പ്രതിദിന ധ്യാന ചിന്തകൾ (ജെ.പി വെണ്ണിക്കുളം) - ഭാഗം 1ഉദാഹരണം

"ഞങ്ങൾ കുഴലൂതി നിങ്ങൾ നൃത്തം ചെയ്തില്ല"

ജോലിയൊന്നും ഇല്ലാത്ത കുറെ ചെറുപ്പക്കാർ ചന്തസ്ഥലങ്ങളിൽ ഇരുന്നു  പലതും അഭിനയിക്കുന്നത് യേശു കണ്ടിട്ടുണ്ട്. ഒരുകൂട്ടർ കുഴലൂത്തു നടത്തുമ്പോൾ മറ്റേ കൂട്ടർ നൃത്തം ചെയ്യണം. എന്നാൽ കുഴലൂത്തു ശരിയായില്ല എന്നുപറഞ്ഞു മറ്റെകൂട്ടർ നൃത്തം ചെയ്തില്ല. അതുപോലെ ഒരുകൂട്ടർ വിലാപഗാനം പാടിയപ്പോൾ മറ്റെകൂട്ടർ അതു ശരിയായില്ല എന്നു പറഞ്ഞു മാറത്തടിച്ചു കരഞ്ഞില്ല. അങ്ങനെ അവർ അന്യോന്യം അസംതൃപ്തി പ്രകടിപ്പിച്ചു. യോഹന്നാൻ സ്നാപകനോടും യേശുവിനോടും വരെ അന്നത്തെ സമൂഹം അതൃപ്തി പ്രകടിപ്പിച്ചിട്ടുണ്ട്. യോഹന്നാൻ സ്നാപകൻ പലതും തിന്നാതെയും കുടിക്കാതെയുമിരുന്നപ്പോൾ യേശു തിന്നുകയും കുടിക്കുകയും ചെയ്തു പാപികളുടെയും ചുങ്കക്കാരുടെയും സ്നേഹിതനായി. ഇന്നും ഇതു തന്നെയാണ് സംഭവിക്കുന്നത്. എല്ലാം എല്ലാവർക്കും ഇഷ്ടപ്പെടണമെന്നില്ല. ചിലതിനോട് ചിലർക്ക് പ്രിയമുള്ളപ്പോൾ മറ്റുചിലതിനോട് അതൃപ്തി തോന്നുക സ്വാഭാവികം. എല്ലാവർക്കും എല്ലാവരെയും തൃപ്തിപ്പെടുത്താൻ കഴിയുകയുമില്ല. കുറ്റപ്പെടുത്തലുകൾ ഒഴിവാക്കി അന്യോന്യം മനസിലാക്കാൻ ശ്രമിക്കുക. അപ്പോൾ ഓരോരുത്തരെയും ശരിയായി മനസിലാക്കാനാകും.