Die Vader is Lief vir Jou, deur Pete BriscoeVoorbeeld

Mense is geneig om hulle siening van God te baseer op wie hulle ook al "vader" in hierdie lewe noem. Is aardse vaders egter goeie voorbeelde van ons hemelse Vader? Is God soos hulle?

Dit hang af.

Vir sommige van ons wek die woord "vader" gevoelens van gemak en sekuriteit. Vir ander wek die denkbeeldige geluid van ons vader se voetstappe 'n instink om weg te kruip. Jy kan dalk terugdink aan jou pa en sê: "As God enigsins soos my ou man is, wil ek niks met Hom te doen hê nie."

Wanneer ons dus oor "God die Vader" praat, moet ons denke oorheers, nié ons emosies nie. Ons moet 'n duidelike onderskeid tref tussen ons aardse vader en ons hemelse Vader. Die Heilige Gees sal die Bybel gebruik — nie ons gevoelens of aardse ervarings nie — om ons te lei terwyl ons uitvind wat met "God die Vader" bedoel word.

Onthou Moses se versoek in die boek Eksodus en pas dit toe terwyl ons na die vaderlike eienskappe van God deur die Skrif soek:

"As U my dan goedgesind is, maak my u wil bekend, sodat ek U kan leer ken en kan doen wat U verwag" (Eksodus 33:13).

In die gedeeltes wat op Moses se versoek volg, antwoord God deur nie minder nie as veertien vaderlike eienskappe oor Homself te openbaar — waarvan elkeen op baie ander plekke in die Bybel bevestig word.

Hierdie eienskappe dien as 'n wonderlike model vir aardse vaders, maar dit is nie bedoel om 'n aanklag van skuld te wees wat ons uit skaamte aanmoedig om beter te presteer nie. In plaas daarvan moet hulle al God se kinders aanmoedig met die wonderlike nuus van ons volmaakte Ouer wat ons koester, waardeer en liefhet.

Vader, ek bid dat enige wanopvattings wat ek oor U het, deur die waarheid van u Woord weggevee sal word. Ek wil U ken en op 'n verstandige wyse, wat vry is van misleidende emosies, meer van U leer. Help my asseblief om my denke oop te stel sodat u Gees my na die waarheid kan lei. Amen.