The Chosen - Voafidy ho tonga FahagaganaSantionany

Andro faha 18 – Ndao ianao hizaha

Tsoriko aloha fa manana traikefa maro aho, saingy tsy anisan'izany ny diplaomasia. Maro ny olona no nilaza tamiko, nandritra ny fiainako, fa mivantana loatra aho rehefa miteny, ary marina izany, tsy tiako ny manodikodin-dresaka.

Nampisy olana maro tamin’ny fiainako izany, fahavalo maro, ary fahaverezan'ny asa amin'ny maha-mpanao mari-trano ahy.

Niasa mafy aho mba ho tonga mpanao mari-trano jiosy voalohany tao Kaisaria-Filipiana! Tsy mety mino aho hoe niafara tamin’ny fomba tsy nampoizina toy ireny ny asako. Noho ny fahadisoam-panantenako dia nangoniko ny drafitra rehetra nataoko, ary nandeha tany ambanivohitra aho mba hakako saina irery. Nipetraka teo ambaninina aviavy aho ary nanokatra ny foko ho an’Andriamanitra. Potika aho, ketraka anefa tsy tsapako ny Fanatrehany teo akaikiko. Nalahelo mafy aho ka nanomboka nandoro ny drafitra nataoko, raha nitaraina taminy aho saika niantsoantso hoe: "Andriamanitro ô, eo ve Ianao? Hitanao ve aho? Tena mahita ahy tokoa ve Ianao? Aza manafina amiko ny tavanao."

Andro vitsivitsy taty aoriana, mbola tao anatin'ny famoizam-po tanteraka aho, no nisy olona nitsidika ahy tampoka nampahery ahy: tsy iza izany fa i Filipo namako. Mpianatr’i Jaona Mpanao Batisa nandritra ny taona maro izy, saingy lasa nanomboka nanaraka mpampianatra hafa iray antsoina hoe Jesosy avy any Nazareta izy vao haingana. Tsy nazava tamiko mihitsy izany: mety hisy soa va avy any Nazareta? Namaly ahy mivantana i Filipo, tamin’ny faharesen-dahatra izay mbola tsy hitako teo aminy hatrizay hoe: “Ity ilay nandrasantsika hatrizay hatrizay. Ndao ianao hizaha” (nalaina avy amin’ny Jaona 1:43-51, DIEM).

Raha ny mahazatra, dia tsy nanahiran-tena ny handeha amin’izany akory aho, fa ny faharesen-dahatra nataon'i Filipo dia tena nanintona ny saiko ary nanitikitika ny fahalianako. Dia tahaka izany no nianarako ny fahafantarana Azy. Nandritra io fihaonana voalohany io, dia niresaka tamiko toy ny olona efa nahafantatra ahy izany i Jesosy, ary tena gaga aho fa niteny tamiko Izy sady nibanjina ny masoko hoe: “Efa fantatro ianao, fony tsy mbola niantso anao Filipo. Fony ianao tao anatin’ny fotoan-tsarotra indrindra sy nahatsapa fa miady irery, tsy nanafina ny tavako taminao Aho. Hitako ianao teo ambanin’ny aviavy.”

Tsy nahateny aho. Tsy nisy nahalala izany rehetra izany afa-tsy ny Mesia. Tena nanohina ny foko ny valin-teniny. Fantatro fa nahita an’Ilay notadiaviko nandritra ny androm-piainako aho, ary vonona ny hanaraka Azy aho nanomboka tamin’izay fotoana izay.

Natanaela no anarako, ary nofidian’i Jesosy aho.

PS: Ry namako, mety mahatsapa manirery ihany koa ianao ary toy ny tsy henoin’Andriamanitra izany ny kiakiaka anao. Fa avelao aho hiteny aminao hoe: tsy marina izany, mihaino anao hatrany Izy. Mihaino anao isan-tsegondra Izy ary maniry ny hamaha ireny fotoan-tsarotra lalovanao ireny. Anio indray dia mifikira aminy mihoatra ireo fotoana rehetra teo aloha. Ao anatin’ny Finoana Azy no misy ny fandresena! Maniry ny hanao fahagagana amin’ny fiainanao Andriamanitra.

Voafidy ho tonga Fahagagana ianao!

Christian Misch