Atombohy eto | Dingana voalohany miaraka amin'i JesoaSantionany

Marka 16 & Lioka 24 | Fitsanganana amin'ny maty

Tongasoa indray ry namako. Andro lehibe ny andro anio. Teo amin'ny hazo fijaliana isika tamin'ny farany teo. Efa voamarina fa maty tokoa i Jesoa, nofonosina hariry madinika, ary efa nalevina tao amin'ny fasana. Nisy vato lehibe nakodia ho eo amin'ny varavaran'ny fasana, izay nambenan'ny miaramila Romana. Nandalo ny andro voalohany. Ary avy eo ny manaraka. Ary ny nanaraka azy teo. Andro fitsaharana ho an'ny Jiosy ny andro Sabata, koa dia Alahady maraina indray àry isika izao izao. 

Miatomboka mialoha ny fiposahan'ny masoandro ny Marka toko faha-16. Tonga niaraka tamin'ny zava-manitra ireo vehivavy maro be mba hanosotra izany amin'ny fatin'i Jesoa. Dia nifanontany izy ireo hoe: Iza re no hanakodia ny vato amin'ny varavaram-pasana e? Andininy faha-4:

“Fa nony nitraka izy, dia, indro, hitany fa efa voakodia niala ny vato; fa lehibe dia lehibe ny vato. Ary raha niditra tao anatin’ny fasana izy, dia nahita zatovo anankiray nipetraka teo amin’ny ankavanana niakanjo akanjo fotsy, dia talanjona izy. Fa hoy ilay zatovo taminy: 'Aza talanjona; mitady an’i Jesosy avy any Nazareta, Izay nohomboana tamin’ny hazofijaliana, hianareo; efa nitsangana Izy; tsy ato Izy; jereo fa teo no nametrahany Azy. Fa mandehana, lazao amin’ny mpianany sy Petera fa mialoha anareo ho any Galilia Izy; any no hahitanareo Azy, araka izay nolazainy taminareo.'" ”

Eo amin'ny andininy faha-8 dia voalaza fa "tora-kovitra sy talanjona" ireo vehivavy ireo.” Tena matotra. Nanantena ny hahita razana izy ireo ary tojo Anjely velona! Ary nirahina izy ireo hilaza izany any amin'ny mpianatra. Inona daholo ny dikan'izany? 

Ary tena hoe tranga tsy nampoizina tokoa ve ny zava-niseho? Diniho tsara ilay fehezan-teny farany amin'ny andininy faha-7, “Araka izay nolazainy taminareo.” Efa niresaka mikasika an'izay i Jesoa, efa noteneniny ny mpianany fa tsy maintsy ho faty Izy ary hatsangana indray! Fa indraindray isika tsy mety mihaino ny marina. Tadidio ny fomba nanoheran'i Petera ny tenin'i Jesoa nikasika izany. Tsy azon'izy ireo ny tian'i Jesoa hahatongavana. Koa nahoana ary no tsy maintsy maty i Jesoa?

Ny tantaran'ny fitsanganana tamin'ny maty dia vorakitra ao anatin'ny bokin'ny filazantsara miisa efatra, ary samy mitantara ny zava-niseho tamin'io andro io avokoa izy ireo. Koa andeha ary ho vakiantsika ny nosoratan'i Lioka mba hahafahantsika mamaly an'izany fanontaniana izany. Lioka 24:13:

“Ary, indreo, nisy roa lahy tamin’ireny nandeha tamin’izany andro izany hankany amin’ny vohitra atao hoe Emaosy, tokony ho enim-polo stadio raha any Jerosalema. Dia niresaka ny amin’izay zavatra rehetra nanjo izy. Ary raha mbola niresaka sy niara-nisaina izy, dia nanatona Jesosy ka niaraka taminy. Nefa ny mason’ireo nohazonina mba tsy hahafantarany Azy. Ary hoy Izy taminy: Ahoana izao teny resahinareo etỳ am-pandehanana izao?”

Mahavariana be avy eo ny tohin'ity tantara ity. Nisy roa lahy nandeha teny an-dalana, nalahelo endrika satria maty i Jesoa. Very hevitra tanteraka noho ny zava-niseho. Misy olona vahiny manatona azy ireo, manontany azy izay zavatra resahany. Dia niresaka mikasika an'i Jesoa izy ireo "Mpaminany mahery tamin’ny asa sy ny teny teo anatrehan’Andriamanitra sy ny vahoaka rehetra.” Nefa nohomboana tamin'ny hazo fijaliana Izy ka dia maty. Hoy ny andininy faha-21, 

“Nefa nantenainay fa Izy no Ilay efa hanavotra…”

Nanantena izahay. Fa niresaka mikasika ilay vaovao nolazain'ireo vehivavy avy tao am-pasana ihany koa izy ireo. Tsy hitany intsony izay tokony eritreretina. Ary nandritra ny fotoana niresahany izany dia tsy fantany akory hoe niresaka tamin'iza izy ireo, tsy fantany hoe i Jesoa anie io iresahany io e! Andininy faha-25:

“Ary hoy Izy taminy: Ry adala sy votsa saina ka tsy mino izay rehetra nolazain’ny mpaminany. Moa tsy tokony ho niaritra izany va Kristy ka hiditra any amin’ny voninahiny? Dia nanomboka hatramin’i Mosesy sy ny mpaminany rehetra Izy, ka nanambara taminy ny hevitry ny teny milaza Azy ao amin’ny Soratra Masina rehetra.”

