Soma Biblia Kila Siku Disemba/2022Mfano

Wakaanza wote kutoa udhuru kwa nia moja (m.17-18). Mfano huu unawahusu Wayahudi jinsi walivyoupokea wito wa Mungu uliotolewa kwa njia ya Yesu. Na mfano huu pia unatuhusu sisi! Ni jinsi gani sisi tunavyoupokea wito wa Mungu wa kuingia katika ufalme wake? Kengele ya kanisa inapolia Jumapili ili kutuita twende kusali, je, tunaitikia vipi? Angalia udhuru unaotolewa kwa nia moja katika m.18-20: Wa kwanza alimwambia, Nimenunua shamba, sharti niende nikalitazame; tafadhali unisamehe. Mwingine akasema, Nimenunua ng'ombe jozi tano, ninakwenda kuwajaribu; tafadhali unisamehe. Mwingine akasema, Nimeoa mke, na kwa sababu hiyo siwezi kuja! Je, wewe unatoa udhuru unaofanana na hizi? Kwa kweli ni jambo la ajabu kutojali mwaliko wa Mungu. Ni hatari!