Soma Biblia Kila Siku Oktoba 2021Mfano

Daudi alisahau wajibu wake kama mfalme kutokana na msiba wake. Huzuni yake ilikuwa kubwa akashindwa kujizuia: Mfalme akalia kwa sauti kuu, Mwanangu Absalomu (m.4). Kuna jambo moja lililozidisha sana huzuni yake. Alijua kwamba ni yeye mwenyewe aliyesababisha kifo chake kwa kule kuanguka kwake mwenyewe katika dhambi huko nyuma (unaweza kulinganisha na neno la Mungu kwake katika 12:9-12)! Fundisho: Kuwapenda watoto wetu kusitufanye kuwa na upendeleo katika wajibu wetu wa kikazi. Tusikanyage haki. Hapo Yoabu alimwokoa Daudi siku ile, alipomwambia, Basi sasa, ondoka, utoke nje, ukaseme na watumishi wako maneno ya kuwatuliza roho zao; maana mimi nakuapia kwa Bwana, usipotoka, hatabaki hata mtu mmoja pamoja nawe usiku huu; na mambo haya yatakuwa mabaya kwako kuliko mabaya yote yaliyokupata tokea ujana wako hata sasa. Ndipo mfalme akaondoka, akaketi langoni. Nao wote wakaambiwa ya kwamba, Angalieni, mfalme ameketi langoni; watu wote wakaenda huko mbele ya mfalme. Basi, Israeli wote walikuwa wamekimbia kila mtu hemani kwake (m.7-8).