Atombohy eto | Dingana voalohany miaraka amin'i JesoaSantionany

Marka 14-15 | Ny hazo fijaliana

Tongasoa indray ry namako. Androany dia tonga eo amin'ny Marka toko faha-14 izay kihon-dalana lehibe eo amin'ny tantaran'izao tontolo izao isika. Mbola nitombo hatrany ireo vahoaka tonga tao Jerosalema satria efa manakaiky ny andro firavoravoana. Misy teti-dratsy omakomanin'ireo mpanora-dalana mba hamonoana an'i Jesoa. Ary satria tena efa mafy be ny fanenjehana nahazo Azy dia nentin'i Jesoa tany amin'ny efitrano ambony ireo mpianany.

Teo am-piandrasana ny fety ny mpianatra no nolazain'i Jesoa fa ny iray amin'izy ireo no hamadika Azy. Mandratra ny fo tokoa ny famadihan'ny olona akaiky ary tena fantatr'i Jesoa tokoa izany. Amin'izao fotoana izao dia miara-mipetraka amin'i Jesoa toy ireny sakaiza ireny i Jodasy. Ary ao amin'ny andininy faha-22, 

"Jesosy nandray mofo; dia novakiny ka niteny tamin'ny mpianany hoe, "Raiso, ity no tenako." Dia nandray kapoaka Izy, Ity no rako amin’ny fanekena, izay alatsaka hamonjy ny maro.”

Fandraisana ny fanasan'ny Tompo no fiantsoantsika azy io. Manaja izany ny Kristiana rehetra maneran-tany ka dia mandray ny mofo izay mariky ny tenan'i Jesoa natolotra teo amin'ny hazo fijaliana, sy ny divay izay hahatsiarovana ny rà latsak'i Jesoa. Fanekena vaovao no napetrak'i Jesoa izay fihavanana vaovao eo amin'Andriamanitra sy ny olombeloma amin'ny alalan'ny ràny. Mifono hevitra sy dikany lehibe izy eto, fa raha amin'izao fotoana izao aloha, dia efa ampy hahatsiarovantsika an'i Jesoa izy io.

Nandeha ny alina. Niala teo Jodasy niaraka tamin'ny teti-dratsy tao am-pony. Namarana ny sakafony izy ireo, nivavaka i Jesoa, ary notarihiny ho any amin'ny sahan'ny Getsemane izay teo akaiky teo ihany ny mpianany avy eo. 

Misasakalina izao, nefa ny diavolana manazava ny haizina. Nentin'i Jesoa nitokana ny mpianatra itelo ary nozarainy izay tao am-pony, 

“Fadiranovana loatra ny fanahiko toy ny efa ho faty”

Nangataka azy ireo hivavaka Izy, ary avy eo dia nitokana irery niankohoka sy nivavaka tamin'ny Ray ka nangataka Azy hoe “esory amiko ity kapoaka ity”. 

Niverina izy ka nahita ny mpianatra natory. Nofohaziny ny mpianany, ary nangataka Izy ny mba hanohizan'izy ireo hivavaka hatrany. Niverina indray Izy. Ary mbola natory ihany izy ireo. Fa efa tonga nefa ny fotoana, ary indro i Jodasy arahan'ireo miaramila maro be. Tanteraka ny famadihana. Nosamborina i Jesoa ary nentiny teo anatrehan'ny mpisorona lehibe.

Zoma ny andro, kely sisa dia hiposaka indray ny masoandro. Mijoro eo alohan'i Kaiafa mpisoronabe i Jesoa. Andininy faha-56: 

“Fa maro no niampanga lainga Azy, nefa tsy nifanaraka ny fiampangany.”

Nifanesisesy ny fiampangana, fa teo amin'ny andininy faha-61, 

"Fa tsy niteny Jesosy sady tsy namaly akory. Dia nanontany Azy indray ny mpisoronabe ka nanao taminy hoe: Hianao va no Kristy, Zanaky ny Isaorana? Ary hoy Jesosy: Izaho no Izy"

Ary noho izay antony izay, noho izany ihany, dia nampangain'ny mpisoronobe ho niteny ratsy Izy noho ny filazany ny maha Izy Azy.

Koa dia nofatoran'ny lohan'ny mpisorona i Jesoa ary nentiny teo amin'ilay governora Romana, Pontio Pilato. Marka 15, andininy faha-2:

"Ary Pilato nanontany Azy hoe: 'Ianao va no Mpanjakan'ny Jiosy'.

'Voalazanao,' hoy Jesoa."

