Jizọs Hụrụ M N'anyaIhe Atụ

Gịnị Bụ Ihe Ndị Dị Mkpa?

Ihe ndị dị mkpa bụ ozizi ndị ahụ bụ́ isi nke Kraịst. Wepụ otu n’ime ha, ụlọ nke Iso Ụzọ Kraịst adaa. Ihe ndị dị mkpa dị mkpa, n'ihi na ọ bụrụ na gị efunahụ otu n'ime ihe ha, ị ga-efunahụ ike nke Kraịst ga-agbanwe gị. Ọ bụrụ na ụlọ ụka efunahụ otu n’ime ihe ndị a dị mkpa, ọ ga-efunahụ ike nzọpụta nke Chineke ga-agbanwe ndị mmadụ na ndị ọgbakọ ya.

Okwu Chineke na-akọwa ihe ndị a dị mkpa—Akwụkwọ Nsọ bụ ọkpụkpụ azụ maka nkwenkwe ndị a. Mkpali anyị bụ ịmara nkwenkwe gasị bụ isi nke Iso Ụzọ Kraịst n'ihi na agha a na-alụ megide mkpụrụ obi anyị abụghị ihe egwuregwu. Agha a ana-alụ n'etiti nma na njọ bụ na mpaghara echiche ka ana-alụ ya—ịghọta ihe ndị i kwenyere na ha n'ụzọ doro anya na-akwadebe gị ịmata echiche ndị dị mma na nke ndị dị mgbagọ ma ọ bụ ndị na-eduhie eduhie. N’ihi na anyị na-enweta ike na ndụ nke Kraịst site n’okwukwe anyị, ihe ndị anyị kwenyere na ha ga-abụrịrị eziokwu.

Ahịrị mbido nke abụ a hụrụ n’anya, “Jizọs Hụrụ Mụ N’anya,” gosipụtara ihe ndị dị mkpa nke Iso Ụzọ Kraịst:

Jizọs / Hụrụ / Mụ N'anya / Nke a ka m maara / N'ihi na Akwụkwọ Nsọ na-agwa m otu ahụ.

Iso Ụzọ Kraịst dị mfe na isi ya ma ọ bụrụ na anyị maara ihe okwu ndị ahụ pụtara. Chee echiche banyere ya otu a:

JIZỌS—Ihe m kwenyere na ya banyere Jizọs

Jizọs bụ Chineke zuru oke nakwa mmadụ zuru oke, Ọ bụ Mezaịya.

HỤRỤ—Ihe m kwenyere na ya gbasara ịhụnanya Chineke, nke e gosipụtara n’elu obe.

Jizọs bịara n’ụwa anyị maka ọrụ nnapụta. Ọ nwụrụ n’obe n’ihi mmehie anyị wee si na ndị nwụrụ anwụ bilie.

MỤ N'ANYA—Ihe m kwenyere na ya gbasara onwe m

Mmadụ ọ bụla dị ebube—ma dịkwa mmebi. Ekère anyị n’onyinyo Chineke, mana mmehie emerụwo anyị. Ebe ihe ọjọọ merụworo anyị, Jizọs dị ike iweghachi anyị ka anyị bụrụ “ndị e kere ọhụrụ.”

NKE A KA M MAARA—Ihe m kwenyere na ya wee jide n'aka banyere nzọpụta m

Anyị enweghị ike ịkpata nzọpụta n'ike nke anyị, mana anyị ga-ejiriri uche anyị kweta mkpa ọ dị anyị (nchegharị), nabata Jizọs dịka Chineke, ma kwenye n'ọrụ Ya Ọ rụrụ n'elu obe.

N'IHI NA AKWỤKWỌ NSỌ NA-AGWA M OTÚ AHỤ—Ihe m kwenyere na ya banyere ụkpụrụ nke Chineke maka ndụ m

Anyị na-ahọrọ Akwụkwọ Nsọ dị ka ụkpụrụ na-adịghị agbanwe agbanwe maka ihe niile anyị na-eme ma kwere n'ihi na Jizọs bụ ihe atụ anyị. Anyị ga-agụriri ma rubere Okwu Chineke isi ka anyị wee ghọta ndị anyị bụ na Kraịst.

Site n'ịgụ na ilele nkebi ahịrịokwu ise nke abụ a, anyị ga-enweta ngwáọrụ nchekwa dị ike iji buru ihe ndị dị mkpa gasị Ndị Kraịst n'isi n'ebe ọ bụla anyị na-aga.

Ekpere: Meghee anya m na obi m na njem a. Nyere m aka ịghọta eziokwu ndị a sitere na Okwu Gị. A chọrọ m ka a gbanwee otu m si eche echiche. Nyere m aka ikwere ihe Ị chọrọ ka m kwere. Amen.