The Chosen - Voafidy ho tonga FahagaganaSantionany

Andro faha-8 - Manaraha Ahy !

Raha ny fitadidiako hatrizay dia efa nifamatotra foana tamin’ny tontolo ambanivohitra ny fiainako, indrindra ny tanimboaloboka. Ny raiko koa mantsy dia tompon’iray amin'ireo tanimboaloboka malaza indrindra ary ny divainay dia noheverina ho iray amin'ireo tsara indrindra tao amin'ny faritra nisy anay.

Niaraka tamin’i Tomasy aho tamin’io takariva malaza nahalany ny divay rehetra tamin’ny fampakaram-bady tao Kana io. Ary izaho ihany koa no vavolombelon’ny fahagagana nataon’i Jesosy tamin’io andro io. Tsy azoko nolavina izay hitan’ny masoko! Niantso an’i Tomasy hanaraka azy i Jesosy. Dia niantso Ahy indray Izy. Izay rehetra tato anatiko dia nilaza tamiko fa mila manao an'io dingana io aho.

Ahoana anefa no ilazako izany amin’ny raiko? Niantehitra taminay avokoa ny raharaham-pianakaviana rehetra. Ny fanarahana an’i Jesosy anefa dia midika fa handao ny orinasanay, ny asanay, ary ny nofinofy sy ny faniriana napetraky ny raiko taminay izahay.

Teny an-dalana mody dia tsapako fa tena nanery ahy ny foko isaky ny mieritreritra ny fomba hanazavako izany aminy. Somary mafy loha izay mantsy ny raiko, ary izany no nahatonga ahy natahotra kely ny mety ho fihetsiny. Koa rehefa notantarainay taminy ny zava-nitranga sy ny fanapahan-kevitray hanaraka an’i Jesosy, dia tezitra mafy ny raiko, araka ny efa nampoizinay. Naharitra ela ny adihevitray, ary tsy maintsy nihaino sy niaritra fanehoan-kevitra ratsy marobe izahay.

Nohon’ny tsapany fa efa tapaka ny hevitray, dia nifanaraka taminy izahay fa hiaraka aminay mandritra ny dianay izy, satria te hiresaka amin’i Jesosy ihany koa hono izy. Mety azonao an-tsaina angamba fa tena tsy mora ilay dia: tsapa tokoa ny fahasorenany.

Rehefa afaka andro maromaro, dia tonga teo amin’ilay toerana hitsenanay an’i Jesosy ihany izahay. Niresaka taminy ny raiko, ary sambany tao anatin’ny taona maro aho no nahita azy nitomany. Talohan’ny nandehanany dia nanoroka anay sy Tomasy fotsiny izy. Tena tsy zakako ny mieritreritra ny handratra ny fon’ny raiko!

Tsy fanapahan-kevitra mora ny fanarahana an’i Jesosy saingy fantatro fa niantso ahy Izy, ary tsy misy zava-dehibe kokoa noho ny fanarahana Azy. Ny ho mpianatr’i Jesosy dia fahasoavana mihoatra lavitra noho ny zava-tsarotra rehetra! ( Matio 19:29 ).

Rama no anarako, ary Jesosy no nifidy ahy.

PS : Ry namako, ianao ihany koa dia mety nisedra fanilikilihana na fanoherana avy amin’ny fianakaviana sy ny namana noho ny fanapahan-kevitrao ny hanara-dia an’I Jesosy. Haiko fa mafy be izany, fa tsy misy azo anoharana ny sitrapon’Andriamanitra amin’ny fiainanao ! Raha toa ianao ka mandalo fisedrana toy izany ankehitriny, dia te hampahatsiahy anao aho fa tsy irery ianao : mitoetra eo akaikinao manoro làlana ho anao Andriamanitra, mampionina anao Izy ary mampahery anao. Manasa anao aho hanontany vaovao amin’ireo fianakavianao sy ireo namanao ireo ary ny haneho azy ireo ny Fitiavan’Andriamanitra amin’ny fomba miavaka kely.

Voafidy ho tonga Fahagagana ianao !

Christian Misch