The Chosen - Voafidy ho tonga FahagaganaSantionany

Andro faha 17 – Tonga ny fotoana!

Vao nanomboka ny fanompoany i Jaona mpanao Batisa, dia hitako fa nisy zavatra niavaka teo amin’ny fomba fanaony. Niaraka taminy aho taona vitsivitsy lasa izay, ary lasa iray amin'ireo mpiara-miasa aminy mahatoky indrindra aho, na tamin'ny andro fifaliana sy fahavokarana, na tamin'ny fotoan-tsarotra sy ny tsy fahampiana.

Niaiky foana i Jaona Mpanao Batisa fa tsy izy no Mesia, fa nanana iraka manokana ho azy anefa izy: ny hanomana ny lalana ho Azy rehefa tonga Izy (Jaona 1:19-28). Efa nambarany taminay fa i Jesosy avy any Nazareta no Mesia. Lojika tokoa izany! Tsaroako mihitsy ilay andro nahatongavan’i Jesosy mba hanaovan’i Jaona Mpanao Batisa batisa Azy, sy ny nahitan’i Jaona ny lanitra nisokatra, ary ny Fanahin’Andriamanitra tonga teo Aminy tahaka ny voromailala.

Eny, nanaraka an’i Jesosy teny foana ny lazany. Efa nandre ny fahagagana nataony izahay, ohatra hoe ny nanovany ny rano ho divay tamin’ny fampakaram-bady tao Kana, ny nanasitranany ny paralysisa na ny fanafahana an’i Maria Magdalena. Sady nilaza taminay ihany koa I Jaona fa misy Fariseo iray atao hoe Nikodemosy tongo nitsidika an’I Jesosy mihitsy aza.

Naniry ny ho lasa mpianatr’i Jesosy aho, toa an’i Andrea namako, herinandro vitsivitsy talohan’izay, kanefa tao am-poko dia efa nanapa-kevitra ny tsy hanao izany dingana izany aho raha tsy i Jaona Mpanao Batisa mihitsy no nangataka ahy hanao izany. Niantso ahy Andriamanitra mba hijoro eo akaikin’i Jaona Mpanao Batisa, ary te hanompo azy aho arak’izay sitrapon’Andriamanitre. Tsy te hialoha an’Andriamanitra aho, na hanery zavatra akory aza.

Tena vaovao mahafaly tokoa fa tonga ihany io andro io. Nanasa ahy hanaraka an’I Jesosy i Jaona Mpanao Batisa. Nandeha nankany amin’ny faritanin’i Basana aho, any avaratr’i Israely, ary rehefa nandeha an-tongotra andro vitsivitsy aho, dia afaka nihaona tamin’i Jesosy sy ny mpianany ihany. Tena nahafinaritra ny nahita an’i Andrea indray!

Rehefa niresaka tamin’i Jesosy aho dia nahatsapa fifandraisana manokana avy hatrany. Tena faly aho ny amin’ny fahafahako manaraka Azy sy ny fahatongavako ho anisan’ny mpianany, ka tsy afaka nitazona fahanginanana mihitsy aho. Raha ny marina, rehefa nahafantatra aho fa handalo any akaikin’i Kaisaria-filipo izahay, dia nanararaotra nanasany namako iray hafa hihaona tamin’i Jesosy aho. Hilaza ny tantarany aminareo izy rahampitso ;)

Lasa manana heviny sy zava-kendrena bebe kokoa noho ny hatramin’izay ny fiainako hatramin’ny nahafahako manaraka ny Mesia isan’andro isan’andro.

Filipo no anarako, ary nofidian’i Jesosy aho.

PS: Ry namako, tsy maintsy miandry ny fitarihan’Andriamanitra isika vao manapa-kevitra eo amin’ny fiainantsika, tahaka ny nataon’i Filipo. Mandritra izay fotoana izay anefa, izay tena mahavariana tokoa, dia tsy tokony hiandry andro akory isika hanara-dia an’i Jesosy satria efa nasainy manokana ianao! Maniry ny hanana fiarahana manokana aminao Izy, ny hitarika ny fiainanao mba hananao tanjona amin’ny fiainana mandrakizay. Hiaina misimisy kokoa ny fanatrehany sy ny fitarihany anie ianao anio.

Voafidy ho tonga Fahagagana ianao!

Christian Misch