Ìlàkàkà Mímọ́: Dìrọ̀mọ́ Ìgbé-Ayé Iṣẹ́-àṣekára, àti ti Ìsinmi Àpẹrẹ

Ní àárọ̀ ọjọ́ Àìkú kan a jókòó sórí ìjókòó tó ṣeé ká nínú yàrá-ìdárayá ilé-ìjọsìn wa, lẹ́yìn tí a ti pinu láti ṣe ìsìn ọjọ́ náà lọ́nà ìgbàlódé dípò irú èyí ta máa ńṣe nínú gbọ̀ngàn-ìjọsìn. Pẹ̀lú ìsìn òwúrọ̀ márùn-ún ọ̀tọ̀ọ̀tọ̀ láti yàn nínú rẹ̀, ìjọ wa ti rí ọ̀nà láti jẹ́ ìríjú tí ó dára fún àmúlò ààyè, àwọn àlùmọ́ọ́nì, àti ìpéjọpọ̀ ènìyàn nípasẹ̀ ṣíṣe àgbékalẹ̀ àwọn ọ̀nà tí oníkálukú lè yàn tí yóò mú ogunlọ́gọ̀ wá pẹ̀lú ìdúróṣinṣin nínú ẹ̀kọ́ Bíbélì tó múná-dóko nínú gbogbo ẹ̀ka-ìránṣẹ́ wọn. O lè wà nínú yàrá-ìdárayá pẹ̀lú oníwàásù tó wọ sọmọdọ̀bọ, ṣùgbọ́n ìwàásù tí o máa gbọ́ yóò yanrantí bíi ti olùṣọ́-àgùntàn tó wọ kóòtù.

Ní Àìkú tó kọjá èmi àti ọkọọ̀ mi ń gbọ́ ìwàásù kan tó lágbára nípa ìtọrẹ-àánú. Lẹ́yìn ìjọsìn ọjọ́ náà ni oníwàásù bèrè ohun tí a ó ṣe pẹ̀lú $100 tí a kù gìrì ní—tí a sì lè ná bó ti wù wá. Kíni ẹbíi wa nílò jù ní àkókò náà? Báwo ni $100 yóò ti yí ìgbàa wa padà? Àwọn ènìyàn nínú ìjọsìn ọjọ́ náà sọ ǹkan mélòó kan—àwọn yóò ṣe ìtọ́jú ilé, ra aṣọ titun fún ilé-ìwé, ra oúnjẹ láti pín pẹ̀lú ẹbí lápapọ̀ àti bẹ́ẹ̀bẹ́ẹ̀ lọ. Ṣùgbọ́n ní kọ̀ọ̀rọ̀ gbọ̀ngàn lọ́jọ́ náà láti rí obìnrin kan tó bú sẹ́kún bó ti ń gbìyànjú láti sọ̀rọ̀. Ó ní òhun yóò fi owó yìí kò àwọn ọmọ òhun lọ sí ilé ìgbafẹ́ tó ní odò-àtọwọ́dá fún àṣálẹ́ kan láti rẹ́ẹ̀rín, ṣeré àti ní ìtura, bó tilẹ̀ jẹ́ fún wákàtí díẹ̀, kúrò níbi ìjìyà àti ẹ̀rùu alaalẹ́ tí wọ́n ń kojú nílé. Ọ̀rọ̀ náà wá láti oókan àyà rẹ̀, ó sì jẹ́ ohun tó bani lọ́kàn jẹ́.

Olùṣọ̀ágùntàn ọjọ́ náà pe obìnrin yìí wá síwájú, ó fa $100 jáde látinú àpòo rẹ̀, ó sì fi fún-un. Láì retí ohun kan. “Ohun ojú mi tirí. Ohun ojú mi tirí,” èyí l'obìnrin yìí ń sọ pẹ̀lú omijé lójú. Àwọn ọmọ-ìjọ tó wà nítòsí dìde láti rọ̀gbà yíiká, láti pagbo àdúrà àti ìkíni-lẹ́yìn yí ọmọbìnrin náà ká bo ti ń sọkún. Wọn kò ṣètò fún irú nkan báyìí nínú ìjọsìn ọjọ́ náà, ṣùgbọ́n ó jẹ́ ìpènijà tó lágbára.

Ǹjẹ́ ìwọ lè ṣe irúu ìrànlọ́wọ́ yìí? Ǹjẹ́ o lèlo $100 láti ru ẹlòmíràn sókè nínú ìbọláfún àti ìfẹ́ nípasẹ̀ bíbùkún fún wọn nígbà tí Ọlọ́run bá taọ́ lólobó láti “Fifún ni”? Bóyá o tilẹ̀ ní owó náà lọ́wọ́, tàbí o nílò láti ṣe àkójọ rẹ̀ fún oṣù mẹ́fà, ǹjẹ́ èmi àtìrẹ lè ṣe ìpinnu lónìí láti ṣiṣẹ́ lórí ìpènijà náà? Bí a ti ń ṣiṣẹ́ t'Ọ́lọ́run gbé ka iwájú wa, ẹ jẹ́ kí a ṣòótọ́ nínú iṣẹ́ ìríjú wa pẹ̀lú àwọn àlùmọ́ọ́nì tó ti ṣètò àti láti fihàn fún àwọn mìíràn wípé ìlàkàkà mímọ́ yàtọ̀ nítorí ó nííṣe pẹ̀lú ìtọ́jú àwọn ènìyàn ju iṣẹ́ ìsìn lásán.

Ìkáàánú ṣe pàtàkì.