Soma Biblia Kila Siku Oktoba 2021Mfano

Hushai akawaambia ... pelekeni habari upesi, kamwambieni Daudi ya kwamba, Usilale usiku huu karibu na vivuko vya jangwani; bali usikose kuvuka; asije akamezwa mfalme (m.15-16). Mpango wa Daudi kuwa Hushai atasaidia kuyavunja mashauri ya Ahithofeli ulifanikiwa (habari ya mpango inapatikana katika 15:34-37). Kutokana na uchovu, Daudi alikuwa hajavuka mto. Lakini sasa alipata muda wa kukimbia na kujiandaa! Maana alipata onyo la Hushai, na Absalomu alifuata shauri la Hushai! Linganisha m.27-29 na Zaburi 23: Ikawa, Daudi alipofika Mahanaimu, Shobi, mwana wa Nahashi wa Raba, wa wana wa Amoni, na Makiri, mwana wa Amieli wa Lo-debari, na Barzilai, Mgileadi wa Rogelimu, wakaleta magodoro, na mabakuli, na vyungu, na ngano, na shayiri, na unga, na bisi, na kunde, na dengu, na asali, na siagi, na kondoo, na samli ya ng'ombe, wapate kula Daudi na watu waliokuwa pamoja naye; kwani walisema, Watu hao waona njaa, tena wamechoka, nao wana kiu huku nyikani. Katika Zab 23:5 Daudi anashuhudia, Waandaa meza mbele yangu, machoni pa watesi wangu.