Atombohy eto | Dingana voalohany miaraka amin'i JesoaSantionany

Marka 10-11 | Fiainana Mandrakizay

Ny amin'ity anio dia nisy tovolahy iray nametraka fanontaniana lehibe an'i Jesoa araka ny Marka 10, andininy 17:

"Ary nony vao nivoaka nankeny an-dàlana Jesosy, dia nisy olona anankiray nihazakazaka nanatona ka nandohalika teo anatrehany ary nanontany Azy hoe: Mpampianatra tsara ô, inona no hataoko handovako fiainana mandrakizay?’”

Tena fanontaniana tokoa izany. Ny Baiboly dia mampianatra antsika fa izay ataontsika eto amin'ity fiaina-mandalo ity no mamaritra ny ho mandrakizaintsika. Ary ity tovolahy ity dia maniry ny hahalala hoe inona no tsy maintsy ataoko mba handovako ny fiainana mandrakizay? Ahoana no hahatongavako any an-danitra?

Koa dia nanontany ny mpampianatra tsara izy. Ary niandry ny valin-teny izay ho atolotr'i Jesoa. Andininy 18:

"Nahoana Aho no ataonao hoe tsara?" hoy ny navalin'i Jesoa. "Tsy misy tsara afa-tsy Iray ihany, dia Andriamanitra."

Jereo tsara fa tsy tonga dia novalian'i Jesoa ilay fanontaniana. Fa nahoana? Satria Tiany hoesirona aloha ny finoan-dison'ity tovolahy ity vao hanome valiny Izy. Ka dia hoy Jesoa taminy: "Tsy misy tsara afa-tsy Iray ihany, dia Andriamanitra". Manan-danja be izany teny izany.

Mazàna isika no mitady hirona amin'ny fanavahana izao tontolo izao amin'ny hoe olona tsara sy olona ratsy. Ny Baiboly kosa anefa dia milaza fa samy efa nanota ny olombelona rehetra ary tsy olombelona na dia iray aza marina afa-tsy Andriamanitra Izy Tenany (Romana 3:23). Ny hoe manana ny voninahitra avy amin'Andriamanitra dia marina amin'Andriamanitra, ary ao amin'ny Testamenta Taloha dia ny fahamarinanana  irery ihany no làlana mitondra amin'ny fiainana mandrakizay. (Ohabolana 12:28).

Jereo amin'izay anie ny navalin'i Jesoa azy avy eo. Ao amin'ny andininy 19:

"Fantatrao ny didy hoe…”

Ary dia notanisainy ireo didy: "Aza mamono olona, Aza mijangajanga, Aza mangalatra, Aza mety ho vavolombelona mandainga, Aza manambaka, Manajà ny rainao sy ny reninao." Mety tsikaritrao ireo hoe ao anatin'ny didy folo. Andininy 20:

"Ary hoy izy taminy: Mpampianatra ô, izany rehetra izany efa notandremako hatry ny fony aho mbola kely.

Hita taratra amin'izany fa  nanasokajy  ny tenany ho tsara ity tovolahy ity. Ary afaka mitantara koa aho. Talohan'ny nahafantarako an'i Jesoa dia nihevi-tena mihitsy aho fa olona tsara. Niezaka ny tsy nandratra na nampijaly an'iza an'iza aho, ary olona hendry mihitsy aho.

Diniho tsara anie fa tsy nasian'i Jesoa resaka ireo didy izay notononiny e. Nolazainy ireo didy rehetra mikasika ny fitiavana ny hafa, tsy nanonona ireo didy izay mikasika an'Andriamanitra toy ny "Aza manana Andriamanitra hafa fa Izaho ihany" sy ny "Aza manao sarin-javatra voasokitra ho anao". Fa nahoana ireo no tsy notononiny? Andininy 21: 

"Ary Jesosy nijery azy tsara, dia tia azy" 

Hiato kely eto aloha isika. Ho an'i Jesoa dia tsy fotoana iray hamaliana fanontaniana ara-teolojika fotsiny izany ity fotoana ity. Tian'i Jesoa izy. Ka dia hoy i Jesoa taminy:

"Diso zavatra iray loha hianao; mandehana, amidio izay rehetra anananao ka omeo ny malahelo, dia hanana rakitra any an-danitra hianao; ary avia hanaraka Ahy."

Mahavariana. Diso zavatra iray loha fotsiny izy ny amin'ny fiainana mandrakizay. Iray fotsiny. Fa vakio tsara anie, inona ilay iray fotsiny? Ilay izy hanome ny fananany rehetra ho an'ny malahelo ve? Mino aho fa tsy izany. Ilay fehezanteny farany, izay teny telo ireo no izy: "Avia hanaraka Ahy." 

