Atombohy eto | Dingana voalohany miaraka amin'i JesoaSantionany

Marka 8-9 | Iza moa i Jesoa?

Anio, Marka 8 dia hitondra antsika any amin’ny fototry ny Kristianisma. Efa ela no nanaraka an’i Jesoa sy ny mpianany isika. Nahita ny fahagagana nataony izy ireo, nahatsapa ny fangoraham-pony, nandre ny fampianarany. Fotoana ny fanapahan-kevitra izao fotoana izao. Fanontaniana lehibe roa ary no miseho: Iza moa i Jesoa? Ary inona no ilaina mba hanarahana azy?

Manomboka eo amin’ny andininy faha-27 isika:

Dia niainga i Jesoa sy ny mpianany nankany amin'ireo tanàna kely manodidina an'i Kesaria-Filipo; ary teny an-dalana, dia nanontany ny mpianany i Jesoa nanao hoe: ‘Iza moa Aho, araka ny filazan'ny olona Ahy?’”

Fanontaniana tsotra io. Ary eo tokoa no anombohantsika rehetra rehefa miezaka mamantatra izay inoantsika isika. Manomboka amin'ny zavatra rentsika avy amin'ny hafa aloha izany amin'ny voalohany. Naverin'ny mpianatra ary izay reny fa: Misy milaza fa i Jesoa no Jaona Mpanao Batisa nateraka indray, na Elia, na mpaminany.

Ary ankehitriny, ny olona dia manana hevitra maro momba ny hoe iza i Jesoa. Ny silamo dia manome voninahitra an'i Jesoa ho ilay mpaminany lehibe an'i Allah - tsy nanota ary nateraky ny virijiny. Raha ny Jiosy no resahina, dia mifangaro ny heviny mikasika an'i Jesoa - ny sasany dia mahita raby tsara, ny hafa mahita heretika, ary maro no mahita ny Mesia. Hindoa maro no manaja an’i Jesoa ho toy ny mpampianatry ny vahoaka jiosy, ary Bodista maro kosa no mihevitra an’i Jesoa ho toy ny olombelona nohazavaina. Noho izany, maro ny hevitra momba an'i Jesoa - tsara ny ankamaroany. Ao amin’ny andininy faha-29 anefa, Jesoa dia manindry ilay raharaha:

“Dia nanontany azy ireo indray i Jesoa: ‘Fa ianareo kosa, Iza moa Aho aminareo?’’”

Io ilay fanontaniana manan-danja indrindra. Mba hahafahan'ny finoana hanana dikany na inona io na inona, dia tsy maintsy ho anao samirery ny valin'izay. Tsy ampy ny mahafantatra izay lazain’ny hafa. Tsy maintsy avy aminao izany: Iza moa i Jesoa aminao?

Fotoana fanapahan-kevitra amin'izao, ary i Petera no nanao hoe:

“Namaly i Petera ka nanao taminy hoe: ‘Ianao no ilay Mesia.’”

Fotoana lehibe io. Ny hoe Mesia dia midika hoe ilay voahosotra. Izy no olom-boafidin’Andriamanitra hanatanteraka ny teny fikasany sy hamita ny drafiny lehibe hamonjy. Handinika ny fampanantenan’Andriamanitra sy ny faminaniany isika any amin’ny diantsika manaraka. Amin’izao aloha, dia fantaro ary ataovy mazava tsara ao an-tsaina fa ny fanambaran’i Petera no vato fototry ny finoana. Ny diantsika miaraka amin’Andriamanitra dia manomboka miaraka amin'izay lazaintsika fa iza i Jesoa.

Ary ao amin’ny andininy faha-31, Jesoa dia nampianatra azy ireo fa ny Mesia... 

“...tsy maintsy hijaly mafy, ka holavin'ny loholona.”

Tsy tian’i Jesoa hoe gaga izy ireo rehefa nolavin’ireo mpitarika mpihatsaravelatsihy ilay olom-boafidin’Andriamanitra, 

“...dia hovonoina ho faty Izy, nefa andro fahatelo aorian'izany, dia hitsangana velona.”

Noho izany, efa nambaran’i Jesoa ny zava-drehetra. Hovonoina izy ary hitsangana velona indray. Naminaniana nandritra ny taonjato maro izany, ao amin’ny Isaia 53, Salamo 22, Zakaria 12. Planin’Andriamanitra izany. Ho avy tokoa ilay hazo fijaliana.

