Soma Biblia Kila Siku 06/2024Mfano

Anayestahili kupokea sifa na utukufu ni Mungu peke yake. Lakini mara nyingi tumekuwa tukiangalia tunachoweza kukipatasisi, badala ya kutafuta kumpa Mungu zile sifa anazostahili. Kwa namna hiyo tunashindwa kama Gehazi. Nabii Elisha alikataa kupokea zawadi yoyote,akasema, Kama Bwana aishivyo, ambaye nimesimama mbele yake, sipokei kitu. Akamshurutisha apokee; lakini akakataa(m.16). Ni alama ya kweli ya mtu wa Mungu kwamba hayuko kwa ajili ya kutafuta masilahi yake, bali hutafuta ustawi wa wengine. Kwa mfano, ndivyo alivyoishi Paulo. Alipoagana na Wakristo huko Mileto alisema,Sikutamani fedha wala dhahabu, wala mavazi ya mtu. Ninyi wenyewe mnajua ya kuwa mikono yangu hii imetumika kwa mahitaji yangu na ya wale waliokuwa pamoja nami. Katika mambo yote nimewaonyesha ya kuwa kwa kushika kazi hivi imewapasa kuwasaidia wanyonge, na kuyakumbuka maneno ya Bwana Yesu, jinsi alivyosema mwenyewe, Ni heri kutoa kuliko kupokea(Mdo 20:33-35). Hebu tuishi ili watu wauone utukufu wa Mungu na kumwamini yeye pekee.