The Chosen - Voafidy ho tonga FahagaganaSantionany

Andro faha 20 – Avelao ny zaza hanatona Ahy!

Fotoana vitsy lasa izay, raha nilalao tany an’ala aho, dia sendra nahita tobin’olona. Nahita lay, fitaovana fandrafetana, sakafo ary entam-barotra manokana aho tao. Ohatra ny hoe nisy mpandrafitra nanangana ny toeram-piasany tao anaty ala izany.

Tena liana tamin’ilay izy aho ka ny ampitson’iny dia nantsoiko i Josoa namako ary nangataka azy hiaraka amiko mba hahalala bebe kokoa momba an’io olona io. Natahotra i Josoa sao olona manana fikasana ratsy ilay izy, nefa azoko antoka fa tsy izany. Tamin’ny Hatsorany sy ny Hatsaram-panahiny dia hita taratra ny maha-azo itokiana ny Fiainany!

Tena variana Taminy izahay ka niverina nitsidika Azy indray niaraka tamin’ny namanay maro hafa. Taorian’ny vazivazy vitsivitsy dia navelany hiara-hitoetra Aminy izahay fa saingy hoe mila manampy Azy hono izahay, satria teo am-pamitana asa maro izay tokony vitainy Izy. Faly be izahay niresaka taminy sy nihaino Azy! Tena nahakasika ny fonay ny zavatra noteneniny, sady mora azo, na dia ho an’ny ankizy toa anay aza.

Nanenika ny foko ny fampianarany, ary koa ny fon’ny namako rehetra. Andro vitsy taty aoriana dia vitan’ i Jesosy ny asany rehetra ary nanambara taminay Izy fa tsy maintsy hanohy ny lalany Izy mba hahatanteraka izay nandidian’Andriamanitra Azy. Somary nampalahelo anay ilay vaovao, nefa tamin’izay fotoana izay, dia faly ihany aho nieritreritra fa ho afaka hikasika fon’olon-kafa indray Izy.

Nihanitombo hatrany ny lazany, ary nanana fahafahana nandeha nihaino Azy mihitsy aza izahay ary nanatri-maso ny sasany tamin’ireo fahagagana nataony teo amin’ny faritra nisy anay. Eny, mpianatr’i Jesosy aho! Fantatro fa mbola zaza aho, nefa vao haingana aho no nandre Azy niteny hoe: «Avelao ny ankizy madinika hanatona Ahy, fa aza raràna, satria an’ny toa azy ireny ny Fanjakàn’ny lanitra.» (Matio 19:14, DIEM)

Eny, mino aho fa Izy ilay Mesia nandrasantsika, ary nanana hevitra nomaniny ho anay Izy tao amin’iny ala iny, mba hahafahanay sy ny namako hihaona aminy ka hikasihany ny fonay.

Abigaila no anarako, ary nofidin’i Jesosy aho.

PS: Ry namako, Jesosy dia maniry ny hanana fifandraisana lalina amintsika tsirairay avy, ary tsy natokana ho an’ny olona mihoatra ny 18 taona ihany izany. Mivavaka aho mba homen’Andriamanitra anao ny fahendrena ny hampahafantatra an’i Jesosy amin’ny zanakao, ny zafikelinao, ny zanaky ny ny rahalahinao, ny zanaky ny namanao, sns. Mba hahafahan’izy ireo mahafantatra ilay tena tia azy indrindra dieny fahazazany.

Voafidy ho tonga Fahagagana ianao!

Christian Misch