The Chosen - Voafidy ho tonga FahagaganaSantionany

Andro faha-23_Manao fahagagana Aho

Raha toa ka mila faritana amin'ny teny iray izany fahatsapako izany dia ny teny hoe "Sambatra" no ampy ilazana azy.

Hatramin'ilay andro nitenenan'ilay anjely ahy fa voatahy manokana hitondra ny zanak'Andriamanitra aho dia feno fifaliana hatrany fa afaka manompo an'Andriamanitra amin'ny planiny hanavotany an'izao tontolo izao. Tadidiko foana ilay hira nivoaka ny vavako tamin'ny fotoana nihaonako tamin'i Elizabeta havako:

"Ny foko mankalaza ny Tompo, Ary ny fanahiko efa ravoravo tamin’Andriamanitra, Mpamonjy ahy; Fa efa nijery ny fahambani-toetry ny ankizivaviny Izy. Fa, indro, hatramin’ny ankehitriny dia hataon’ny taranaka rehetra ho sambatra aho. Fa ny Mahery efa nanao zavatra lehibe tamiko; Ary masina ny anarany." (Lioka 6:46-49)

Na dia tsy mora foana aza dia sarobidy sy nahagaga tokoa ny niaina niaraka tamin'i Jesosy sy nahita Azy nitombo! Mazava ho azy fa nisy zavatra hafa kely teo Aminy, na dia hatramin'ny fahakeliny aza, toa tamin'ity fotoana iray izay nijanonany iray andro tao amin'ny tempoly niresaka tamin'ireo mpahay lalàna ity. Variana tamin'ny fahendrena izay nananany tamin'ny taonany mihisy ireto mpampianatra ireto!

Fa ny tena nikasika ahy dia ny fony. Na dia amin'ny maha-Mesia Azy aza, ilay Mpamonjy nandrasana fatratra, dia nataony laharam-pahamehana ny hitahy olona maro be hatrany.

Nahita Azy nanasitrana, nampionona, nanafaka sy nitahy olona aman'arivony ary nanao fahagagana mahavarina toa ny nanovany ny rano ho divay tamin'ny fampakaram-bady tao Kana aho.

Fotoana niavaka mihitsy iny fampakaram-bady iny! Tsy mbola tonga ny fotoanan'i Jesosy, nefa na dia izany aza dia nanampy an'ity fianakaviana ity tamin'ny alalan'ny Fahagagana izay nikasika olona betsaka Izy rehefa avy nampahafantariko ny zava-niseho.

Marina fa efa lehibe Izy izao ary tsy mila ahy intsony tahaka tamin'Izy mbola kely , anefa mbola maneho ahy hatrany Izy fa tia ahy ary tena mahatsiaro sambatra aho isak'izay misy fotoana ahafahako manompo Azy.

Maria no anarako ary nofidian'Andriamanitra aho.

PS: Ianao ihany koa dia notahiana manokana sy manana anjara hanompo an'i Jesosy amin'ny fiainanao tahaka an'i Maria. Manasa anao aho androany handray fanapahan-kevitra hanaraka an'iJesosy ary hanome ny tsara indrindra avy aminao hankalazana ny Anarany satria Izy tokoa no ivon'izao rehetra izao.

Voafidy ho tonga Fahagagana ianao!

Christian Misch