Soma Biblia Kila Siku Disemba/2022Mfano

“Ubatizo” (m.50), maana yake hapa ni kile kipindi kigumu cha mateso na kufa kilicho mbele ya Yesu kama alivyowauliza wanafunzi, Mwaweza kunywea kikombe ninyweacho mimi, au kubatizwa ubatizo nibatizwao mimi? (Mk 10:38). Katika m.56-57 Yesu anauliza, Imekuwaje, basi, kuwa hamjui kutambua majira haya? Na mbona ninyi wenyewe kwa nafsi zenu hamwamui yaliyo haki? Wanayotakiwa kutambua na uamuzi wa haki wanaotakiwa kufanya ni kwamba sasa kweli kwa njia ya Yesu Ufalme wa Mungu umekaribia kwao. Ndiye Kristo, Mwana wa Mungu. Ni wito mkubwa wa Mungu kwa Waisraeli! Watubu na kumwamini! Na ni hatari kubwa mno kutojali. Ndivyo Yesu anavyosisitiza, akitoa mfano huu, Unapofuatana na mshitaki wako kwenda kwa mwamuzi, hapo njiani fanya bidii kupatanishwa naye, asije akakuburuta mpaka mbele ya kadhi; yule kadhi akakutia mikononi mwake mwenye kulipiza, na yule mwenye kulipiza akakutupa gerezani; Nakuambia, Hutoki humo kamwe hata uishe kulipa senti ya mwisho (m.58-59)!