Ẹ̀kọ́ Àṣàrò Bíbélì nípa Ìdúpẹ́ Látọwọ́ Paul TrippÀpẹrẹ

L'òtítọ́ ni wípé ọkàn l'ára àwọn ẹ̀ṣẹ̀ tí ó ga jùlọ nínú àwọn ìbáṣepọ̀ wa ni ẹ̀ṣẹ̀ ìgbàgbé. Ẹ wo òwe Jésù yìí:

Nítorí náà, ìjọba ọ̀run dàbí ọba kan tí ó fẹ́ ṣe ìṣirò pẹ̀lú àwọn ọmọ ọ̀dọ̀ rẹ̀.  Bí ó ti ń ṣe èyí, a mú ajigbèsè kan wá sọ́dọ̀ rẹ̀ tí ó jẹ ẹ́ ní ẹgbàárùn-ún tálẹ́ǹtì. Nígbà tí kò tì í ní agbára láti san án, nígbà náà ni olúwa rẹ̀ pàṣẹ pé kí a ta òun àti ìyàwó àti àwọn ọmọ rẹ̀ pẹ̀lú gbogbo ohun tí ó ní láti fi san gbèsè náà. Nígbà náà ni ọmọ ọ̀dọ̀ náà wólẹ̀ lórí eékún níwájú rẹ. Ó bẹ̀bẹ̀ pé, "Mú sùúrù fún mi, èmi yóò sì san gbogbo rẹ̀ fún ọ." Nígbà náà, ni olúwa ọmọ ọ̀dọ̀ náà sì ṣàánú fún un. Ó tú u sílẹ̀, ó sì fi gbèsè náà jì í. Ṣùgbọ́n bí ọmọ ọ̀dọ̀ náà ti jáde lọ, ó rí ọ̀kan nínú àwọn ọmọ ọ̀dọ̀ ẹgbẹ́ rẹ̀ tí ó jẹ ẹ́ ní ọgọ́rùn-ún owó idẹ, ó gbé ọwọ́ lé e, ó fún un ní ọrùn, ó wí pé, "San gbèsè tí o jẹ mí lójú ẹsẹ̀." Ọmọ ọ̀dọ̀ ẹlẹgbẹ́ rẹ̀ náà sì wólẹ̀ lórí eékún níwájú rẹ̀, ò ń bẹ̀ ẹ́ pé, "Mú sùúrù fún mi, èmi yóò sì san án fún ọ." Ṣùgbọ́n òun kọ̀ fún un. Ó pàṣẹ kí a mú ọkùnrin náà, kí a sì jù ú sínú túbú títí tí yóò fi san gbèsè náà tán pátápátá. Nígbà tí àwọn ìránṣẹ́ ẹlẹgbẹ́ rẹ̀ rí ohun tí ó ṣẹlẹ̀, inú bí wọn gidigidi, wọ́n lọ láti lọ sọ fún olúwa wọn, gbogbo ohun tí ó ṣẹlẹ̀. Nígbà tí olúwa rẹ̀ pè ọmọ ọ̀dọ̀ náà wọlé, ó wí fún un pé, "Ìwọ ọmọ ọ̀dọ̀ búburú, níhìn-ín ni mo ti dárí gbogbo gbèsè rẹ jì ọ́ nítorí tí ìwọ bẹ̀ mi. Kò ha ṣe ẹ̀tọ́ fún ọ láti ṣàánú fún àwọn ẹlòmíràn, gẹ́gẹ́ bí èmi náà ti ṣàánú fún ọ?” (Matt. 18:23–33)

Gbogbo wa ni ìgbàgbé lè ṣẹlẹ̀ sí. A lè gbàgbé ìwọ̀n ìfẹ́ àti àánú ńlá tí a ti fi hàn sí wa. A lè gbàgbé wípé kò sí bí a ṣe le l'ẹ̀tọ́ sí àwọn ohun tí ó dára jùlọ nínú ayé wa; wọ́n jẹ́ tiwa nípa ore-ọ̀fẹ́ nìkan. Ibi tí ìṣòro wà l'èyí: ìwọ̀n bí a bá se gbàgbé ore-ọ̀fẹ́ tí a ti fi hàn wá, ìwọ̀n náà ni a máa kọ̀ láti fi ore-ọ̀fẹ́ hàn sí ẹlòmíràn. Ìwọ̀n bí a bá se gbàgbé ìdáríjí tí a rí gbà, ìwọ̀n náà ni a máa kọ̀ láti dáríjì ẹlòmíràn ní àgbègbè wa. Bí o bá kọ̀ láti ní ọkàn ọpẹ́ nítorí ìfẹ́ tí a rí gbà l'ọ̀fẹ́, bẹ́ẹ̀ ni yíò ṣe nira láti dáríjì ẹlòmíràn bí ó ti yẹ.

L'òtítọ́ ni wípé kò sí ẹni tí ọ̀rọ̀ ore-ọ̀fẹ́ yé tí ó sì fifún ni tó ẹni tí ó mọ̀ wípé òun nílò rẹ̀ tikalararẹ, àti wípé a ti pèsè rẹ̀ lẹkunrẹrẹ láti ọwọ Ọlọ́run àánú. Ó fún ohun tí òun kò lè rí gbà; kí lódé nígbà náà, tí a fi kẹ̀hìn sí àwọn ẹlòmíràn títí di ìgbà tí wọ́n bá kún òṣùwọ̀n tí a gbé kalẹ̀? Ìpè láti dáríjì ṣí ojú wa sí ìní àwa náà fún ìdáríjí. Ìpè sí ore-ọ̀fẹ́ fi hàn bi àwa náà ṣe nílò ore-ọ̀fẹ́. Ìpè sí ìdáríjí jẹ́ ìpè sí ìrántí àti láti dúpẹ́. Nígbà tí o bá rántí bí ìwọ náà ti kùnà, wà á láàánú àwọn ẹlòmíràn tí wọ́n kùnà náà, wà á sì fẹ́ fún wọn ní ore-ọ̀fẹ́ tí ó jẹ́ ìrètí re nìkan. Kí Ọlọ́run fún wa ní ore-ọ̀fẹ́ láti rántí ati ìyọ̀nda láti fún àwọn ẹlòmíràn ní ǹkan tí àwa náà ti rí gbà.