Atombohy eto | Dingana voalohany miaraka amin'i JesoaSantionany

Marka 1 | Araho aho

Faly miarahaba anao, tongasoa eto amin'ny Fanombohana. Raha toa ka vao manomboka ianao - na angamba miverina - miaraka amin’i Jesoa, na raha mahaliana anao fotsiny ny momba ny finoana, dia tsy diso toerana ianao.

Ka aiza no hanombohantsika azy? Eny, ho an’ireo mpianatra, nanomboka tamin’ny voambolana roa avy amin’i Jesoa izany rehetra izany: “Manaraha Ahy”. Ary dia avy dia niova ny diany rehetra.

Ka izay no hanombohantsika azy koa: ny fanarahana an'i Jesoa. Tsotra ny planinay. Hamaky boky roa ao amin’ny Baiboly isika. Hatombontsika amin'ny famakiana ny tantaran’i Jesoa ao amin’ny Filazantsaran’i Marka izany; avy eo, hiresaka momba ny tantarantsika ao amin’ny bokin’ny Kolosiana isika. Ho hitantsika ao amin’ny Marka ny dikan’ny fanarahana an’i Jesoa tamin’izany fotoana izany, ary ao amin’ny Kolosiana no hahitantsika indray ny dikan’ny fananarahana Azy ankehitriny.

Ny famakiana Baiboly no manan-danja indrindra amin'ity planina ity, fa ho eto ihany aho nefa hiaraka aminao ary hanazava izany miandalana eny. Tsara kokoa tsinona ny dia rehefa manana namana. Manasà namana, ary hahafantatra an’i Jesoa ianao rehefa hifankahalala eny ianareo! Afaka vakianao irery, dia avy eo, miditra anaty vondrona ianao, isan'andro na isan-kerinandro, hiresahana izany. Na mety ihany koa raha izaho sy ianao irery ihany.

Eny àry, andao isika hanomboka. Anio, Marka toko 1, eo amin'ny andininy 1 no anombohantsika azy:

“Manomboka eto ny Vaovao Mahafaly momba an'i Jesoa Kristy Zanak'Andriamanitra.”

Fanokafana tokoa anie izany. Voalohany, tsara ny vaovao eto, izaho dia tena tia vaovao mahafaly. Momba an’i Jesoa, ilay Mesia izany. Ny Mesia dia midika hoe “ilay voahosotra” - toy ny ao amin’ ilay iray, izay nofidin’Andriamanitra. Ary Jesoa dia ilay Zanak’Andriamanitra.

Ny andininy faha-2 dia manomboka amin’ny faminaniana iray natao taonjato maro talohan’izay: 

"Indro alefako hialoha Anao ny irako, hoy Andriamanitra, mba hanomana ny làlanao.”

Lehilahy iray atao hoe Jaona ny irak’Andriamanitra, nirahina hitory sy hanomana ny fo ho an’i Jesoa izy. Ahoana ary no nanomanany azy? Voalaza ao amin'ny andininy faha-4 fa nitory ny “batisa fibebahana ho famelan-keloka” izy. Fanalahidy ny fibebahana. Manova ny sainao sy manova ny làlanao ny fibebahana. Maneke hoe: “Tsy nety ny nataoko”, dia mialà amin’izany mba hanaraka làlana vaovao. Eny, dia tonga avy tany amin’ny tany maro ny olona mba hihaino an’i Jaona, hibebaka, ary hatao batisa.

Io no fanalahidy. Dingana voalohany amin’ny fanarahana an’i Jesoa ny miova làlana. Ekeo ireo ratsy nataonao, ialao izany, ary miverena amin’i Jesoa. Nanao batisa tamin’ny rano i Jaona ho mariky ny fibebahana, nefa nilaza tamin’izy ireo koa izy fa ho avy i Jesoa ary “Izy hanao batisa anareo amin’ny Fanahy Masina.”

