The Chosen - Voafidy ho tonga FahagaganaSantionany

Andro faha-11- Amin’ny Fanahy sy amin’ny fahamarinana.

Ny nofinofiko hatrizay dia ny hanambady lehilahy tsara tarehy sy tonga lafatra, lehilahy izay tenatia ahy sy afaka hanorenako fianakaviana araky ny fitsipik’i Jehovah, izay nosoratany ho antsika ao amin’ny bokin’ny lalàna.

Indrisy anefa fa tsy araky ny nantenaiko ny zavatra niainako tao anatin’ny fanambadiana. Satria indraindray diso tia tena loatra sy tsy nitady an’ Andriamanitra ireo vadiko ary indraindray dia noho ny antony avy amiko manokana sy ny tsy fahatokisan-tenako. Ny tena marina dia tsy nisy nahomby ny fanambadiako dimy ary nisy fiantraikany tamin’ny finoako izany.

Nataon’ ireo vehivavy mpiara-monina ahy tsinotsinona aho noho ny amin’ny tantaram-pitiavako, ary tsy nety niaraka tamiko izy ireo rehefa mankany amin’ny fantsakana rano vao maraina. Tsy maintsy mandeha irery amin’ny andro atoandro aho, rehefa tsy misy olona te handeha intsony nohon’ny hafanana be.

Tsy manam-pahaizana momba ny Soratra Masina mihintsy aho fa ny foko kosa dia nitady an’Andriamanitra foana.Na izany aza dia nandalo sakatsakana maro aho teo amin’ny fiainako izay tsy nahafahako nanakaiky Azy.Manontany tena matetika aho hoe: Inona no tokony hataoko? Aiza ny toerana hivavahako: amin’ny maha Samaritana ahy dia tsy afaka miditra ny Tempoly ao Jerosalema ve aho? Inona ny Sitrapony momba fiainako?

Indray andro, rehefa nandeha irery tany amin’ny fantsakana aho dia nahita Azy. Eny, niandry ahy teo Jesosy avy any Nazareta. Nieritreritra aho aloha fa amin’ny maha-mpaminany Azy dia te-hanala baraka ahy sy hanameloka ahy noho ny fahotako Izy, saingy tamin’ny farany dia tsapako fa tsy toy izany mihitsy Izy. Raha ny marina dia Izy no Mesia ary tonga teto amin'ny ity fantsakana ity Izy tamin'ny ora mafana indrindra mba hihaona amiko sy haneho ny tenany amiko.

Mety misy fifandisoana angamba. Nahoana no Izaho ? Niteny ho azy ny Masony : Mahafantatra tsara ny momba ahy Izy kanefa tsy mba nanilikilika ahy.Nilaza tamiko mihitsy aza izy fa afaka manana fifandraisana marina amin’Andriamanitra aho, lalindalina kokoa noho ny resaka toerana sy fombafomba satria ny tena tadiavin’Andriamanitra dia ny fifandraisana Aminy amin’ny Fanahy sy Fahamarinana. (Jaona 4 :20-26)

Mbola tsy nahita fifaliana toy izao ny foko hatrizay. Tsy vitako ny tsy hizara ny fifaliako sy ny faniriako hiresaka momba an’i Jesosy amin’ny olona rehetra : izay no antony nilazako izany tamin’ny olona rehetra teo an-tanàna. Tsy toy ny taloha intsony ny fiainako nanomboka teo.

Potina ny anarako ary nosafidin’i Jesosy aho.

PS : Ry namako, maniry ny hihaona aminao isan’andro Jesosy ary te-haneho ny tenany aminao misimisy kokoa hatrany hatrany Izy. N’inona n’inona lazain’ny olona sy eritreretin’ny olona mikasika anao : mahafantatra anao amin’ny antsipiriany Izy nefa dia mandray anao sy tia anao amin’ny maha-ianao anao. Tongava eo anatrehany anio, ary avelao ny fifialiana izay ateraky ny Fanatrehany hameno ny fiainanao ka hanosika anao hahavita ireo asa izay efa nomaniny ho anao androany. Toa ny ahoana indray ary ny fomba mety atao mba hitahianao ny hafa anio ?

Voafidy ho tonga Fahagagana ianao !

Christian Misch