Sísúnmọ́ Ọlọ́run

Sísúnmọ́ Ọlọ́run túmọ̀ sí pé kí a fi gbogbo ọkàn wa wá Ọlọ́run. Ohun tí àdúrà àti ààwẹ̀ gbígbà túmọ̀ sí gan-an nìyẹn. Kì í ṣe pé a fẹ́ f'ipá mú Ọlọ́run ṣe nǹkan kan ni a ṣe ń ṣe ìwọ́de ọ̀hún. Òmùgọ̀ la jẹ́ tí a bá rò pé a lè mú kí Ọlọ́run ṣe ohunkóhun. Kàkà bẹ́ẹ̀, ńṣe là ń rẹ ara wa sílẹ̀ nípa gbígbàdúrà àti gbígbààwẹ̀ kí Ọlọ́run lè yí wa padà, kí Ó sì mú kí a lè máa rìn ní ìbámu pẹ̀lú ìfẹ́ Rẹ̀ pípé. A máa ń mú àwọn ohun tó lè ṣe ìdíwọ́ fún àdúrà wa kúrò. Ó jẹ́ nípa wíwá Ọlọ́run pẹ̀lú gbogbo ohun tí ó wà nínú wa.

A ti ka apá kan Jákọ́bù 4:1-10 ní ìbẹ̀rẹ̀ ìwé yìí, àmọ́ ẹ jẹ́ ká tún wò ó. Gbogbo rẹ̀ ló dá l'órí ìgbéraga àti ìtẹríba. Ó ń béèrè pé kí a tẹ'rí ba fún Ọlọ́run kí a lè sún mọ́-Ọn, àti gbogbo ohun rere tí ìpinnu láti tẹ'rí ba yìí ń mú wá.

Nínú ìwé 2 Kíróníkà 15:1-2, a rí i tí Ẹ̀mí Ọlọ́run ń bá Asaráyà ọmọ Óbédì sọ̀rọ̀. Ó sọ fún Asaráyà pé bí ó bá wá Òun àti àwọn nǹkan ti Ọlọ́run, Ọlọ́run yóò wà pẹ̀lú rẹ̀. Ṣùgbọ́n bí Asaráyà bá kọ̀ Ọ́ sílẹ̀, tí kò sì sún mọ́ Ọlọ́run, Ọlọ́run yóò kọ̀ ọ́ sílẹ̀.

Nígbà tí ọkàn wa bá di ẹlẹ́gbin, a máa ń sọ ara wa di aláyà líle fún àwọn nǹkan tó jẹ mọ́ ti Ọlọ́run. Nígbà tí ọkàn wa bá di èyí ti o le koko sí àwọn nǹkan ti Ọlọ́run, a ò lè sún mọ́ Ọlọ́run. Kí n tó lè sún mọ́ Ọlọ́run, mo gbọ́dọ̀ wẹ ara mi mọ́ (tú ara mi kúrò nínú ara mi), ní ìgbọràn sí òtítọ́ nípa agbára Ẹ̀mí Mímọ́, àti nínú ìfẹ́ tọkàntọkàn pẹ̀lú ọkàn tí ó mọ́.