Aorian'izany, eo amin'ny andininy faha-9 dia tonga avy any Nazareta i Jesoa, nataon'i Jaona batisa Izy. Hafa anefa ny batisan’i Jesoa. Nidina teo amboniny tahaka ny voromailala ny Fanahy, ary milaza ny andininy faha-11: 

“Ary nisy feo avy tany an-danitra nanao hoe: "Ianao no Zanako, Ilay Malalako; Ianao no sitrako.’”

Be dia be ny zavatra azo jerena eto, fa tiako hovakianao mangina any anatinao ity. Izany no fomba fiasan'ity. Hifantoka amin'ny votoantiny aho, dia vakio ny antsipiriany. Andininy faha-14: 

“Ary naiditra am-ponja i Jaona. Taorian'izay, dia nankany Galilea i Jesoa, nanao antso ny Vaovao Mahafaly avy amin'Andriamanitra ka nilaza hoe: 'Tonga ny fotoanandro’; ‘efa akaiky ny fanjakan’Andriamanitra, ialao ny toetra ratsy ary minoa ny Vaovao Mahafaly’”

Tonga nitondra hafatra i Jesoa: Efa akaiky ny Fanjakan’Andriamanitra, izay toerana hanjakan’Andriamanitra. Eo an-tànana izany, afaka tratrarina. Dia nanasa ny olona hibebaka izy mba hiala amin'ny fahotany sy hino ny vaovao mahafaly.

Fa raha akaiky ilay Fanjakana, ahoana no nahatratraran’izy ireo azy? Andininy faha-16:

“Ary nandalo teo amoron'ny farihin'i Galilea i Jesoa ka nahita an'i Simôna sy i Andrea mirahalahy; nanipy harato tao anaty farihy izy roa lahy fa mpanarato no raharahany. Dia hoy Jesoa taminy: ‘Andao hiaraka amiko fa ataoko mpanarato olona ianareo.’"

Raiso ary. Fa ny fanalahidin’ny Fanjakan’Andriamanitra dia teny roa: araho Jesoa. 

Andininy faha-18:

“Dia nilaozany avy hatrany ny haratony, ka lasa izy roa lahy niaraka tamin'i Jesoa.”

Marihina fa tsy maintsy nandao zavatra izy ireo mba anarahana azy. Nanohy ny diany i Jesoa ary nahita an’i Jakoba sy Jaona (tsy mitovy amin’i Jaona), ary nandao izay nananany koa izy ireo ka nanaraka an’i Jesoa.

Mieritreritra aho indraindray raha efa fantatry ny mpianany fa hiova ny fiainany, na, fa hiova izao tontolontsika izao. Tsy haiko aloha hoe hatraiza no fahazoan’izy ireo tamin'izany fa dia natoky an’i Jesosy izy ireo ka nanao ny dingana voalohany.

Andao àry hiaraka amin'izy ireo. Vakio Marka 1. Jereo ny fahefan’i Jesoa rehefa namoaka demonia Izy. Ho tsapanao ny fangorahany rehefa manasitrana ny marary Izy. Henoy ny fahendreny rehefa mampianatra izy. Ary rehefa mamaky ianao, dia fantaro fa i Jesoa dia tsy manasa antsika hino fotsiny ny zava-misy akory na hisaintsaina filozofia. Tsy manasa antsika hiditra amina andrim-panjakana ihany koa Izy. Fa manasa antsika hiara-dia aminy Izy. Manasa antsika hanaraka Azy.

Ho dinihina sy atao hifanakalozan-kevitra:

• Araka ny hevitrao, inona no tian’i Jesoa lazaina amin’ny hoe: “Manaraha Ahy”? Inona no maha samy hafa azy amin’ny hoe “mihainoa ahy” na “minoa ahy”?
• Iza amin’ireo teny ireo araka ny hevitrao no mamaritra tsara ny dikan’ny hoe Kristiana: fivavahana, finoana, filozofia, fitsipika, fifandraisana? Nahoana?
• Ahoana no nahafantaranao an'i Jesoa? Zarao ny tantaranao.