Die Vader is Lief vir Jou, deur Pete BriscoeVoorbeeld

Dag 3
Jou Altyd-Teenwoordige Vertrooster

U het ons vir Uself gemaak, o Here; en ons harte is onrustig totdat hulle in U rus. — Augustinus

Die lewe is 'n stryd. Almal sal dit vir jou sê. Dit maak nie saak waar ons opeindig nie, ons worstel met 'n wye verskeidenheid probleme en uitdagings — finansieel, emosioneel, fisiek, ens. En vir elke probleem wat ons teëkom, is daar geen tekort aan voorgestelde oplossings nie. Sommige van die voorstelle wat ons van aardse vaders hoor, sluit in "sorteer dit self uit" en "jy moet skouer aan die wiel sit".

In teenstelling met enige van hierdie uitgangspunte, vertel ons hemelse Vader vir ons een ding wat enige probleem aanspreek wat ons ooit in die gesig mag staar:

"Toe het die Here gevra: 'Moet Ek self saamgaan en vir jou vrede gee?'" (Eksodus 33:14).

God sal vir ons rus gee? Sommige van ons het vaders gehad wat ons tot op die rand van geestelike en fisieke uitputting gedruk en gedruk het. God die Vader is anders. Hy vertroos ons. Ja, Hy het dinge vir ons om te doen – en daardie dinge is baie belangrik – maar die Skrif maak dit duidelik dat daardie dinge gedoen word deur afhanklik te wees van God se krag wat deur ons werk, eerder as dat ons ons krag gebruik om dinge vir Hom te probeer doen.

“Ek self [God] het Efraim leer loop, Ek het hulle op my arms gedra, maar hulle wou nie erken dat dit Ek is wat vir hulle sorg nie. Ek het hulle met sorg en liefde gelei, Ek was vir hulle soos iemand wat die juk oplig as dit sy trekdier skaaf. Ek het na Efraim toe afgebuk en hom gereeld kos gegee ... ” (Hosea 11:3-4).

In hierdie gedeelte uit Hosea sien ons dat God nie net ons laste opneem nie, maar Hy WIL dit opneem as gevolg van sy oneindige liefde vir ons! Daar is geen beperking op wat Hy in staat is om te hanteer nie, ook nie aan wat Hy vir jou sal doen nie. Dit bring 'n redelike ernstige vraag na vore:

Waarmee het jy in jou eie krag gesukkel, eerder as om dit aan die Vader wat jou liefhet, toe te vertrou?

Vader, neem die laste wat ek op myself geplaas het. Ek kan nie hierdie dinge op my eie aanpak nie. Ek gee aan U oor dít wat ek self probeer doen het. Ek gooi die handdoek in om dinge op my eie te probeer. Ek vertrou op u krag sodat ek gedurig in u vertroosting kan rus. Amen.