The Chosen - Voafidy ho tonga FahagaganaSantionany

Andro faha-21_Ahinjiro ny tananao!

Andro Sabata tamin'izay, andro iray toa ny isan'andro rehetra ihany, ary tonga niangona tao amin'ny synagoga izahay hiaino ny teny soratra masina sy hidera an'i Adonai, araka ny toromarika izay naperaky ny lalàna.

Tiako ny nandeha tany amin'ny synagoga satria naniry ny hanakaiky kokoa an'Andriamanitra aho, na dia nahatsapa aza aho fa notsaratsarain'ny olona loatra noho ny aretiko. Voan'ny paralysisa ny tanako ary nanana aretin-koditra hatramin'ny fahazazako aho. Nisy fiantraikany be teo amin'ny fiainako izany. Maro no nilaza fa fanamelohan'Andriamanitra noho ny heloka nataon'ny ray aman-dreniko no nahatonga ahy narary. Ary izany rehetra izany dia voa may nanamafy ny fahatsapako fa tsy mendrika aho.

Tamin'izay andro izay dia nisy vondron'olona niditra tao amin'ny synagoga. Satria tsy dia mahazatra anay moa ny fisian'ny mpitsidika maro be toa izany teo amin'ny tànana dia toa manambana ho hiavaka amin'ny andro hafa izany io andro io. Ary tsy nampoizina fa andro iray tena niavaka tamin'ny hafa mihitsy izy io.

Toa mpampianatra izany ny iray tamin'izy ireo, fantatro taty aoriana fa Jesosy no anarany. Nanatona ahy Izy ary nangataka ny hijery ny tanako; nandritra izay fotoana izay dia nanomboka nimonomonona ny fariseo izay nitarika ny fotoam-bavaka noho ny korontana tsy nampoizina izay niseho. Nametrahany fanontaniana maro isan-karazany Izy ary norahonany fa tsy azony atao ny manasitrana amin'ny andro sabata.

Namaly azy moa Jesosy hoe: "Manontany anareo Aho: Moa ny manao soa va no mety hatao amin’ny Sabata, sa ny manao ratsy? ny mamonjy aina va, sa ny mahavery aina?" (Lioka 6:6-11). Miaiky aho (na dia tsy mpampianatra lalàna aza) fa mitombina tokoa izany tenin'i Jesosy izany.

Nivavaka ho ahy Izy ary nangataka ahy haninjitra ny tanako mankany Aminy. Tsy nampoiziko ny niseho! Niova tsikelikely ny endriky ny vatako, ary farany dia nadio ilay izy. Niezaka nanetsika ny tanako aho ary hitako fa tsy tratran'ny paralysisa intsony izy. Tsapako fa niverina tamin'ny toerany tsikelikely ny taolako sy ny hozatro ary sitrana tsanteraka avy eo.

Ny fariseo dia nibedy mafy an'i Jesosy ary nandidy ahy hijanona lavitra Azy; fa tsy afaka ny hiaino azy ireo nefa aho. Variana loatra ny amin'ny tanako izay nositranin'i Jesosy aho, faly sy nitsikitsiky hatrany amin'ny sofiko mihitsy aza aho. Manana tanana roa aho! Nasorin'Andriamanitra tamiko ilay vesatra nangeja ahy tamin'ny fiainako. Tsy hitovy amin'ny teo aloha intsony ny fiainako, ary ny faniriako lalina indrindra dia ny hanompo an'Ilay namonjy ahy amin'ny alalan'ireto tanako anankiroa ireto.

Elam no anarako ary nofidin'i Jesosy aho.

PS: Ry namako, ianao ihany koa dia mety misy marika na ratra izay mahatonga anao hahatsapa fa tsy misy dikany ianao. Fa Andriamanitra anefa dia maniry ny hanarina anao. Maniry ny hanasitrana anao izy mba hahafahanao hiarina indray miaraka amin'ny hery vaovao amin'ny fahafantarana fa manan-danja eo imason'Andriamanitra tokoa ianao. Avelao Andriamanira hanao zava-baovao ho fanarenana ao amin'ny fiainanao.

Voafidy ho tonga Fahagagana ianao!

Christian Misch