Soma Biblia Kila Siku Oktoba 2021Mfano

Wakamtandikia Absalomu hema juu ya nyumba darini; naye Absalomu akaingia kwa masuria ya babaye machoni pa Israeli wote (m.22). Dari ni aina ya paa. Dari la nyumba za Waisraeli kwa wakati huo lilikuwa tambarare na kuzungukwa na ua ili mtu asianguke. Hapo watu walikuwa wanakaa wakipumzika. "Suria" maana yake ni mjakazi aliyefanywa kuwa mke wa bwana wake. Kisiasa hatua hii ya Absalomu ilifaa, lakini mbele ya Mungu ni chukizo, na hukumu yake ni wazi: Mtu mume atakayelala pamoja na mke wa baba yake amefunua utupu wa baba yake; wote wawili hakika watauawa; damu yao itakuwa juu yao (Law 20:11)! Hivyo unabii juu ya Daudi katika 12:11-12 ulitimia! Bwana asema hivi, Angalia, nitakuondokeshea uovu katika nyumba yako, nami nitawatwaa wake zako mbele ya macho yako, na kumpa jirani yako, naye atalala na wake zako mbele ya jua hili. Maana wewe ulifanya jambo lile kwa siri; bali mimi nitalifanya jambo hili mbele ya Israeli wote na mbele ya jua.