The Chosen - Voafidy ho tonga FahagaganaSantionany

Andro faha-10 - Mitsangana, ary mandehana!

Tsy haiko na mitovy amiko ianao, fa raha izaho manokana dia tsy mbola nahita fahagagana mahatalanjona noho ilay nataon'i Jesosy an'ilay boka iny aho. Hitako maso ny fanasitranana an'ilay habokana teo no eo.

Tamin'izay fotoana izay dia ny zavatra voalohany tonga tato an-tsaiko dia ny hoe, raha toa ka vitan'i Jesosy ny manasitrana an'ilay lehilahy boka, dia vitany ihany koa izany ny manasitrana ny aretina paralysisa! Tsy tanako ela intsony ny fientakentanako ka dia lasa aho nihazakazaka namonjy ny namako izay nararin'ny paralysisa hatramin'ny fahazazany. Ary nitantara azy ireo zava-drehetra hitan'ny masoko aho.

Tamin'ny voalohany dia somary nisalasala ihany ilay namako, fa rehefa avy nandresy lahatra azy ny hijery an'i Jesosy aho, dia niainga hakany afovoan-tanàna izahay niaraka tamin'ny namanay anakin-telo izay nanampy anay hibata azy teo amin'ny fandriany.

Mora kely ny nahita an'i Jesosy. Feno vahoaka nitangorona be teo alohan'ny trano iray izay nampianariny. Koa satria nifaneritery be ny olona dia tsy hitanay hoe ahoana ny hatao hanatonana Azy miaraka amin'ity fandriana izay entinay ity. Teo no nitsiry ny hevitra ny handeha hampidina azy amin'ny tafon-trano. Nisy tovovavy tsara fanahy mpanara-dia an'i Jesosy izay nanoro anay lalàna sy nanampy anay tamin'izany.

Tsy maintsy niakatra teny ambony indrindra izahay ary tsy maintsy novakianay kely ny tafon'ilay trano mba hahafahanay hampidina ny namanay mararin'ny paralysisa amin'ny tady mahazaka. Niteny tamin'ny anaran'ny namako tamin'i Jesosy aho ary nangataka Azy haneho fahagagana amin'ny fiainany.

Izao no tenin’i Jesosy: “Anaka, voavela ny helokao”. ( Marka 2:5 ) Niaiky tamiko ilay namako tatỳ aoriana fa nidobodoboka be ny fony rehefa nandre an’i Jesosy nilaza izany izy. Tsapany tokoa ny vesatry ny fahotany izay nampahory azy fatratra nanjavona tamin'io fotoana io. Fotoanan'ny fahafahana tokoa iny fotoana iny!

Fa tsy izay ihany, fa mbola notohizan'i Jesosy ny teniny nanao hoe: Fa mba ho fantatrareo fa ny Zanak’olona manana fahefana etỳ ambonin’ny tany hamela heloka, dia lazaiko aminao (hoy Izy tamin’ilay mararin’ny paralysisa): Mitsangàna, betao ny fandrianao, ka modia any an-tranonao.(Marka 2:11)

Nanomboka afaka nihetsika tsikelikely ny tongony. Kelikely teo dia nipetraka indray izy, nanomboka nanao dingana tsikelikely tao anatin'ny tabataba sy fahatalanjonan'ny olona. Tsy nety nino ny masoko nefa dia tena zava-nisy tokoa ny nitranga teo. Voalohany nandeha teo amin'ny fiainany ny namako: nisy Fahagagana niseho teo!

Niova tanteraka ny fiainanay.

Tamara no anarako, ary ny namako nararin'ny paralysisa sy izaho, dia samy nofidin'i Jesosy.

PS : Ry namako, sarobidy be mihitsy izany fananana namana mivavaka sy tonga manampy anao izany ! Anio, dia maniry indrindra aho ho ilay namana izay hivavaka ho anao. Mamelà ahy hanonona izao tonom-bavaka izao: “Tompo ô, mivavaka ho an’ity namako malalako ity aho, ny mba hanehoanao fahagagana amin’ny fiainany, sy ny mba hanampianao azy amin’ireo fisedrana izay lalovany. Raha misy fahotana manakatsakana azy, aoka izy hiaina ny Fahafahana izay efa natolotrao ho azy, ka afaka hanompo Anao an-kahalalahana. Aoka hisandratra eo amin’ny fiainanany ny Anaranao! Amin’ny anaran’I Jesosy, amena.” Afaka ny ho ilay namana mpitondra am-bavaka ho an’ireo olona akaiky anao ihany koa ve ianao?

Voafidy ho tonga Fahagagana ianao !

Christian Misch