The Chosen - Voafidy ho tonga FahagaganaSantionany

Andro faha-2 : Mialofa Amiko ianao !

Nikorontana ny fiainako nanomboka tamin’ilay andro nanirahan’ny Romana ahy hankany amin’ny Faritra Mena ao Kapernomy, any amin’ny faritra ambany indrindra ny tanàna.Nirahina hanampy vehivavy iray atao hoe Lili aho izay ampahorian’ny devoly ; heveriko fa fantantrareo hoe iza izany resahiko izany na efa nisy fotoana ianareo nifanena taminy…Rehefa tonga tany aho dia nanao izay rehetra azoko natao mba hanampiana azy, saingy tsy nisy vokany izany. Resy lahatra aho fa lehibe loatra ny haizina tao aminy ka Andriamanitra irery no afaka miditra an-tsehatra hanafaka azy.

Na izany aza, nisy fanontaniana iray tanatin’ny foko lalina tsy nitsahatra nanitikitika ny saiko :Ahoana no mahatonga ahy mpampianatra ambonin’ny mpampianatra tsy manana fahefana hanohitra ny herin’ny haizina ?

Nisy zava-nitranga andro vitsy taty aoriana anefa… tsy nino mihitsy aho raha tsy ny masoko roa no nahita : Sitrana i Lili.

I Jesosy avy any Nazareta no nanao izany fahagagana izany. Noho izany, iza ankoatra Azy no manana ny valin’ ny fanontaniako ? Rehefa nahita azy nampianatra sy nanasitrana ilay mararin’ny paralysisa tao anaty vahoaka aho dia tsy nisalasala intsony fa tsy maintsy miresaka Aminy aho.

Nanaiky hihaona tamiko tamin’ny toerana mangina Izy mba hahafahako miresaka aminy malalaka. Arakaraky ny nametrahako fanontaniana taminy no vao mainka nahatsapako fa ny Fanjakany dia tsy mitovy velively amin’ilay hantenaintsika Jiosy : Tsy tonga hanafaka antsika tamin’ny fampahorian’ny Romana Izy fa tamin’ny fahotana sy ny haizina ! Tsapako misy fiainana mikorina amin’ny alalan’ny teny tsiraray havoakany.

Ny tao am-poko dia milaza amiko fa Izy ilay nandrasako teo amin’ny fiainako : ilay Mesia nampanantenaina. Nientanentana be aho ary ilay teny ao amin’ny Salamo no tonga tato an-tsaiko manao hoe : « Manoroha ny zanaka, fandrao ho tezitra izy, ka ho very eny an-dalana ianareo; fa vetivety dia hirehitra ny fahatezerany. » (Salamo 2 :12)

Nandohaliko teo Aminy aho ary Izy nanoroka ny tanako. Nanampy ahy hitsangana Izy ary namarana ilay Salamo manao hoe : « Sambatra izay rehetra mialoka Aminy ! », no sady nandray ahy teo an-tsandriny.

Rehefa namihina ahy Izy dia nahatsapa niakatra tato anatiko ilay fitiavana madio indrindra sy marina indrindra fantatro. Tamin’io fotoana io no nahafantarako fa tsy hitovy tamin’ny taloha intsony ny fiainako. Nateraka indray aho ary manana anjara aho ankehitriny

Nikodemosy ny anarako ary nosafidian’i Jesosy aho.

PS : Ry namako, Jesosy ihany no valin’ireo fanontaniana be dia be manitikitika ny sainao, fialofanao rehefa ao anaty ady sarotra ianao. Manasa anao aho hiantsoraka eo an-tratrany amin’ny alalan’ny vavaka ary aoka ny fiainanao ho heniky ny Fitiavany sy ny Fanatrehany. Izy no Fialofanao, Izy no manome anao ny antom-pisianao.

Voafidy ho tonga Fahagagana ianao!

Christian Misch