The Chosen - Voafidy ho tonga FahagaganaSantionany

Andro faha-9 - Mety Aho!

Efa nisy fotoana ve ianao nahatsapa fa toy ny hirodana izany daholo ny manodidina anao rehefa avy nandre vaovao ratsy ianao? Izany indrindra mantsy no nahazo ahy rehefa nahatsikaritra an'ilay tasy fotsy teo amin'ny hoditro aho indray andro izay. Famantarana mantsy izany fa voan'ilay aretina mampatahotra indrindra tamin'ny andronay aho, dia ny habokana izany.

Nanomboka teo dia nitsoahan'ny olona foana aho. Ny vokatr'ilay aretina teo amin'ny vatako dia tena nahatsiravina sy sarotra niainana, anefa mahagaga fa ny tena tsy zakako dia ilay izaho nanjary nahilikiliky ny fiarahamonina.

Ny olona dia nino fa voaozon'Andriamanitra aho noho ny ota izay nataoko, ka dia niala tamiko izy ireo. Nitsoaka ahy daholo ny olona, ary na ireo olona izay tia ahy aza dia tsy afaka ny hikitika ahy satria voan'ny areti-mifindra aho ka sao dia hahavoa azy ireo ihany koa. Araky ny lalàna dia tokony hanalavitra ahy daholo ny olona rehetra ary tsy misy mahazo manatona ahy mihitsy.

Tsy nanana trano intsony aho, ary zara raha nanana sakafo hoanina. Be loatra ka tsy zakako intsony ny niainako: maniry ny hifoha amin'ity nofy ratsy ity aho ka hiverina amin'ny laoniny daholo ny zava-drehetra.

Indray andro dia nisy tsirim-pananantenana niforona tato am-poko. Ny anabaviko, izay anisan'ny mpanompo vavy nanatrika ny fampakaram-bady tao Kana, dia nitantara ahy fa nisy an'izany Jesosy avy any Nazareta izany, nanao Fahagagana lehibe izay mbola tsy fahita mihitsy hatrizay: namadika ny rano tao anaty siny fanadiovana ho lasa divay Izy. Ny anabaviko mihitsy aza hono anisany nameno rano an'ireo siny ireo!

Tsy maintsy hihaona amin'i Jesosy aho dieny mbola ety amin'ny faritra Izy. Nanontany an'ireo olona nanodidina ahy aho ary hitako ihany Izy ny farany. Ary rehefa nanatona Azy aho dia nandrahona ahy hanalavitra Azy ny mpianany; i Jesosy kosa dia nampitony azy ireo ary tonga nanatona ahy Izy.

Tampoka teo dia tsy voatohitro fa nanao fihetsika iray izay tena mety hampidi-doza ho an'ny boka iray aho: nandohalika teo anatrehany aho. Jesosy no hany fanantenako, ka dia tonga ny fotoana hamoizako ny amiko manontolo eo anatrehany. Nitalaho taminy aho hoe: "Tompo o, raha mety Ianao, dia mahay manadio ahy" (Matio 8:2-4)

Nibanjina ahy tsara Izy ary niteny ahy hoe: "Mety Aho". Tena efa ela izay vao nisy olona nikasika ahy toy izany! Nitomany aho raha toa ka nahatsapa ilay Fitiavana sy ilay Herin'Andriamanitra nikasika ny vatako. Nanomboka nikatona ireo feriko, ary afaka segondra vitsy dia sitrana avokoa ny hoditro iray manontolo: Nositranin'i Jesosy aho!

Tamin'io andro io dia niverina tamiko ny fiainako, fa mihoatra izany, hitako ilay Tena Fiainana.

Tsy boka intsony aho satria efa nofidin'i Jesosy.

PS : Ry namako, Jesosy dia mahafantatra tsara an’io sedra lalovanao io, hainy ny fahoriana izay zakainao sy ireo fanirianao lalina, mihaino ny hetahetanao izy anio ary mamaly anao hoe « Mety Aho ! » «Sitrako tokoa izany » : « Sitrako tokoa ny hanasitrana anao » , « Sitrako tokoa ny hitarika anao », « Sitrako tokoa ny hitahy anao »… Koa dia loary eo anatrehany ny fonao ary mamelà Azy hikasika anao amin’ny alalan’ny Heriny sy ny Fitiavany.

Voafidy ho tonga Fahagagana ianao !

Christian Misch