Ён ёсьць усім для ўсіх

Аўтар: Дэні Савэдра

“Бо дзіця нарадзілася нам; Сын дадзены нам; уладарства на плячах у Яго, і дадуць імя Яму: Дзівосны, Дарадца, Бог Моцны, Бацька Вечнасьці, Князь супакою.” Ісаі 9:6

Смартфон, бясспрэчна, зьяўляецца карыснай прыладай для кожнага. Ня думаю, што існуе хоць адзін жывы чалавек, які не атрымліваў бы хоць якой карысьці ад смартфону. Гэтаксама агонь зьяўляецца карысным для ўсяго чалавецтва — ацяпленьне, гатаваньне ежы, паліва ды шмат чаго іншага.

У гэтым сьвеце ёсьць розныя вырабы ды рэсурсы, якія былі створаныя для ўсіх, каб зрабіць жыцьцё кожнага чалавека лепшым. Гэтаксама гісторыя Раства ёсьць для ўсіх! Незалежна ад таго, кім вы ёсьць, што вы зрабілі, якой мовай размаўляеце, зь якой вы краіны і культуры, у каляднай гісторыі ёсьць сіла перамяніць каго заўгодна, зрабіць жыцьці бязьмежна цудоўнымі, значнымі, задавальняючымі й поўнымі радасьці. Чаму? Бо тая гісторыя распавядае пра тое, як Ісус, Сын Бога, Які ёсьць усім і празь Якога ўсё трымаецца разам ды існуе (Яна 1:3, Калясянаў 1:17), прыйшоў збавіць усіх (Яна 3,16, 36, 6:40, 11:25).

Больш за 700 гадоў да Ягонага нараджэньня прарок Ісая прадказаў ягонае зьяўленьне Ізраільскаму народу — зьяўленьне Мэсіі, абяцанага Семя, які меўся пабіць гада ў галаву, і празь якога Бог меўся дабраславіць усе плямёны сьвету. Ісая даў прыгожае кароткае паведамленьне, прароцкі відзень, у якім ён паказаў, што чалавечая надзея ды будучыня не залежаць ад самога чалавека, але ад Сына, Які меўся прыйсьці й аддаць Сябе на адкупленьне многіх (Ісаі 53). Гэтае Дзіцё — усё, што нам патрэбна, усё, чаго мы прагнем, і ўсё, на што мы спадзяемся.

Як гэта? Ісая тлумачыць:

Дзівосны Дарадца

Уся мудрасьць паходзіць ад Яго. Выслоўі 2:6-7 кажа: “Бо ГОСПАД дае мудрасьць, і з вуснаў Ягоных — веданьне і разуменьне. Ён захоўвае цьвярозы розум правым, Ён — шчыт для тых, якія ходзяць беззаганна.” Ён ёсьць нам крыніцай усяе мудрасьці ды разуменьня. Ён вядзе нас добрымі шляхамі й вучыць нас весьці жыцьці, поўныя значэньня ды паўнаты. Ён ведае нас лепш як мы ведаем саміх сябе, і Ён разумее нас! Ён пражыў поўнасьцю чалавечае жыцьцё, і таму Ён здолее ставіць Сябе на нашае месца. Габрэяў 4:15 нагадвае нам: “Бо мы маем не такога Першасьвятара, Які ня мог бы спагадаць нам у немачах нашых, а Такога, Які, як і мы, дасьведчаны ва ўсім, акрамя грэху.”

Моцны Бог

“Яму слава і ўлада навекі вечныя” (1 Пятра 5:11). Сіла, моц, адвага, трываласьць…паходзяць ад Яго. І Божае Слова безупынна нагадвае нам, што Ягоная сіла даступная ўсім, хто Яго шукае! Псальм 45:2 кажа: “Бог - мой прытулак і сіла, у цяжкасьцях Ён паказаў сябе магутным памочнікам”, а Піліпянаў 4:13 нагадвае нам: “Усё магу ў Ісусе Хрысьце, Які мацуе мяне.” У 2 Карынцянаў 12:9 Ён запэўнівае нас: “Досыць табе мілаты Маёй, бо сіла Мая зьдзяйсьняецца ў немачы.”

Бацька Вечнасьці

Наш Збаўца й Бог Айцец — адно. Ён ёсьць шляхам да Айца. У Яна 14:9 Ён абвясьціў: “Хто бачыў Мяне, бачыў Айца.” Габрэяў 1:3 гэтак красамоўна апісвае Яго: “Ён ёсьць водбліскам славы Ягонай і вобразам істоты Ягонай, і Ён трымае ўсё словам сілы Сваёй.” Ён ідзе наперадзе вас, сябры, і Ён заўсёды будзе з вамі. Ён зьяўляецца Бацькам усіх вернікаў (Яна 8:58), пачынальнікам веры ды Тым, Хто яе ўдасканальвае.

Князь супакою

Ісус прыйшоў дзеля таго, каб мы змаглі прымірыцца з Богам. Ён стаў мостам паміж намі ды Богам Бацькам, і Ён заплаціў за нашыя грахі. І перад тым, як вярнуцца на неба, Ён сказаў: “Супакой пакідаю вам, супакой Мой даю вам” (Яна 14:27). Ягоны супакой, які вышэйшы за ўсякі розум, мае сілу ахоўваць нас, даваць нам надзею, пэўнасьць і адпачынак. Ён запрашае нас наблізіцца да Яго, каб атрымаць супакой ды ўскласьці “усе клопаты на Яго, бо Ён дбае пра вас” (1 Пятра 5:7).

Сябры, няма аніводнай рэчы, якой вам хочацца або ў якой вы маеце патрэбу, якую ня здолеў бы даць Хрыстос. Няма аніводнай добрай і прыгожай рэчы ўва ўсёй вечнасьці, якую адносіны з Ісусам не забясьпечвалі б кожнаму. Ягоная сіла, мудрасьць, супакой, любоў, ласка, спагада, дабрыня, мілата й моц — для ўсіх нас. Яны даступныя кожнаму, хто прымае Яго. Кожнае абяцаньне, кожнае дабраславеньне, кожны добры й дасканалы дар…усё тое для вас!