti yàtọ̀ sí, tí oníkálukú bá n ṣiṣẹ́ pẹ̀lú rere àwọn ẹlòmíràn l'ọ́kàn? Báwo ni ayé ì bá ti rí, tí kò bá sí ẹnikẹ́ni tí ó n ṣiṣẹ́ pẹ̀lú ìlépa ara ṣùgbọ́n fún rere àwọn ẹlòmíràn?

Nígbà míràn, tí a bá n gbèrò láti ṣe ohunkóhun fún àwọn ẹlòmíràn, tàbí fún Olúwa, ẹ jẹ́ kí a béèrè wí pé kí Ó fi hàn wá tí èròngbà wa bá jẹ́ tí ìmọ̀ ara tẹni.