Atombohy eto | Dingana voalohany miaraka amin'i JesoaSantionany

Kolosiana 1 | Ataovy fiainana 

Tongasoa indray ry namako, vitantsika ilay izy! Nanaraka ny fiainan'i Jesoa isika tamin'ny alalan'ny famakiana ny bokin'ny Marka. Koa inona indray àry no manaraka? Ny manaraka an'izay, dia andeha isika hanaraka an'i Jesoa. Ahoana tsara hoe? Tsy efa izay ve no nataontsika teo? Eny, fa hafa indray ity iray ity. Tamin'ny faran'ny bokin'ny Marka dia nijery an'i Jesoa niakatra ho an'ny an-danitra ny mpianany. Mahavariana loatra! Fa tao aorinan'izay telo taona nanarahan'izy ireo Azy izay, dia inona izao no ataony? 

Izany hoe, mialoha ny nandehanany, dia nanome azy ireo ilay Iraka Lehibe i Jesoa: 

"Mandehana ianareo, dia ataovy mpianatra ny firenena rehetra…” (Matio 28:19). 

Aza hadino fa ny dikan'ny hoe mpianatra dia mpanaraka. Izany hoe ny mpianatra voalohany dia nantsoina hanomana mpianatra maromaro kokoa, toa antsika. 

Dia nataon'izy ireo izany! Ny bokin'ny Asan'ny Apostoly dia mirakitra ireo tantara mahagaga izay niainan'ireo mpianatra tamin'izy ireo nizara ny filazantsara tamin'izao tontolo izao. Maniry indrindra aho ny afaka ny hiteny hoe nilamina avokoa amin'izay ny zava-drehetra tao aorian'izay. Tsy izay anefa no zava-nitranga. Nanao asa soa maro maneran-tany ny Kristianina, fa nisy koa anefa ireo tranga mampalahelo izay nataon'izy ireo. Ary tranga efa nisy efa ela ilay izy, dia ny kolikoly, ny fitiavan-tena, ny fihatsarambelatsihy, izay efa toetrany hatrizay. Fa nisy ihany koa ny tsara: fahamoram-panahy, fanantenana sy fahasoavana. Izany hoe raha tiantsika ho atao ilay izy, dia mila ataontsika tsara. Andao iainana ilay izy. 

Fa ahoana ny fomba iainana azy? Mety afaka miteny aho hoe, "Aza manao ratsy intsony dia manaova ny mety amin'izay." Fa tsy mandaitra amin'ilay ao anatintsika nefa izay, torolalana ho an'ny fihatsarambelatsihy fotsiny izany. Miainga avy ao anatintsika ny fanovana izay entin'i Jesoa. Ahoana ny fandehan'izany? Andeha ho jerentsika ny Baiboly hahafantarantsika azy.

Ao aorian'ny bokin'ny Asan'ny Apostoly, dia feno boky epistily nosoratan'ny Apostoly avy eo - izay misy torolalana ny amin'ny fomba fanarahana ny dian'i Jesoa. Nisy fampianaran-diso nitsofoka tamin'ny fiangonana voalohany, koa ny epistily dia nosoratana mba hanampiana ireo mpino hanavaka ny marina amin'ny diso, dia ny fomba iainana ny Soratra Masina. 

Koa dia any indray no handehanantsika manaraka: any amin'ireo Kolosiana. Nosoratan'ny Apostoly Paoly izy ity ho an'ireo Kristiana tany Kolosia. Izy ireo dia mpino vao tena haingana, koa dia mety amintsika tsara ny tantarany raha izany. Anio ao amin'ny toko voalohany, dia mahita singa telo lehibe izay tena manan-danja tokoa isika dia ny; fahasoavana, ny Fanahy Masina, ary ny Fahafantarana an'i Jesoa. 

Atombok'i Paoly amin'ny fiarahabana ny taratasiny, ary tiako loatra ny fomba fanoratany azy io. Ary saika ny taratasiny rehetra dia miatomboka amin'ny fahasoavana avokoa. Fiarahabana toa mahazatra ihany, kanefa dia mifono fahamarinana lehibe. Ny fahasoavana dia fanomezana, tsy mendrika ny hahazo izany isika, Andriamanitra nefa dia tiantsika ary satria tiany isika ka fahasoavana izany. Ary ny fiainana ny finoantsika dia miatomboka amin'ny fahazoantsika ny dikan'ny fahasoavana. 

Eto amin'ny Kolosiana eto, dia misaotra an'Andriamanitra aloha i Paoly noho ny amin'ny asa izay nataony teo amin'ny fiainan'ireto Kristianina vaovao ireto: ny fanantenana izay tehiriziny, ny fitiavana izay nasehony, ary ny finoany. Ary Paoly dia nilaza fa niatomboka hatramin'izay nahenoan'izy ireo ny filazantsara izany, 

"...ary nahalalanareo tsara ny fahasoavan'Andriamanitra" (Kolosiana 1:6).

