The Chosen - Voafidy ho tonga FahagaganaSantionany

Andro faha 19 - Avia ary amboary ny Fanjakako

Tsy nanampo mihitsy aho hoe hihaona amin’ny Mesia any amin’ny toeram-piasako. Mpanamboatra vato aho ary nokaramaina hiasa tao amin'ny faritr'i Betesda. Asam-panjakana tsotra ilay izy, fa araka ny hitiavako milaza azy, dia asa avokoa ny asa rehetra !

Nanana fahafahana nihaona tamin’ny mpandrafitra iray izay nokaramaina tamin’io asa io koa aho tany: Jesosy avy any Nazareta. Tsy toy ny mpiasa rehetra i Jesosy ary somary nanaitra ahy izany. Nampianatra Izy, ary teo ampihainoina Azy niteny aho dia nahita hery sy fahefana avy tao Aminy, izay mbola tsy tsapako hatrizay.

Mbola tsaroako ilay fotoana nanasan’i Jesosy ahy hanaraka Azy. Nilaza tamiko Izy tamin’izany andro izany fa manorina Fanjakana mandrakizay Izy, izay maharitra kokoa noho ny vatolampy, ary tiany ho anisan’ny mpianany aho. Nisy zavatra nirehitra lalina tao anatiko: Fantatro fa Izy no Mesia, ka dia nanaiky ny fanasany aho. Tombontsoa lehibe ho ahy tokoa izany!

Mbola tsy nofidiana hanao zavatra manokana mihitsy aho taloha. Olona tsotra be aho. Raha ny marina dia tiako ny milaza fa tsotra noho ny vato aho (angamba izay no nahatonga ahy nanapa-kevitra ny ho lasa mpanao vato), ka tsy haiko ny fomba hanehoana ny hahalehibiazan’izany fahafahana manaraka Azy izany ho ahy.

Tsy vitan’ny hoe nanova ny fiainako izany, fa ny an’ny olona maro hafa koa, anisan’izany i Jakoba namako, zanak’i Halfeo. Tena miavaka ny tantarany, hany ka azo lazaina hoe “fifandraisana avy amin’Andriamanitra” mihitsy aza. Rehefa avy niresaka tamin’ny fianakaviany izy, dia nanapa-kevitra ny hanatevin-daharana ireo feo 288 mandrafitra ny antoko mpihira ao amin’ny Tempolin’i Jerosalema. Araka ny azonao eritreretina dia tena mahay mihira ilay namako.

Raha teny an-dalana ho any Jerosalema izy, dia nifanena taminy izahay. Ny dianay sy Jesosy tamin’io andro io dia ny ho any Kapernaomy mba hankalaza ny Sabata miaraka amin’i Maria, naman’i Jesosy, izay avy any Magdalena. Nony nahita azy aho dia nifamihina izahay mba ho mariky ny fifampiarahabana fa efa ela izay no tsy nifankahitanay. Teo no nilazako azy fa nahita ny Mesia aho, ary nahampahafantariko azy i Jesosy.

Liana tamin’ny teniko izy, ka nanapa-kevitra ny hiaraka taminay tany Kapernaomy mba hianatra bebe kokoa momba an’i Jesosy. Tsy nila niandry ela akory lasa iray tamin’ireo mpianatra koa izy. Tena tombontsoa lehibe ho ahy ny fahafahako manompo ny Mesia miaraka amin’ilay namako izay tena tiako.

Tadeo no anarako, ary izaho sy i Jakoba namako dia samy nofidin’i Jesosy.

PS: Ry namako, ianao ihany koa ve anisan’ireo mieritreritra fa tsotra loatra ny fiainanao na mahatsapa fa tsy misy dikany loatra ny fisianao? Raha ny marina dia sarobidy eo imason’Andriamanitra ianao, ary manana planina amin'ny fiainanao Izy. Tsarovy ny lazain’ny Baiboly : « fa ny adala amin'izao tontolo izao no nofidin'Andriamanitra hampahamenatra ny hendry; ary ny malemy amin'izao tontolo izao no nofidin'Andriamanitra hampahamenatra ny mahery » (1 Korintiana 1 :27). Voafidy ianao hamirapiratan’ny Fahazavany amin’ny alalanao ! Mampahery anao aho hizara ny Fahazavany anio ary hiresaka ny amin’i Jesosy amin’ny namanao sy ny fianakavianao, tahaka ny nataon’i Jesosy. Maro tokoa ireo « Jakoba » izay miandry ny fanasanao any !

Voafidy ho tonga Fahagagana ianao!

Christian Misch