Atombohy eto | Dingana voalohany miaraka amin'i JesoaSantionany

Mark 4-5 | Voa tsara & Roka tsara

Jesoa dia mpilaza tantara tena mahay. Ao amin’ny Marka 4 sy 5, nilaza fanoharana -   i Jesoa ka nomeny endrika tantara izany hisintomana lesona. Hanampy antsika hamaly fanontaniana roa lehibe ilay fanoharana voalohany nataony: inona moa ny Baiboly ary nahoana isika no tokony hamaky azy?

Andao atomboka amin’ny Marka 4, andininy faha-3:

“‘Henoy ange! Indro niainga ity mpamafy, hamafy voa. Nony namafy izy, ny voa sasany latsaka teny amoron-dalana, ka tonga ny voromanidina nitsindroka azy rehetra. Ny voa sasany latsaka tamin'ny toerana be vato sady manify nofon-tany, ka vetivety dia nitsimoka satria tsy lalina ny tany nilentehany; saingy nony nipoaka ny andro, dia nalazon'ny hafanana ireo tsimoka ireo ka maina satria tsy namaka lalina. Ny voa sasany kosa latsaka tamin'ny tany lonaka, ny iray namokatra telopolo heny, ny iray enimpolo heny, ny iray zato heny.’

Dia nofaranan'i Jesoa hoe, ‘Izay manan-tsofina hihainoana, aoka hihaino.’”

Tantara momba ny fambolena izany izy ity. Ny mpamboly dia mamafy voa; misy voa maniry ary misy tsy mitombo, arakaraka ny tany. Tsy dia mampientanentana loatra izany, fa nomen’i Jesoa antsika ny fanalahidin’io fanoharana io ao amin’ny andininy faha-14:

“Ny mpamafy dia mamafy ny tenin'Andriamanitra.” 

Ao amin'ny Lioka 8, hoy Jesoa hoe: 

“Ny voa dia ny tenin'Andriamanitra” (Lioka 8:11).

Nampitahain’i Jesoa tamin’ny voa àry ny Tenin’Andriamanitra. Diniho ny voa. Tsy dia misy jerena loatra ny aminy. Ny voankazo no mahaliana kokoa. Saingy ilay ao anatin'ny voa, ilay sombiny kely tsy dia misy dikany loatra, no nanafina ny drafitra rehetra sy ny singa rehetra ilaina amin'ny fanjariana kirihitra, zavamaniry, na hazo iray manontolo, manomboka amin'ny fakany ka hatramin'ny rantsany ka hatramin'ny voankazo, ary tsy misy loto na kely ary ao aminy. Mahavariana ny voa iray: alevinao izy dia miteraka fiainana.

Ary milaza amintsika i Jesoa hoe: voa ny Tenin'Andriamanitra. Mety tsy dia hita loatra, saingy ao anatin'izany ny drafitry ny fiainana. Ny hany ilaina dia roka tsara.

Tsy boky tokana fotsiny ny Baiboly. Boky 66 izy io raha ny marina. Mihoatra noho izany anefa, ny Baiboly dia Tenin’Andriamanitra. Hoy ny 2 Timoty: 

“Ny Soratra Masina rehetra dia nomen'ny tsindrimandrin'Andriamanitra” (2 Tim 3:16). 

Milaza ny Baiboly fa Tenin'Andriamanitra izy.

Ka raha voa ny Teny, inona ny tany? Izany dia mamerina antsika indray any amin'ny fanoharana.

Nazavain'i Jesoa fa ny tany no mandre ny teny. Izaho sy ianao ny tany. Ny fontsika izany, ary misy karazany efatra ny tany, efatra samihafa ny fo rehefa mikasika ny fandrenesana izany tenin’Andriamanitra izany.

Ny fo sasany dia mafy toy ny lalana. Mikasika ny Teny fa tsy mety tafiditra. Misy ihany koa ny fo toy ny tany be vato. Misy roka marivo kely ka mitombo kely ny voa, fa ny fakany tsy afaka mitombo lalina. Rehefa tonga ny olana dia miala amin'ny finoana izy ireo. Toy ny tany misy tsilo sy tsimparifary ny fo sasany, ka voafandrika ao anatin’ny fahafinaretana sy ny fanahiana eo amin’ny fiainana, ka tsy misy toerana hambolena finoana intsony. Saingy misy fo sasany izay… Eny, efa nahita saha izay feno roka izay efa tranainy ve ianao ka nivadika ho zaridaina? Mahatalanjona tokoa.

Noho izany, ahoana no azahoanao antoka fa ny fonao no anisan'ireo karazana voa mitombo? Vakio ny Marka 4 fa ao ny valiny. Tsarovy fa ao amin’ny tenin’Andriamanitra ny hery, fa tsy ao amin'ny teniko mihitsy. Hitaona anao aho eto, ny tena tanjoko dia ny famakianao ny Baiboly ho anao.

Ny fanantenako dia fahazaranao tsara ara-baiboly. Dingana tena ilaina amin’ny fanarahana an’i Jesoa izany. Vakio isan’andro ny Baiboly. Mamafaza voa tsara amin’ny roka tsara dia mamoaza voankazo tsara.

Vakio àry ny Marka 4 sy 5, ary eritrereto hoe tianao ho karazana tany inona ianao. Raha manam-potoana ianao, dia vakio ny toko manontolo, araho i Jesoa izay manao tantara mahagaga maro be. Ary jereo Izy miteny amin’ny tafio-drivotra mahery ka mampitony izany, mamoaka demonia, manasitrana ny marary, ary miantso ny maty ho amin’ny fiainana mihitsy aza. Ary izany rehetra izany, dia tanterahiny amin’ny herin’ny teniNy. Ary raha mahavita izany rehetra izany ny tenin’i Jesoa dia alaivo sary an-tsaina fotsiny izay rehetra vitan'ny teniNy eo amin’ny fiainanao. Ny hany ilainao, dia roka tsara.

Ho dinihina sy atao fanakalozan-kevitra:

• Nahoana, araka ny hevitrao, no noharin’i Jesoa ho toy ny voa ny Tenin’Andriamanitra? Inona no mampitovy azy ireo?
• Raha ny tany eto ny fonao, inona no azonao atao mba hahazoana antoka fa hovolena ao anaty roka tsara ny Teny mba hahafahany hitombo sy hamoa?
• Ahoana ny fahitanao ny fiantraikan’ny tenin’Andriamanitra aminao sy amin'ny olona eo amin’ny fiainanao? Zarao ny tantaranao.