Wá Àyè Fún Ohun tó Ṣe Kókó: Ìhùwàsí Ẹ̀mí Márùn-ún Fún Àkókò Lẹ́ńtìÀpẹrẹ

Àwọn Ìhùwàsí Ẹ̀mí: Àṣàrò

Iṣẹ́. Ẹ̀kọ́. Ìbáṣepọ̀. Ìléra. Ìnáwó. Àjàkálẹ̀-Àrùn. Pẹ̀lú onírúurú ǹkan tí à ń là kọjá lóde òní, ó rọrùn láti y'asẹ̀ àgẹ̀rẹ̀ kúrò nínú àwọn ǹkan tí a fẹ́ fún ara wa. 

Fún ìdí èyí t'ẹsẹ̀ dúró kí o sì fa èémí sí'mú. Bí o ti ń padà mí síta, fojú inú rí araà rẹ bí o ti ń gbé gbogbo àjàgà tó lè mú ẹ mẹ́hẹ kúrò. Ní báyìí, fi àwọn ọ̀rọ̀ yí ṣe àfojúsùn:  

Ẹ̀mí Ọlọ́run náà ni a fi dá mi, àti wípé èémí Ọ̀gá-Ògo ń fún mi ìyè. Jóòbù 33:4 ESV

Fi ìṣẹ́jú kan ronú nípa ẹsẹ̀ Bíbélì yẹn. Tún un kà lẹ́sẹẹsẹ kí o sì ṣe àkíyèsí ọ̀rọ̀ kààǹkan. 

Bí o ti ńṣe àṣàrò lórí ẹsẹ̀ Bíbélì yí, gba èyí rò: Ẹni tí ó fi èémí ṣe ìṣẹ̀dá rẹ ńṣe ìpamọ́ èémí rẹ. Lóòótọ́ ni ǹkan lè má rọgbọ ní ìgbà míràn, ṣùgbọ́n ìwọ kò jìnà sí Ọlọ́run tó dá ọ tí ó sì fún ọ lórúkọ. 

T'ẹsẹ̀ dúró lẹ́ẹ̀kan si. 

Ǹkan tí o kà tán yí jẹ́ àpẹrẹ àṣàrò nínú Ìwé Mímọ́. A sọ̀rọ̀ nípa àṣàrò nínú Bíbélì ní ìgbà mélòó kan láti ri dájú wípé àwọn ọmọ lẹ́yìn Ọlọ́run lè tún àfojúsùn wọn lórí Ọ̀rọ̀ Ọlọ́run ṣe. 

Àṣàrò kìíṣe ǹkan tí a lè fi ipá ara wa ṣe. Ó nííṣe pẹ̀lú fífà súnmọ́ Ọlọ́run àti bíbèrè fún Un láti fi àwọn èrò àti ọ̀nà rẹ̀ hàn sí wa. 

Ṣíṣe àṣàrò nínú Bíbélì ma ń ràn wá lọ́wọ́ láti rí àwọn ìlàkọjá wa pẹ̀lú ìhà mímọ́ nítorí à ń gba ǹkan mímọ́ láàyè láti yí ìrírí wa padà. Nígbà tí a bá wá àyè láti ṣe àṣàrò nínú Ìwé Mímọ́, à ń yàn láti yí àfojúsùn wa kúrò lọ́dọ̀ ara wa àti ayé, padà s'ọ́dọ̀ Ọlọ́run àti Ọ̀rọ̀ Rẹ̀. À ń gba Ọlọ́run láàyè láti yí èrò àti ìrísí wa padà. 

Bí o ti ń múra sílẹ̀ de ọ̀sẹ̀ tó ḿbọ̀, gbìyànjú láti mọ̀ọ́mọ̀ pa ọkàn rẹ pọ̀ lórí Ọlọ́run àti Ọ̀rọ̀ Rẹ̀ lójojúmọ́. 

Gbé Ìgbésẹ̀: Gba Ọ̀rọ̀ Ọlọ́run láàyè láti ma gbé'nú rẹ ní àkókò Lẹ́ńtì nípasẹ̀ kíkọ́ àkọ́sórí gbogbo Ẹsẹ̀ Bíbélì t'Òní. Bí o ti ńṣe èyí, ṣe àkíyèsí àwọn ọ̀rọ̀ àti gbólóhùn tó tayọ, kí o sì bèrè lọ́wọ́ Ọlọ́run láti fi ẹ̀kọ́ inú ẹsẹ̀ Bíbélì náà hàn sí ọ.