Mahaliana, fa ny hazo fijaliana no mampiavaka an'ilay Jesoa ao amin'ny Baiboly amin'izay lazain'ny hafa. Ny silamo dia mandà ny tantaran'ny hazo fijaliana; Ny Hindoa dia miresaka momba an'i Jesoa ho nandalo tany amin'ny samadhi milamina; ho an'ny Bodista izay tsy mino ny ota indray, dia raisiny ho lozabe fotsiny ny hazo fijaliana.

Tamin'ny voalohany, ohatry izany ihany koa no nandraisan'i Petera azy. Nentiny nitokana i Jesoa hibedy azy. Nobedesin' i Jesoa nefa i Petera avy eo noho ny fiheverany tahaka ny olona eto amin'izao tontolo izao, ka tsy niraharaha ny an’Andriamanitra. Ny fisainan'ny olona dia hamonjy ilay tsara fanahy mba hisorohana ilay fijaliana, ary hamela ny ratsy fanahy hahazo izay mendrika azy. Fa tsy i Jesoa izany. I Jesoa dia niaina tamim-pahamarinana tokoa, ary koa, maty toy ny mpanota. Nisolo toerana antsika Izy.

Avy eo, eo amin’ny andininy faha-34, manazava izay ilaina mba hahatongavana ho mpianatr'i Jesoa. Vakio tsara:

“Raha misy te hiara-dia amiko, dia aoka izy handà ny tenany, ka hitondra ny hazo fijaliany ary hiaraka amiko.”

Tadidio tsara io andininy io raha toa ka maniry ny hanara-dia an'i Jesoa ianao. Izay no tambiny. Mba hahafahanao manaraka an'i Jesoa, ianao dia tsy maintsy:

Mandà ny tenanao: Tsy mahavoavonjy ny tenanao ianao, tsy vitanao ny ho tsara indrindra arak'izay takian'Andriamanitra lehibe. Mila an'i Jesoa amin'izany.

Ento ny hazo fijaliana: Ny Kristianina tsirairay avy dia mitondra zioga, ny fahafoizan-tena. Fa tsy ho rariny aminao ny fiainana.

Ary manaraha ny dian'i Jesoa: Any amin'izay hitondran'i Jesoa anao, dia manaraha Azy.

Ny fanarahana an'i Jesoa dia mihoatra lavitra noho ny finoana, sahala amin'ny fanambadiana izay mihoatra lavitra noho ny fihetseham-po ihany. Fanoloran-tena tsy tapaka izany, fanekem-pihavanana amin’ny raNy. Andininy faha-35:

“Fa izay te hamonjy ny ainy no hahavery azy; ary izay hahafoy ny ainy, noho ny fitiavany Ahy sy fitiavana ny Vaovao Mahafaly, no hahavonjy azy. Fa inona no soa azon'ny olona raha eo am-pelatanany avokoa izao tontolo izao, kanefa ny ainy mitondra faisana? Ary inona no azon'ny olona omena ho takalon'ny ainy?”

Tena tiako io andininy io. Ainao ve hoe inona no tena ambaran'i Jesoa eo? Milaza Izy hoe manan-danja sy sarobidy ary ambony mihoatra noho izao tontolo izao ny fanahinao. Ka laozy izao tontolo izao, ary fikiro i Jesoa. Ho an'i Jesoa, ny fanahinao dia sarobidy loatra ka mendrika ny namoizany ny aiNy. Inona no sandany aminao?

Tao anatin'ny fiainako iray manontolo, dia nandany taona maro aho mba hamela ny finoana ho an'ny hafa, “Mino izao sy izao izy ireo.” Fa tonga ary ilay fotoana ho ahy handraisako fanapahan-kevitra - ho an'ny finoako samirery izany. Ny fetim-panambadiana syefa manambadydia samihafa be. Ary toy izany, samihafa be ny mino zavatra mikasika an'i Jesoa sy ny hoe manaraka an'i Jesoa. Ny fanoloran-tena sy ny fahafoizan-tena no mahasamihafa azy. Raha hafohezina ary, ny tena mahasamihafa azy dia ny fiainanao. Ary mendrika isaky ny segondra tsirairay mandalo izany.

Vakio Marka 8, dia valio ny fanontaniana anio. Iza i Jesoa aminao, vonona hanaraka Azy ve ianao?

Ho dinihina sy atao fanakalozan-kevitra:

• Iza i Jesoa aminao?
• Inona no hahafoizanao mba ahafahana manaraka an'i Jesoa? Soraty amin'ny teninao manokana ka tandrify amin'ny fiainanao mihitsy ny andininy faha-34.
• Mendrika ny sandany ve ny fanarahana an’i Jesoa? Soraty amin'ny teninao manokana ka tandrify amin'ny fiainanao mihitsy ny andininy faha-35-36.