The Chosen - Voafidy ho tonga FahagaganaSantionany

Andro faha-16- Efa tonga aho!

Mbola tsy nahita an’i Jese rahalahiko nandeha aho hatramin’izay. Hatramin’ny fahazazako, ny anjarako dia ny nanampy azy amin’izay rehetra ataonay, satria nohon’ny voina izay nahazo azy talohan’ny nahaterahako dia tsy afaka nihetsika izy.

Tao anatin’izay anefa, nandalo teny ny taona, raha nahita ny tsy rariny nataon’ireo Romana ireo Jiosy aho, dia tsy maintsy nandray fanapahankevitra izay sarotra indrindra teo amin’ny fiainako: nandao ny rahalahiko aho mba hiaraka amin’ireo rahalahy ao amin’ny Zelota.

Sarotra ho ahy na dia ny hanao veloma azy ary, nametraka taratasy ho azy aho izay mifandraika amin’ny faminaniana voasoratara ao amin’ny bokin’i Zefania 3 :20 manao hoe : « Jese, rahatrizay afaka mandeha indray ianao dia fantatro fa efa tonga ny Mesia. Eo ampiandrasana izany, dia avelao aho handeha hiady ho an’ny fahafahan’ny Ziona , mba hiseho izany andro izany. »

Nahazo fiofanana ara-miaramila mafy orina aho niaraka tamin’ireo Zelota izay nahatonga ahy ho tena manampahaizana manokana amin’ny ady miendrika tolona.Rehefa avy niofana nandritra ny taona maro aho, dia nasaina nanao iraka: ny hamono ny iray amin’ireo manam-pahefana ambony Romana, izay mpitsara atao hoe Rufus, izay nonina tany Jerosalema.

Nandritra ny herinandro maro no nanaovanay ny planina rehetra hiatrehana io fanafihana io; ary tamin’ny andro izay handeha hanatanterahana izany dia tsy maintsy nandalo teo amin’ny farihin’ny Betesda aho. Mbola tsy tany amin’io toerana io raha tsy tamin’ny andro izay namangiako ny rahalahiko , noho ny tantaran’io toerana io izay tena feno fanompoan-tsampy dia tsy nahazo nivezivezy teny ny Zelota.Tsy maintsy anefa aho nanao veloma azy, satria tsy fantatro izay zavatra mety hahazo ahy any ampanaovana iraka.

Vaky ny foko teo ampahitana azy. Afaka niresaka kely ihany izahay. Rehefa avy nanao veloma azy aho, dia niverina nifantoka tamin’ilay iraka hataoko. Namita ny fikarakarana farany izahay ary nanomboka izany tamin’ny ora voatondro. Tamin’ny fotoana iny indrindra aho saika handeha hamono ilay mpitsara, nitsipalotra ny masoko, ka hitako tampoka Jese rahalahiko: nandeha izy ary nibata ny fandriany.

Noheveriko fa tao anatin'ny nofy aho, tena marina izay nitranga ka toa tsy tompon’ny tenako aho. Variana ny amin’ny zavatra hitako aho dia nanaraka azy, nanatona azy ary niantso azy. Dia nifampijery izahay, niara-nitomany ary nifamihina. Tanteraka ilay faminaniana! Teo ny Mesia, ary Izy no nahasitrana azy! Tsy maintsy nihaona taminy aho na inona na inona

Narahiko ilay lalana izay natoron’i Jese ahy mandra pahitako an’i Jesosy…ary nanomboka teo dia tsy nitovy tamin’ny teo aloha intsony ny fiainako.

Izaho no Simona Zelota, ary nofidian’i Jesosy aho.

PS : Ry namako, fantatr’Andriamanitra tsara izay tokony aseho anao, oviana no aseho ary ny fomba anehoana izany. Marina ny Fotoanany, tsy tara Izy ary hainy ny mitarika ireo izay mihaino tsara ny feony. Araraoty ny fotoana anio hiainoana tsara izay tian’Andriamanitra tenenina aminao.

Voafidy ho tonga Fahagagana ianao!

Christian Misch