Дзівосны сьпеў

Аўтар: Дэні Савэдра

«Узьвялічае душа мая Спадара, і ўзрадаваўся дух мой у Богу, Збаўцы маім, бо Ён глянуў на паніжэньне служкі Сваёй. Бо вось, адгэтуль шчасьліваю будуць называць мяне ўсе пакаленьні, бо вялікае ўчыніў мне Магутны; і сьвятое імя Яго, і міласэрнасьць Ягоная з пакаленьня ў пакаленьне для тых, якія баяцца Яго. Зьявіў сілу рукі Сваёй; расьсеяў тых, што заносяцца думкамі сэрца свайго; скінуў моцных з пасадаў і ўзьвялічыў пакорных, галодных насыціў дабром, а багатых адпусьціў ні з чым. Падтрымаў Ізраіля, юнака Свайго, успомніў пра міласэрнасьць, як гаварыў адносна бацькоў нашых, адносна Абрагама і насеньня ягонага на вякі!» – Лукаша 1:46-55

Што было найлепшай рэччу, якая здарылася з вамі ў вашым жыцьці? Што было гэным асаблівым здарэньнем або момантам, ад якога вам стала так радасна, што вы папросту не маглі валодаць сабой? Для мяне гэта быў той момант, калі я даведаўся, што мая жонка зацяжарала нашым першым дзіцём. Яна паведаміла мне пра тое ў мой дзень народзінаў, за некалькі гадзінаў да вячэры з нашымі блізкімі сябрамі.

Каля аднаго году перад гэтым, мы зацяжаралі былі, але страцілі таго дзіцёнка. Праз тое, што здарылася ў мінулы раз, мы спачатку баяліся паведамляць людзям, але гэты раз адчуваўся інакш. Я сапраўды адчуваў, што Госпад пацьвярджаў, што гэтым разам усё мелася адбыцца як сьлед. Таму мы не дазволілі страху пазбавіць нас радасьці й хваляваньня, і вырашылі паведаміць нашым сябрам пра гэтую навіну ўвечары.

Усё маё жыцьцё я хацеў быць бацькам, дык калі тое нарэшце ажыцьцявілася, то маёй радасьці не было канца, і мы нават назвалі нашага сына Джуд, што азначае «хвала»! І я ўсхваляю Бога ад усяго сэрца за майго цудоўнага, добрага, энэргічнага, творчага, дзівоснага дзіцяці, якім ёсьць мой Джуд.

Сёньня мы будзем разважаць над адным з найпрыгажэйшых урыўкаў Бібліі, адным з найпрыгажэйшых зборам слоў калі-небудзь напісаных… Ён называецца «Велічае душа мая Пана» (Магніфікат); гэта Марыін хвалебны сьпеў Госпаду.

Уявіце, што цяпер вы – Марыя. Некалькі дзён таму Божы анёл прыйшоў да вас і паведаміў вам, што вы зацяжарыце празь Сьвятога Духа й народзіце доўгачаканага Мэсію, Якога Госпад абяцаў Абрагаму…

Таго, Хто паб’е гада ў галаву раз ды назаўжды…

Семя, празь Якога ўсе народы будуць дабраславёнымі…

Кароль, Які будзе ўладарыць на Давідавым пасадзе заўсёды…

Збаўца, Які выратуе ўсё чалавецтва…

Ейны адказ на гэткую ашаламляльную навіну? «Вось я – служка Госпада; няхай станецца мне паводле слова твайго» (Лукаша 1:38). Авохці мне! Дык тады яна пакуецца ды йдзе адведаць сваю стрыечную сястру, якая таксама была цяжарная. І як толькі яна зь ёй павіталася, Альжбэта Сьвятым Духам заяўляе, што Марыя – найшчасьлівейшая з жанчынаў, бо яна была абраная стаць маці Госпада. І вось у гэты самы момант Марыя не магла больш стрымліваць сваю радасьць і хваляваньне! Яна аб’яўляе: «Узьвялічае душа мая Спадара, і ўзрадаваўся дух мой у Богу, Збаўцы маім».

Заўважце падабенства Марыінага сьпеву й сьпеву Ганны, запісанага ў 1 Царстваў 2. Тэалёг Аляксандар МакЛарэн напісаў наконт гэтага наступнае: «Ці мусіць простая вясковая дзеўчына быць паэткай, бо яна ёсьць маці нашага Госпада? Што ёсьць больш верагодным за тое, што яна павінна была выліць свае пачуцьці ў знаёмыя ёй формы, і асабліва Ганнін сьпеў павінен быў афарбаваць ейны? Гэтыя старыя псальмы былі ліцейнай формай, у якую яе палкія пачуцьці ліліся амаль што інстынктыўна, і якраз адсутнасьць «арыгінальнасьці» у ейным сьпеве спрыяе ягонай шчырасьці». Ці можа вы самі перажывалі нешта калі-небудзь, і адразу ж вам прыгадаўся сьпеў, псальма або ўрывак зь Бібліі, што дапамог вам выказаць тое, што вы адчувалі? Магчыма, што такое якраз і здарылася з Марыяй! Ёй прыгадаўся Ганнін сьпеў і дапамог ёй выказаць ейную нязьмерную радасьць, удзячнасьць ды шчасьце, што яна тады адчувала.

Сябры, да Раства застаецца менш за тыдзень, дык я хачу нешта нагадаць вам: Марыін Магніфікат можа быць і нашым! Ён можа быць словамі, што мы пяём Госпаду. Гэтак як Марыя заявіла: «Вялікае ўчыніў мне Магутны; і сьвятое імя Яго», мы таксама павінны крычаць гэтую хвалу зь невымернай радасьцю. Праз Ісуса, усе мы можам гучна пяяць пра ўсё тое дзівоснае, што Госпад зрабіў дзеля нас! Штодня нашыя жыцьці могуць быць хадзячым, гаворачым, жывым, дыхаючым Магніфікатам нашаму Богу.

Адвядзеце трохі часу сёньня на тое, каб выказаць ваш Магніфікат Ісусу! Прагаварэце, прасьвявайце або занатуйце яго. Можаце выкарыстаць глыбока важны царкоўны сьпеў, верш зь Бібліі альбо псальму й надаць ім асабісты сэнс. Выкажэце сваю радасьць ды ўдзячнасьць нашаму цудоўнаму Богу й Бацьку сёньня!