The Chosen - Voafidy ho tonga FahagaganaSantionany

Andro faha-7 - Hampianatra anao fomba fanisa vaovao Aho

Niasa tao amin'ny sehatry ny divay nandritra ny taona maro aho, indrindra tamin'ny fikarakarana hetsika lehibe, toy ny fampakaram-bady. Manisa moa no tena haiko, mikajy ary manamarina fa tonga mandeha araka ny tokony ho izy avokoa ny zava-drehetra mandritra ny lanonana.

Mety efa fantatrao angamba fa amin'ny kolontsaina jiosy, ary indrindra amin'ny fampakaram-bady, dia singa iray tena manan-danja lehibe ny divay. Tsy mahazo manao fahadisoana mihitsy izahay amin'io lafiny io. Ny isan'ny vahiny, ny habetsahan'ny hosotroin'ny tsirairay, ny haavon'ny kalitaon'ny divay... Noraisiko tsy tapaka ireo mason-tsivana rehetra ireo. Tsy hoe te hieboebo aho akory fa azoko lazaina ihany hoe izaho no anisan’ny manan-traikefa indrindra amin’ny sehatry ny asako !

Kanefa tsy izany no nitranga nandritra ny fampakaram-bady tao Kana any Galilia. Tsy nanam-bola moa ny ray aman-drenin'ny mpampakatra, dia nanao tombantombana araka izay azoko atao aho. Nisy olana tsy nampoizinay hitranga anefa. Nihaotra teo amin’ny 25% teo ny isan'ny olona, ​​raha oharina amin'ny vinavina tamin’ny voalohany ! Nanimba tanteraka ny kajikajy nataoko izany.

Ora vitsy monja taorian’ny nanombohan’ny fety dia efa tapitra lany daholo ny divay ary tsy nisy azo hosotroina intsony. Tsy fantatray intsony izay azonay hatao! Tao anatin’ny famoizam-ponay dia nisy naman’ilay mpampiantrano izay nampahafantatra anay an’i Jesosy. Nasainy nanaraka izay rehetra asain’i Jesosy ataonay fotsiny izahay (Jaona 2:5-11).

Nasain’i Jesosy hameno rano ny siny fidiovana rehetra izahay. Tsy azonay mihitsy izay dikan’izany, ohatrany hoe hevitra adaladala koa izany hevitra izany satria vao mainka mandany ny fotoananay, nefa na izany aza, tsy nanan-tsafidy hafa izahay, ka dia nanao izay nolazainy taminay ihany.

Raha ny marina, dia nisy zavatra hafa kely izay tao amin’ny fomba firesany taminay, toy ny fanomezan-toky tena mampahery izany. Tamin’ny fotoana iray dia niantso ny anarako Izy ka nanao hoe: “Tomasy, miaraha Amiko, dia hampianatra anao fomba fanisana sy fandrefesana vaovao Aho ary hahatakatra ny fotoana ianao”.

Tsy nisy azoko intsony ny zava-drehetra, ary vao mainka tsy nisy azoko ny zava-nitranga taorian’izay: Nanova ny rano natao tao anaty siny ho divay i Jesosy. Raha tsy teo aho, raha tsy ny masoko mihitsy no nahita, dia tena tsy hino izany mihitsy aho. Ary ho fanampin'izany, tsy divay tsotra fotsiny ilay izy: fa tena hoe divay tsara indrindra nandramako nandritra ny fotoana niasako manontolo.

Fahagagana nanavotra ny lazan’ilay fampiakaram-bady no nataon’i Jesosy, fa ho ahy kosa dia io no fotoana niantsoany ahy hanaraka Azy. Fantany fa fahagagana iray monja dia ampy handresena lahatra ahy hiaraka Aminy! Dia nisy vokany izany.

Tena niova ny fiainako hatramin’ny nanarahako Azy. Manomboka izao dia miantehitra amin’ny fahagagana ataon’Andriamanitra amin’ny fiainako andavanandro aho.

Tomasy no anarako, ary Jesosy no nifidy ahy.

PS : Ry namako, mety toy izao iainan’i Tomasy izao ny mitranga amin’ny fiainanao ankehitriny, anatina sedra toa tsy hahitam-bahaolana mazava. Koa dia manasa anao aho ny hijery hihaotra ny fetran’ny maha-olombelona anao, ary hijery amin’ny mason’ny finoana. Eny tokoa, mihoatra lavitra noho ny kajikajintsika ny kajikajin’Andriamanitra ! Atolory Azy ny olanao, ary aoka ianao ho fenoiny ny Fiadanany sy ny Fitahiany amin’ny lafim-piainanao rehetra.

Voafidy ho tonga Fahagagana ianao !

Christian Misch