Ary mbola nanampy fampiangana maro hafa ihany koa ny lohan'ny mpisorona, fa tsy nety namaly i Jesoa. Tamin'ny fanontaniana rehetra napetraka taminy, dia ilay fanontaniana hoe Iza Izy ihany no navaliny. Io ihany no tena zava-dehibe. 

Nitombo hatrany ny fampiangana izay azon'i Jesoa. Ary Pilato tsy te-hanameloka Azy satria tsy hitany izay ratsy nataony. Fa nandrahona hitarika fikomiana kosa ireo lohan'ny mpisorona. Eo amin'ny andininy faha-12, 

"Ka inona ary no hataoko amin’ilay ataonareo hoe: Mpanjakan’ny Jiosy?..." 

"Homboy amin’ny hazofijaliana Izy!"

"Fa inona moa no ratsy nataony?..."

Nefa vao mainka niantsoantso izy ka nanao hoe: Homboy amin’ny hazofijaliana Izy!"

Dia nanome alalana i Pilato. Nokapohina mafy i Jesoa, ary nentiny ho any an-dapa mbamin'ny miaramila iray manontolo. Noesoiny tamina satroboninahitra tsilo voarary Izy, lamba volomparasy, ary avy eo dia nodarohina sy nokapohina. Nasehon’i Jesosy mazava tsara hoe iza Izy, ary mazava tsara koa ny hevitr’ireo mpiambina momba izany. 

Rehefa tapitra ny fihomehezany an'i Jesoa dia nentiny teny amin'ny Golgota Izy avy eo. Eo amin'ny andininy faha-24:

"...Ary rehefa voahombony tamin’ny hazo fijaliana Izy, dia nanaovany loka ny fizara ny fitafiany, hahitany izay ho azony avy. Ary tamin’ny ora fahatelo no nanomboany Azy tamin’ny hazofijaliana."

Ny fanomboana eo amin'ny hazo fijaliana no didim-pitsarana faran'ny ratsy sy falam-baraka faran-taminy amin'ny olona. Sazy tena mahatsiravina, ary tian’ny Romana ho fantatry ny olona rehetra tsara hoe nahoana ny olona tsirairay no nohomboana tamin’ny hazo fijaliana. Koa dia napetrany ny soratra izay nilaza ny "nanamelohana" Azy. Ny soratra teo dia hoe: “Mpanjakan'ny Jiosy.”

Naharitra adiny telo ny fangirifiriana lehibe. Ary teo amin'ny andininy faha-33:

“Ary nony tamin’ny ora fahenina, dia tonga maizina ny tany rehetra, ka naharitra hatramin’ny ora fahasivy izany.”

Andao hianoka tanteraka ao anatin'ilay tantara, ao anatin'ny maizina tanteraka izao isika. Henoy tsara ireo fanesoana isan-karazany, ny feon'ireo vehivavy mitomany, ary ny fijorojoroan'ireo miaramila. Dia indro eo alohanao misy lehilahy nohombohona eo amin'ny hazo fijaliana, ary ny soratra eo ambony lohany dia mivaky hoe "Mpanjakan'ny Jiosy”

Iza io lehilahy io? 

Ary rehefa mijoro eo ianao ary manontany tena, dia hoy ny andininy faha-37: 

“Ary Jesosy niantso tamin'ny feo mahery, dia afaka ny ainy. Ary ny efitra lamba tao amin'ny tempoly dia triatra nizara roa hatrany ambony ka hatrany ambany. Ary ny kapiteny izay nijanona tandrifiny, raha nahita fa afaka toy izany ny ainy, dia nanao hoe: Marina tokoa fa Zanak'Andriamanitra io Lehilahy io.”

Tapitra. Nisy kapiteny iray hafa nirahin’i Pilato hanamarina ny fahafatesany tamin’ny lelan-defona lava teo amin’ny sisiny. Na iza Izy na iza, dia efa maty Izy izao. Ary raha iny mitodi-doha miverina iny ianao, dia misy olona manakana sy manontany anao hoe: “Iza Izy raha araka ny eritreritrao?”

Koa inona ary no holazainao? Iza i Jesoa?

Entina ho dinihana sy ho resahina

• Tamin'i Jesoa niatrika fitsarana, nahoana ny fanontaniana hoe Iza Izy ihany no novaliany? Nahoana no misy lanjany lehibe izany?
• Midika inona aminao ny nanombohana an'i Jesoa teo amin'ny hazo fijaliana? Zarao ny tantaranao.