The Chosen - Voafidy ho tonga FahagaganaSantionany

Andro 14-Efa teo hatrany am-boalohany aho…

Efa notantarain’i Jakoba rahalahiko anao teo hoe ahoana no nazahoanay ny anaram-bositra hoe « Zanaky ny Kotrokororana » tamin’ny tsy fahamatoranay. Marina fa indraindray tokoa isika dia mora miakatra sy misendoatra!

Ny zavatra iray manohana ahy indrindra tamin’ny fifandraisan’i Jesosy taminay dia Izy tsy niandry anay ho tonga lafatra vao hampiasa anay ao amin’ny Ministerany.Ary soa ihany raha tsy izany dia niandry mandrakizay Izy, niandry ela dia ela tokoa !

Na dia teo aza ny fahadisoanay sy ny lafiny maro izay tokony mbola niovanay dia nataony tafiditra hatrany am-boalohany tamin’izay rehetra nataony izahay. Ny andro nananaran’i Jesosy anay sy niantsoana anay hoe “Zanaky ny kotrokorana” koa no andro nahatakarako ny Antsony. Tonga teo amin’ny sinagoga samaritana iray izay nanasa ahy hizara ny Teny Soratra Masina izahay. Ary Jesosy dia naniraka ahy ny hifidy niaraka Taminy ny Teny izay ho zaraina tamin’io andro io.

Tamin’Izy nangataka an’izay tamiko dia tsy hitako izay havaly Azy. Mbola tao anatin’ny fanamelohan-tena noho ny fahadisoana izay nataoko aho, ary raha ny tena marina, dia tsy nahatsiaro ho mendrika ny handray fanapahan-kevitra ny hifidy Teny ao amin’ny Soratra Masina, na dia farak’izay tsotra toy izany aza aho. I Jesosy kosa nefa, toy ny fanaony hatrizay, dia naneho fa tena mihevitra ahy manokana mihitsy Izy. Tiany aho ny handray anjara amin’ny zavatra izay ataony.

Nahaliana ahy hatrizay ny resaka Fiandohana, ny amin’ny fomba namoronan’Andriamanitra an’izao tontolo izao tamin’ny alalan’ny Teny. Rehefa nozaraiko tamin’i Jesosy izany, dia nanaiky notaritina tamin’izay hevitro izay Izy ary nampifantoka ny vakiteniny tamin’ny Genesisy.

Tsy tonga saina tsara aho tamin’izay fotoana izay, fa io fotoana io nefa dia tena nanamarika ny fiainako mihoatra lavitra noho izay nieritreretako azy. Voakasika tanteraka ny foko raha nahatsapa fa hay Andriamanitra dia liana amin’ny hevitro sy ny fanararoatra rehetra hiara-hiasa amiko.

Taona maro taty aoriana, rehefa nahazo ny iraka ny hanoratra ny filazantsara izay ho antsoina hoe « Filazantsaran’ny Jaona » aho, dia efa nomaniny ary fantatro hoe toy ny ahoana ny ho paikadiko. Tsapako fa tiany hiverina amin’ny Fiandohana aho ary nanomboka nanoratra aho hoe : « Tamin'ny voalohany ny Teny, ary ny Teny tao amin'Andriamanitra, ary ny Teny dia Andriamanitra. »

Izy no Fiandohana sy Fiafarana. Izy no Teny. Ary izaho no namany sy mpanompony.

Jaona no anarako, zanak’i Zebedio, ary nosafidin’i Jesosy aho.

PS: Ry namako, mety mieritreritra ianao fa raha ireo fahadisoana izay nataonao rehetra ireny no isaina dia tsy manana anjara amin’ny fanompoana an’Andriamanitra ianao. Tsy marina nefa izany. Maniry ny hizara ny Fahazavany Izy ary maniry ny hanova ny fiainan’olona maro amin’ny alalanao. Mamelà ahy hivavaka ho anao : « Tompo o, mivavaka ho an’ity namako ity aho androany, ny mba hahazoany misimisy kokoa hatrany hatrany ny hevitrao ho azy ny amin’ny fiainany ary enga anie ireo fiampangana sy fanamelohana rehetra izay azony ho tsy hanam-pahefana akory eo amin’ny fiainany. Ny fiarahany aminao anie hahatonga azy hamirapiratra hatrany noho ny Fahazavanao. Amin’ny anaran’i Jesosy. Amena »

Voafidy ho tonga Fahagagana ianao !

Christian Misch