Fomba iray ihany no ahafahana mandova ny fiainana mandrakizay dia ny: manaraka an'i Jesoa. Hoy ny Romana toko faha-3 amintsika 

"Tsy misy nofo hohamarinina amin’ny asan’ny lalàna eo anatrehany” (Romana 3:20). 

Ny dikan'izay dia hoe tsy ampy akory ny asan'ny lalàna. 

(Fa) ny fahamarinana dia avy amin’Andriamanitra amin’ny finoana an’i Jesosy Kristy ho an’izay rehetra mino" (Romana 3:22).

Raha ambara amin'ny fiteny tsotra kokoa izany dia, nohamarinin'i Jesoa isika rehefa manaraka Azy am-pinoana. Izay tsy nahalala ota dia efa nataony ota hamonjy antsika, mba ho tonga fahamarinan’Andriamanitra ao aminy kosa isika. (2 Korintiana 5:21). 

Koa nahoana ary no notenenin'i Jesoa ilay tovolahy hamarotra ny fananany rehetra? 'Ndao anie jerena ny fihetsik'ilay tovolahy avy eo e:

"Dia nanjombona terỳ ny tarehiny tamin’izany teny izany, ka niala tamin’alahelo izy, satria nanana harena be." (Marka 10:22).

Izany hoe tovolahy tena nanan-karena izy. Ary tena mifono hevi-dehibe ity fihetsiny ity. Nalahelo izy satria tena tiany ireo harenany ireo. Tsy hoe ratsy akory ny vola, fa ny fitiavam-bola no fototry ny ratsy rehetra. Ny harena dia mora mivadika ho sampy, izay mety haka ny toeran'Andriamanitra. Mety fanahy inian'i Jesoa mihitsy ny tsy hanonona ny didy voalohany satria tian'i Jesoa haseho amin'ity tovolahy ity fa manao izany izy. Ary afaka milaza koa aho. Nieritreritra ihany koa aho fa azo lazaina ho olona tsara, saingy ny fieboeboana no sampiko, ary nanalavitra ahy tamin'Andriamanitra izany. Ho an'ity tovolahy ity dia ny vola no sampiny. Koa dia hoy Jesoa taminy: esory aloha ny sampinao, ary avia manaraha Ahy.

Diniho anie ny tenin'i Jesoa e. Namaritra ny lanitra ho "Fidirana amin'ny Fanjakan'Andriamanitra" Izy. Manova zavatra maro izany fanambarana izany. Raha toerana tsara ihany ny Lanitra, dia tokony mitaky fahatsarana araka izany ny fidirana ao; fa raha toa kosa ka Fanjakan'Andriamanitra ny Lanitra, dia mitaky fahamarinana avy amin'Andriamanitra araka izay koa ny fidirana ao.

Jesoa no Mpanjaka, ary ny làla-tokana hahafahana miditra amin'ny Fanjakan'Andriamanitra dia ny Fanarahana an'i Jesoa. Tsara Jesoa, ary Izy irery ihany no afaka manamarina antsika. Fa tsy afaka ny hanaraka an'i Jesoa isika raha tsy avelantsika aloha ireo sampintsika. Tsy afaka ny hanompo Tompo roa ianao, tsy afaka ny handeha amin'ny làlana roa samihafa ianao. 

Inona àry no nitranga tamin'ity tovolahy ity? Nanaraka an'i Jesoa ihany ve izy, sa azony izao tontolo izao fa nahavery ny fanahiny izy? Tsy fantatsika. Fa ny fantatro dia ny hoe mbola manana fotoana ianao. 

Manontany tena ihany aho hoe mety ahoana re no avalin'i Jesoa raha toa ianao mametraka fanontaniana Aminy toy izany koa e? Samy manana ny sampintsika isika: vola, rendrarendra, zava-mahadomelina, ny faniriana te ho tafita mafy, ny fieboeboana, ny fanirian-dratsy sy ny fijangajangana. Mba hamantaranao hoe inona ny sampinao, dia anontanio ny tenanao hoe inona no mety hitazona anao raha hoy ny Tompo aminao hoe "Avia, manaraha Ahy"?

Vakio ny Marka 10, ary hevero tsara izay tokony ho havotsitrao mba hahafahanao hanaraka Azy. 

Ho enti-mandinika sy hifanakalozan-kevitra:

• Aiza ho aiza amin'ny valin-teny izay nomen'i Jesoa no tena namaly ny fanontanian'ity tovolahy ity? (Vakio 10:17 & 10:21).
• Nahoana i Jesoa no nilaza fa sarotra ho an'ny manan-karena ny hiditra ny fanjakan'Andriamanitra? (Vakio 10:25).
• Rehefa miantso anao hanaraka Azy i Jesoa dia inona no mitazona anao? Zarao ny tantaranao.