Tsara loatra ity tantara ity. Nozarain'i Jesoa ny hafatra izay haharitra mandrakizay, ary natambany ny Soratra Masina rehetra mba hanehoana azy ireo fa ny Soratra rehetra dia samy manondro ny hazo fijaliana sy ny fitsanganana amin'ny maty avokoa. Tsy maintsy nandalo fahafatesana ny Mesia. Fa nahoana?

Mamerina antsika any amin'ny ivony sy zava-dehibe indrindra ho an'Andriamanitra izany dia ny Fitiavana. Tia antsika Andriamanitra. 

“Izao no ahafantarantsika ny fitiavana, satria Izy no nanolotra ny ainy hamonjy antsika” (1 Jaona 3:16). 

Tsy maintsy maty Jesoa satria Tia antsika Izy. Maty Izy mba hahatonga antsika ho voavela heloka. Manazava izany toy izao ny bokin'ny Romana: 

“Fahafatesana no tambin'ny ota” (Romana 6:23). 

Midika izany fa ireo heloka rehetra izay nataontsika teo anatrehan'Andriamanitra dia mitondra antsika any amin'ny fahafatesana. Nanolotra antsika ny fiainana Izy, nohararaontitsika nefa izany ary tsy nampiasaintsika araka ny tokony ho izy, ary ny sazy mihatra amin'izany dia ny fahafatesana ihany. Nefa tia antsika loatra Andriamanitra. Notiaviny fatratra isika koa dia natolony ny Zanany Lahitokana hisolo tena antsika. Teo amin'ny hazo fijaliana i Jesoa, izay tsy nanana ota mihitsy nitondra ny fahotantsika rehetra, nandoa ny tambiny rehetra, ary maty nisolo antsika.  

Fa tsy ny fahafatesana nefa no manana ny teny farany. Tonga Jesoa mba handresy ny fahafatesana. Ary nanangana Azy tamin'ny maty Andriamanitra. Ary ny fahefana izay nanangana an'i Jesoa tamin'ny maty izay no ilay fahefana manangana antsika ihany koa. Tonga olom-baovao isika noho i Jesoa. Efa lasa ny zavatra taloha, indro efa tonga zava-baovao izy. 

Diniho tsara anie ny fandehan'ilay fotoana e. Maty ho antsika i Jesoa fony mbola mpanota isika (Romana 5:8). Tsy niandry antsika ho tonga olona tsara fanahy be izy. Nitia antsika tao anatin'ny faharatsiantsika tanteraka Izy, fony isika mbola fahavalony. Fitiavana marina sy matotra tokoa izany.  

Ity, ity sorona izay tena mahavariana tokoa, ity Fitiavana lehibe izay tsy takatry ny saina ity dia manova ny zava-drehetra. Ity no fanantenana. Fanantenana ho an'ny olona rehetra. Ity ilay Fitiavana manova olona maro. Ireo olona izay nolazaiko anao, izay tia amin'ny fahafoizana tanteraka, tsy toy izany foana ny toetran'ireny taloha izay. Fa ilay Fitiavana izay nitondra an'i Jesoa teo amin'ny hazo fijaliana ary ilay Fahefana izay nanangana Azy tamin'ny maty no velona sy miasa ao anatin'izy ireny. Ary tena mahavariana tokoa ny fiainan'izy ireny. 

Toy ny ahoana ny fomba azontsika iainana izany ankehitriny? Vakio ny Lioka toko faha-24, ary hihaona indray isika any amin'ny bokin'ny Kolosiana 

Entina ho dinihana & ho resahina

• Nahoana no tsy maintsy maty teo amin'ny hazo fijaliana i Jesoa?
• Ny Romana 5:8 dia milaza Fa Andriamanitra mampiseho ny fitiavany antsika, fa fony mbola mpanota isika, dia maty hamonjy antsika Kristy. Inona ny lanjan'izany Fitiavana izany ho anao?
• Ny Romana 8:11 dia milaza fa ny Fanahin’Izay nanangana an’i Jesosy tamin’ny maty no mitoetra ao anatinareo, dia Izay nanangana an’i Kristy Jesosy tamin’ny maty no hamelona ny tenanareo mety maty amin’ny Fanahiny. Efa nahatsapa sy nahita ny fisian'izany teo amin'ny fiainanao ve ianao?