Izany no dingana voalohany. Fahazoana tsara fa namonjy antsika Andriamanitra satria tia antsika Izy. Tsy hoe izany no mendrika antsika, satria tsy toy ireny tambin-karama ireny izy io. Tsy noho ireo asa tsara izay mety vitantsika ihany koa. Jesoa no nandoa ny vidiny rehetra, ary tsy misy na inona na inona azontsika anampiana amin'izany. Any amin'ny epistily hafa ho an'ny Efesiana dia milaza azy toy izao i Paoly:

"Fa fahasoavana no namonjena anareo amin’ny finoana; ary tsy avy aminareo izany, fa fanomezana avy amin’Andriamanitra; tsy avy amin’ny asa, fandrao hisy hirehareha." (Efesiana 2:8). 

Misy fiadanana lehibe sy fahafahana tokoa ao amin'izao fahamarinana tsotra izao: Fahasoavana no namonjena antsika. "Tsy avy amin'ny asa", ny dikany izany dia hoe tsy valin'ny asantsika akory ny famonjena. Ny fiezahana ny hahazo ny famonjena dia mitondra antsika any amin'ny hambo sy fireharehana, ary ny fitsaratsarana, toy ireo mpihatsaravelatsihy. Ny fahazoana ny fahasoavana dia mitondra any amin'ny fanetren-tena. Mbola mitohy manao asa tsara isika, fa ataontsika amin'ilay fahasoavana izay mitovy amin'ilay nomen'Andriamanitra antsika izany. Ny fiantsoan'i Paoly azy dia hoe "mitondra vokatra tsara" - mitsiry avy ao anaty ilay fiovana tsara. 

Rehefa miresaka an'izay ihany isika dia inona tokoa no mitranga ao anatintsika ao? Ahoana ny fomba hahatongavan'izany fiovana izany ary avy aiza ny fahazoana sy fahalalana ilay noresahana teo? Ao amin'ny andininy faha-8 dia milaza amintsika i Paoly fa ilay Fitiavana vaovao izay niseho teo amin'ireo kristianina vaovao ireto dia "Fitiavana ao amin'ny Fanahy." Ary ao amin'ny andininy faha-9, dia mivavaka amin'Andriamanitra izy ny mba... 

"... hofenoina fahalalana tsara ny sitrapony hianareo amin’ny fahendrena sy ny fahazavan-tsaina rehetra avy amin’ny Fanahy."

Koa dia izay no singa lehibe manaraka: ny Fanahy Masina. Andriamanitra dia Fanahy, Ilay Persona fahatelo amin'ny Ray, Zanaka ary Fanahy Masina. Ny Fanahy dia miasa ao anatintsika, Izy no manome antsika ny fitiavana sy ny fahamoram-panahy, Izy no manampy antsika amin'ny fandresen-dahatra sy manome hery antsika hanohitra ny ratsy, Izy no mitarika sy manome fahalalana ar fahendrena ho antsika. Ny Fanahy Masina no manampy antsika hiaina ny Finoantsika.

Ny setrin'izany, ao amin'ny andininy faha-10, dia  "fiainana mendrika ny Tompo." Izay no fanalahidy. Tsy ny fitakiana ny fitiavany, fa ny fiainana mendrika ny fitiavana mahagaga izay efa nasehony antsika. Ny fahasoavana dia mamindra ny fifantohantsika amin'ireo asa izay vitantsika makany amin'ny tsy fahamendrehantsika ary any amin'ny "fitomboan'ny fahalalana tsara an'Andriamanitra" (1:10).

Raha ny tena marina, dia izany tokoa anie ny fanarahana an'i Jesoa e: fahafantarana Azy. Aza hadino ilay tena zava-dehibe dia mitia an'Andriamanitra sy mitia ny hafa. Koa dia tonga eo amin'ilay singa fahatelo lehibe isika: ny fahasoavana, ny Fanahy Masina, ary ny Fahafantarana an'i Jesoa. Mifarana amin'ny fampahatsiahivana lehibe mikasika an'i Jesoa ity toko voalohany ity. Hofaranako eto ity, saingy te hamporisika anao aho ny hamaky ny Kolosiana hatramin'ny farany, ary hanokana fotoana, indrindra indrindra. Hahafantatra misimisy kokoa mikasika ilay Zanaka Lahitokan'Andriamanitra. Hoy ny andininy faha-15:

"Izy (Jesoa) no endrik’Andriamanitra tsy hita, ny Lahimatoa talohan’izao zavatra ary rehetra izao; fa tao aminy no nahariana ny zavatra rehetra any an-danitra sy etỳ ambonin’ny tany, dia ny hita sy ny tsy hita, na fiandrianana, na fanjakana, na fanapahana, na fahefana, Izy no nahariana ny zavatra rehetra, sady ho Azy izany; ary Izy no talohan’ny zavatra rehetra, sady ao aminy no aharetan’ny zavatra rehetra."

Entina ho dinihana sy ho resahina

• Ny fitarihana androany dia nilaza tamintsika fa ny fiezahana ny hanova ny toetrantsika ivelany dia torolalana makany amin'ny fihatsarambelatsihy. Ahoana ny hevitrao mikasika an'izany?
• Nilaza ihany koa izy fa ny asa atao mba hahazoana ny famonjena dia mitondra antsika any amin'ny fanamelohan-tena na fireharehana, ny fahasoavana kosa dia mitondra antsika any amin'ny fiadanana sy ny fanetren-tena. Marina ve izany?
• Ny kolosiana 1:10 dia miantso antsika hiaina “Fiainana mendrika ny Tompo.” Toy ny ahoana ny fiheverenao ho fisehon'izany fiainana izany?