The Chosen - Voafidy ho tonga FahagaganaSantionany

Andro faha-13 - Jakoba

Tonga hamonjy ny fanahy aho !

Ity tantara manaraka ity dia fijoroana vavolombelona izay tsy ireharehako velively kanefa zava-dehibe ny hizarako azy satria mety hahakasika ny fonao izany na amin’ny fomba ahoana na amin’ny fomba ahoana.

Mety efa fantatrao ihany angamba hoe izahay jiosy dia tsy mifankahazo amin’ny samaritana. Raha ny tena marina, izaho sy i Jaona ralahiko dia tsy tia azy ireo hatramin’izay ary efa saika mankahala mihitsy aza. Rehefa handeha hampianatra sy hanasitrana marary any Samaria Jesosy dia tsy azonay hoe nahoana Izy no mandany ny fotoanany sarobidy sy ny heriny amin’ny olona ambany toy ny Samaritana. Tsy mitombina mihitsy izany taminay ! Indray andro dia nasainy niasa tany amin’ny sahan’i Meleka mihitsy aza izahay. Tsy azonay mihitsy ny antony mahatonga an’i Jesosy nampanao anay an’izany.

Indray andro, raha mbola tany Samaria izahay dia nisy samaritana nanevateva sy nandrora anay sy Jesosy ! Tena efa tsy rariny intsony, nirehitra fahatezerana ny fonay ary niangavy an’i Jesosy mba handatsaka afo avy any an-danitra handevenana azy ireo. Noho ny hatezeranay be loatra dia tafateny Taminy mihitsy aza izahay hoe hadisoana ny nakanesana taty Samaria.

Jesosy ilay manana faharetana be sy fahefana, dia nanitsy anay Izy ary teo izahay vao nanomboka nahatakatra. Ny zava-nitranga teo amin’ny fantsakana niaraka tamin’i Potina, sy izay notantarainy tamin’ny maro hafa, dia nisy fiantraikany tamin’ny fiainan’ny olona maro, sy ho an’ireo taranaka ho avy.Ireo Samaritana izay halantsika fatratra ireo dia vonona ny hino an’i Jesosy na dia tsy nahita fahagagana lehibe akory aza.

Amin’ny maha Jiosy anay, dia nihevitra foana izahay fa tsara noho ny Samaritana, saingy tamin’io andro io dia nahatsapa izahay fa diso izany. Jesosy dia tsy niantso antsika hitsara ny hafa, fa hanompo azy am-pitiavana sy amin’ny fanetren-tena.

Rehefa dinihina tokoa dia tsy mampino hoe izahay dia nahavita nisaina sy nilaza zavatra toyizany! Mba eritreritra sy fisainana avy aiza no nahatonga anay nanao an’ireny? Nahatsiaro menatra tanteraka izahay… Nampahery anay anefa Jesosy ary nahatsiaro ho voaray indray izahay satria namela anay Izy. Nanomboka teo dia nomena anarana hoe « Zanaky ny kotrokorana » izahay , izay fomba mahomby indrindra hampatsiahivina anay fa mila mianatra ny ho tony hatrany izahay ! =)

Jakoba no anarako, zanak’i Zebedio ary na dia nanana ny fahadisoako aza aho dia nosafidian’i Jesosy.

PS : Ry namako, nisy fotoana ve ianao nisafoakan’ny hatezerana teo anatrehan’Andriamanitra na teo anatrehan’ny olona ? Andriamanitra dia manefy ny toetranao, ary maniry ny hanadio anao hatrany Izy isan’andro isan’andro. Ny manodidina anao anie tsy hahalala anao ho toy ny « Zanakin’ny Kotrokorana » fa toy ny « Zanak’Andriamanitra » kosa ! =)

Voafidy ho tonga Fahagagana ianao !

Christian Misch