The Chosen - Voafidy ho tonga FahagaganaSantionany

Andro 1 : Niantso anao tamin’ny anaranao aho !

Iza ny anaranao ? Io no anisan’ny fanontaniana voalohany sy tsotra apetraka amintsika. Raha ho ahy anefa dia fanontaniana somary sarotra ho ahy foana io.

Raha ny marina dia i Lili no anarana hafantaran’ny rehetra ahy fa ny tena anarako izay notazomiko ho tsiambaratelo dia i Maria. Eny, Maria, avy any Magdala, tanàna kely eo amoron’ny farihin’i Genesareta

Tsy ny anarako ihany anefa no sarotra teo amin’ny fiainako. Manana fahatsiarovana maro manjavonjavo aho izay hahatsapako fa tsy izaho no mifehy ny fiainako fa ny herin’ny maizina izay nanjaka tato anatiko ary nampatahotra ny manodidina ahy mihitsy izany.

Nandritry ny taona maro aho no niady nanohitra ireo herin’ny maizina ireo, saingy tonga tamin’ny fotoana iray izay tsy nahazakako izany irery intsony aho. Very fanantenana tanteraka aho ary naniry ny hampitsahatra mandrakizay izany fanaintainako izany.

Tamin’izay fotoana izay indrindra no nahitako Azy voalohany. Nanantona ahy Jesosy. Nisy zavatra hitako fa mampiavaka Azy manokana. Saingy izaho moa efa tao anaty fisalasalana dia aleoko nitodika tsy nijery Azy. Rehefa lasa aho dia nandre Azy niantso tamin’ny anarako hoe : « Maria Magdalena » :

« Izao no lazain'i Jehovah, Izay nahary anao sady namorona anao, ry Isiraely ô: Aza matahotra ianao, fa efa nanavotra anao Aho; Efa niantso ny anaranao Aho, Ahy ianao ! » (nalaina tao amin’Isaia 43 :1)

Nitanisa ahy io andian-tsoratra masina io foana ny raiko fony aho mbola kely. Rehefa nilaza izany tamiko anefa Jesosy dia toy ny hoe velona indray izy ary Andriamanitra mihitsy no miresaka amiko. Ary rehefa namihina ahy Izy dia nahatsapa mihitsy aho hoe niala teo amin’ny fiainako ny herin’ny maizina. Lasa ny tahotra sy ny fisalasalana ary tonga naka toerana kosa ny fiadanana sy ny fankasitrahana.

Fantatro ankehitriny fa zanak’Andriamanitra aho ary mahafantatra ahy amin’ny ny anarako Izy.

Maria Magdalena no anarako ary izaho dia nofidin’i Jesosy.

PS : Ry namako, mety misy fotoana ihany koa ianao eo amin’ny fiainanao mahatsapa fa toa adinon’ny olona, manjavozavo ny fiainana, very anaty haizina ny fanantenana toy i Maria. Fa amin’ireny fotoana ireny, dia izao no tsarovy : Mahafantatra anao amin’ny anaranao Andriamanitra – Azy ianao ! Eo anilanao Izy, ka tsy tokony hatahotra mihitsy ianao. Tonga teto amin’ny maizina Jesosy hitondra ny Fahazavany, ary ny Fahazavany dia mandresy ny fahamaizinana. Aoka ianao ho feno ny Fahazavany anio, ary zarao amin’ny manodidina anao izany.

Voafidy ho tonga fahagagana ianao!

Christian Misch

Raha maniry ny hahazo fampaherezana isan’andro ianao, dia manasa anao aho hisoratra anarana ao amin’ny Fahagagana isan’andro.

Eric Célérier