The Chosen - Voafidy ho tonga FahagaganaSantionany

Andro faha-3 : Alatsaho ny haratonao !

Nandritry ny fiainako dia olona mafy loha no nahafantarana ahy , ary marina izany , tsy azoko lavina. Niteraka olana ho ahy foana izany toetrako izany ary fanapahan-kevitra ratsy sy diso foana no noraisiko matetika.

Tena latsaka ambany ny finoako talohan’ny nihaonako tamin’i Jesosy. Heveriko fa rehefa niandry ela loatra ny Mesia aho dia lasa very fanantenana ary nanalavitra bebe kokoa ny finoako.

Niloka aho, niady aho mba hahazoana vola,. Nandeha niasa nanjono tamin’ny andro Sabata mihintsy aza aho ! Nahakivy tanteraka ny toe-javatra niainako, be loatra ny trosako…ary tena tsy hitako intsony izay hatao.

Tsy ho adinoko mandrakizay ilay alina iray izay nandehanako nivoaka mba handeha hanao ilay zavatra iray tena haiko : manjono. Nanantena hahazo trondro be dia be aho mba hahafahako mandoha ampahany amin’ny trosako, ka mba tsy hampigadra ahy. Saingy tamin’io alina io dia tsy nahazo na inona na inona aho.

Niaraka tamiko koa i Andrea rahalahiko sy ny zanak’i Zebedio tamin’io,nefa tsy nahazo na inona na inona izahay na dia trondro iray aza. Tsy hitako intsony izay natao. Very hevitra tanteraka, kivy, reraka aho…

Niova anefa ny zava-drehetra rehefa tonga teo amoron-dranomasina izahay. Teo no nahitako Azy voaloahany - Jesosy nampianatra ny vahoaka teo amoron-drano. Nanontany ahy Izy raha afaka mampiasa ny samboko mba hahafahan’ ny olona mandre azy tsara. Raha ny heriko tamin’io fotoana io dia nandà ny fangatahany aho. Kanefa tsy nitsahatra niresaka ahy momba an’io lehilahy io Andrea rahalahiko ary ny marina koa misy zavatra manintona ahy manokana tamin’ny fijeriny ka dia nanaiky aho.

Raha vao tafiakatra teo an-tsambokely Izy dia niverina nitory teny, ary tsy mba mitovy tamin’ny mpampianatra hafa ny Fampianarany : Misy fahefana ny Teniny. Nony vita ny fampianarany dia nijery ahy Izy ka niteny hoe : « Alatsaho ny haratonao ».

Naika haneho taminy ny fahatezerako aho ary hitantara ny zava-nitranga ny alina… kanefa noho Izy nangataka tamiko dia nanapa-kevitra ny hihaino Azy aho. Tsy nampino ny zavatra niseho… tao anatin’ny segondra vitsy dia feno hazandrano ny haratonay, hany ka nila fanampianaizahay vao nahatafakatra izany tanaty sambo.

Vavolombelon’ny fahagagana lehibe aho ! Feno fahatahorana an’Andriamanitra aho ka nandohalika teo anatrehan’i Jesosy aho ary nilaza hoe : « Tompoko, mialà amiko, fa olo-meloka aho. » (Lioka 5 :8), fa Izy kosa niteny ahy mba hanaraka Azy !

Tsy vitan’ny hoe afa-trosa aho fa vao avy nihaona tamin’i Mesia ilay efa nandrasana hatry ny ela ihany koa aho.

Simona Petera no anarako, zanak’i Jaona, ary nosafidin’i Jesosy aho .

PS : Ry namako, mety nitondra anao tao anatin’ny fahasarotana ihany koa ny toetranao na ny fanapahan-kevitra diso izay noraisinao, ary mety tsy mazoto ny hanao na inona na inona amin’ny fiainanao intsony ianao ! Fa Jesosy dia manana fahefana hanova ny fiainanao sy hanokatra làlana izay mety tsy ampoizinao. Tongava eo amin’ny Fanatrehany anio ary atolory Azy ireo fanahianao sy ireo tahotrao rehetra fa Izy no miahy anao (1 Petera 5 :7)

Voafidy ho tonga Fahagagana Ianao !

Christian Misch