The Chosen - Voafidy ho tonga FahagaganaSantionany

Andro faha-22_Mamela anao Aho

Toa ny efa notantaraiko taminao dia niova tanteraka ny fiainako tao aorian'ny nihaonako tamin'i Jesosy. Tsapako niala tamiko ilay haizina nangeja ahy. Nanomboka tamin'izay dia tonga fomba fiainako vaovao ny fanarahana an'i Jesosy. Niaina tao anaty fahasambarana tokoa aho.

Na dia izany aza dia mbola nisy tahotra ihany nanaraka ahy teny. Isaky ny mahita miaramila raomanina aho dia mahatsiaro ireo fanararaotana nihatra tamiko taloha ary matahotra aho sao hiverina indray ireny. Nisy ady tato anatiko ny mbola hijanona ny ho ho tony sy hahatoky an'i Jesosy ihany.

Fa ny tena nampihori-koditra ahy indrindra dia ilay fotoana nihaonanay tamin'ny olona iray izay voafatotry ny demony. Jesosy dia nanasitrana sy nanafaka olona maro tokoa (Matio 4:24), fa tamin'ity indray mandeha ity dia henoko navesatra manodidina ahy ny herin'ny haizina izay nangeja ahy taloha. Fahatsiarovana ratsy ho ahy mihitsy izany. Niditra tsikelikely ny fanahiana ary naka toerana mihitsy avy eo: Ary raha mbola miverina indray iny fiainana feno haizina niainako iny?

Nandalo tao an-tsaiko ny eritreritra fa mety nofinofy fotsiny ireny fahagagana nataon'i Jesosy tamiko ireny. Nisesisesy ny eritreritra ratsy tato an-tsaiko toy ny hoe: "Iza no fitahiko? Dia tena nieritreritra tokoa ve aho fa vehivavy nanana lasa toa ahy izao dia afaka ny hanaraka ny Mesia? Tsy misy dikany akory ny zavatra ataoko satria na ho ela na ho aingana dia hiverina any amin'ny haizina indray aho ary hanalabaraka ny Tompo!"

Nahatsapa korontana be indray aho ary nila tsy ho zakako intsony ilay izy. Ka dia nandeha tany amin'ilay toerana fantatro tsara aho dia ny fiainako taloha tany Kapernaomy ary tsy nilaza an'izany na tamin'iza na tamin'iza aho. Tsy haiko intsony izay zavatra nataoko: namatotra ahy ny tahotra sy ahiahy. Tsy nahatsapa ny ho mendrika ny hanaraka an'i Jesosy intsony aho.

Hora vitsy taty aoriana dia hitan'i Petera sy Matio aho. Nampalahelo be ny toerana nisy ahy nefa dia niandry ahy izy roa lahy ary nandresy lahatra ahy ny hiverina any an-dasy hiaraka aminy. Menatra be aho hoe nandositra dia niverina tamin'ny fiainako taloha indray. Tsy haiko intsony hoe ahoana indray ny fomba hijoroako eo anatrehan'i Jesosy: Navositro tanteraka Izy.

Nangoniko ihany ny hery ary nanatona Azy aho ary nifona taminy. Feno fanahiana be tato anatiko ary tena nieritreritra aho fa tsy mendrika tokoa. Nankahery sy nampionina ahy ny Teniny fa mbola kivy tamin'ny tenako ihany nefa aho. Farany dia noteneniny ihany ilay tena notadiaviko: "Mamela anao Aho". Izay ihany! Nanomboka nitomany teo an-tratrany aho. Tsapako sy reko tato anatiko ny famelan-keloka izay natolony ahy.

Noho ilay Fitiavany mahagaga dia tafarina indray ny fiainako ary tsy mamela ny laingan'ny haizina ahazo ahy intsony aho. Ankehitriny, fantatro fa tsy mitovy amin'ny teo aloha intsony aho fa efa tonga olom-baovao; efa lasa ny zavatra taloha, indreo, efa tonga vaovao ireo. (2 Korintiana 5:17)

Maria Magdalena no anarako, ary na dia be aza ny fahadisoako, dia nofidian'i Jesosy aho.

PS: Ry namako, mety efa lavo ihany koa ianao ary nitodika an'Andriamanitra avy eo fa menatra Azy? Tadidio anefa fa Izy dia tsy mba menatra anao izany. Misokatra handray anao ny Tanany mba hamela anao sy hanarina indray ny fiainanao. Raha toa ka mahatsapa voaheloka sy voaendrikendrika ianao dia tongava fotsiny any amin'i Jesosy dia hanavao ny fiainanao indray Izy ary hamela ny helokao. Ary raha toa ka misy olon-kafa meloka taminao, dia mamelà azy ihany koa. Anio no andro tsara indrindra hanaovana izany.