Banal na mga Damdamin - Maka-Bibliang Tugon sa Bawat PaghamonHalimbawa

Kung may isang lugar kung saan gustong manahan ng Diyos, ito ay sa iyong mga pagpupuri. Umuupo ang Diyos, itinataas ang Kanyang magagandang paa at nagre-relax kapag may isang mananampalataya na pinipiling sumamba. Pero, kapag ikaw ay nagrereklamo, nagmamaktol at nagmamagaling at sumisigaw ng paninisi sa langit, hindi komportable ang Diyos na manahan sa iyo. Ang ating mga puso ang tahanan ng Diyos at dapat na maging maingat tayo habang inaalam natin kung anong klase ng kapaligiran ang nilikha natin para panahanan ng Panginoon. Natutunan ko sa marami nang pangyayari sa aking buhay, na ang Panginoon ay higit na interesado sa aking puso kaysa baguhin ang aking kinalalagyan. Dahil ang sigaw ng aking puso sa bawat araw ay maging katulad Niya, dapat na mas pahalagahan ko at mas bigyan ng higit na atensyon sa pananalangin kung ano ang namumuo sa aking puso higit sa kung ano ang nangyayari sa aking kalagayan. Hinihiling natin sa Diyos na baguhin ang ating kalagayan samantalang ang nais Niya ay baguhin tayo ng ating kalagayan.

Bilang mananampalataya, maaari kang pumili kung palalakihin mo ang sakit na nararamdaman at ang mga di kasiya-siyang pangyayari sa buhay o palakihin ang iyong Diyos sa kabila ng nararamdaman mong sakit. Ang ilan sa atin ay nagkukwento ng tungkol sa ating kalungkutan at kabiguan ng higit kaysa tungkol sa Panginoon na ating pinaglilingkuran. Kaya kong sabihin, base sa sinasabi ng isang babae, kung ano ang pinili niyang palakihin, alam man niya ito o hindi. Habang pinagbubulayan ko ang tungkol sa mga dakilang lalake at babae ng Diyos sa Biblia na piniling magsilbi sa kanya at nagamit ng lubos sa kanilang panahon, walang sino man ang hindi dumanas ng pagkabigo. Si Ester ay isang ulila na pinalaki ng isang tiyuhin na walang asawa subalit ginamit siya ng Diyos upang iligtas ang buong bansa ng mga Hudyo. Si Jose ay inalipusta ng kanyang mga kapatid na lalaki at ipinagbili bilang alipin subalit naging pangalawa sa pinakamataas na tao sa Ehipto upang iligtas ang kanyang mga kababayan mula sa matinding kagutuman. Si Daniel ay inagaw mula sa kanyang kinalakihang tahanan at sapilitang ipinasok sa kweba ng mga gutom, mababangis na mga leon, subalit ginamit siya ng Diyos bilang pwersa ng kabanalan sa Babilonya. Hindi pa tapos ang Diyos sa iyo at gumagawa Siya para sa kanyang mga anak hanggang Siya ay magtagumpay. Ang iyong pagkabigo ay walang kapangyarihan para biguin ka kundi maaring ilagay ka sa isang lugar kung saan magagamit ka ng Diyos.