The Chosen - Voafidy ho tonga FahagaganaSantionany

Andro 12 – Tsy mbola izay ny faran’ny tantaranao !

Efa niaina fotoan-tsarotra ve ianao teo amin’ny fiainanao ? Tsy ela akory aho no nandalo an’izany.

Tsy nanam-bola intsony izahay mianakavy ary tsy nisy sakafo hoanina intsony. Hita mihitsy aza ny taolan-tehezan’ny zanako vavy ary milentika be ny mason’ny vadiko noho ny tsy fahampian-tsakafo. Tsy mety mahita asa aho ary tsy hitako intsony izay natao. Noho ny fahaverezan-kevitra dia niafina teo amoron-dalana mankany an-tanàna izahay sy ilay namako ka nikasa handroba izay olona mandalo voalohany teo.

Nanafika lehilahy jiosy izahay. Tsy nikasa handratra azy izahay, fa tamin’izy niaro-tena teo dia naratra ny lohany rehefa nianjera tamin’ny vato. Tsy fantatray na maty izy na tsia, satria maika nirohotra naka ny soavaliny sy ny akanjony ary ny entany izahay ary nandositra haingana araka izay tratra.

Rehefa nandositra izahay dia nanao fihetsika mahery aho ka nianjera teny ambony soavaly ka tapaka ny tongotro. Noraisiko ho vokatry ny fitsaran’Andriamanitra teo amin’ny fiainako izany. Nanomboka tamin’io andro io dia nenjehin’ny eritreritro aho , mahatsiaro menatra noho ny amin’ny zavatra mahatsiravina vitako sy ny fisalasalana hoe maty sa velona ilay lehilahy notafihinay. Tsy afaka niasa sy namboly intsony aho ka voaheloka ho maty mosary izahay mianakavy.

Indray andro anefa dia niseho Izy. Ny mpianany dia niasa sy namafy teo amin’ny taninay ary Jesosy mihitsy no nanasa anay hihinana tamin’ireo sakafo novidian’izy ireo. Tsy nino mihitsy aho : tsy mbola nisy olona naneho hatsaram-panahy taminay toy izao, indrindra hoe olona tsy mahalala anay akory.

Tamin’io alina io, rehefa nanokatra ny foko taminy aho ary nilaza tamin’izy ireo ny zavatra nataoko, dia hitako mivantana teo imason’i Jesosy fa efa fantany ny tantarako. Ary indrindra, nomeny ahy ilay valin-teny nilaiko fatratra : « Tsy maty ilay jiosy novonoinao fa nisy samaritana tsara fanahy nandalo ka nikarakara azy » (Jereo ny tantara ao amin’ny Lioka 10 :30-37). Tsy nisy fisalasalana : Fantatr’i Jesosy izay nolazainy. Nanomboka nitomany aho, faly nahafantatra fa salama tsara ilay lehilahy jiosy.

Toy izay no niatombohan’ny fahafahako. Ary tsy nijanona hatreo fa ny ampitso maraina rehefa nifoha aho dia sitrana tanteraka ny tongotro : eny, nositranin’i Jesosy aho ! Tsy mbola nisy fifaliana toy izao tao amin’ity trano ity. Olom-baovao aho izao, na ety ivelany na ny ao anatiko ary izany dia noho Izy irery ihany.

Meleka no anarako ary nosafidian’i Jesosy aho.

PS : Ry namako, ianao ihany koa dia mety hoe menatra ny amin’ireo fanapahan-kevitra izay noraisinao taloha ary toy ny mahatsiaro ianao fa manenjika anao ny fahotana izay vitanao. I Jesosy nefa dia maniry ny hanangana indray ny fiainanao. Tsy menatra anao Izy ary maniry Izy ny hanafaka anao amin’ireo vesatra sy ratra izay nozakainao efa nandritry ny taona maro. Sokafy aminy ny fonao anio ary avelao Izy hanasitrana sy hanavao azy indray. Fiaingana vaovao indray no miandry anao! Hararaoty ny andro anio hiainana ilay fahafahana sy fitahiana avy amin’Andriamanitra.

Voafidy ho tonga Fahagagana ianao !

Christian Misch