Soma Biblia Kila Siku Oktoba 2021Mfano

Daudi akawaambia watumishi wake wote waliokuwa pamoja naye Yerusalemu, Ondokeni, tukakimbie (m.14). Daudi alikuwa ni hodari sana wa vita. Sasa uhodari wake uko wapi? Mbona anakimbia? Nafikiri kuna sababu nne. 1. Hakutaka kupigana vita na mwana wake mwenyewe (m.14, Fanyeni haraka, tuondoke, Absalomu asitupate kwa upesi, na kutuletea maovu). 2. Walioshikamana na Absalomu ni wengi kuliko wa kwake (m.13, Mioyo ya watu wa Israeli inashikamana na Absalomu). 3. Hakutaka Yerusalemu uharibiwe. Mji huu ndio uliowafanya Waisraeli wawe kitu kimoja (m.14, Absalomu asiupige mji huu kwa makali ya upanga. Pia katika m.25 Daudi anafikiria mji akimwambia Sadoki, Rudisha sanduku la Mungu mjini). 4. Hakuwa na uhakika kama Bwana yu upande wake. Bila shaka anakumbuka neno la Mungu kwake katika 12:10, Upanga hautaondoka nyumbani mwako, kwa sababu umenidharau, ukamtwaa mkewe Uria, Mhiti, kuwa mke wako. 15:25-26 inaonyesha kwamba ingawa Daudi hana uhakika, anaendelea tu kujiweka mikononi mwa Bwana, Nikipata kibali machoni pa Bwana atanirudisha, na kunionyesha tena sanduku hili, na maskani yake.