Найлепшы падарунак

Аўтар: Дэні Савэдра

“Бо так палюбіў Бог сьвет, што Сына Свайго Адзінароднага аддаў, каб кожны, хто верыць у Яго, не загінуў, але меў жыцьцё вечнае.” — Яна 3:16

Сёньня — куцьця, і таму, на маю думку, мы ўсе можам быць поўнасьцю шчырымі з сабой і прызнацца, што нам ВЕЛЬМІ падабаецца атрымліваць падарункі! Хто ня любіць атрымліваць падарункі? Гэта цудоўна. Сур’ёзна, чаго можна не любіць у атрыманьні файных рэчаў ад людзей, якія дбаюць пра нас? Асабіста мне вельмі падабаецца, калі мне робяць падарункі. Тое забясьпечвае маю фундамэнтальную патрэбу ва ўхваленьні ды прызнаньні. Чаму? Бо калі я атрымліваю падарункі ад людзей, то я адчуваю, што яны сапраўды любяць, цэняць і прымаюць мяне такім, які я ёсьць.

Перад тым, як пачаць сёньняшні ўрок, я хачу спытаць вас…што было найлепшым падарункам, які вы калі-небудзь атрымалі? Свой найлепшы падарунак я атрымаў, калі быў маленькім. Гэта была кансоль Nintendo 64 разам з Super Mario 64. Ох і нагуляўся я ў тую відэа гульню.

І да сёньняшняга дня я люблю атрымліваць падарункі. Але калі шчыра, то, будучы дарослым — і асабліва бацькам, — я заўважаю нешта вельмі цікавае: я атрымліваю больш асалоды, калі я раблю падарункі. Ніводны падарунак, які я атрымаў у даросласьці, ня даў мне таго пачуцьця, як у маленстве. А вось калі я раблю падарунак майму сыну або дачцэ, і гэта тое, чаго яны вельмі хацелі, то тая радасьць ды шчасьце на іх тварах, іхныя шалёныя, радасныя абдымкі й “Дзякуй! Дзякуй! Дзякуй, тату!” вяртаюць мне пачуцьцё гэнага цудоўнага шчасьця ўзроўню N64.

Думаючы пра тое, навошта мы сёньня сьвяткуем Раство, я прыгадаў Мацьвея 7:11, дзе напісана: “Дык вось, калі вы, ліхія, умееце дары добрыя даваць вашым дзецям, тым болей Айцец ваш, Які ёсьць у нябёсах, дасьць даброты тым, хто просіць у Яго.” І сапраўды, наш нябесны Тата ўмее рабіць падарункі!

Яна 3:16 кажа нам, што Бог аддаў Свайго адзінароднага Сына, каб кожны, хто верыць у Яго, змог атрымаць у падарунак вечнае жыцьцё. Рымлянаў 8:32 дае нам больш дэталяў наконт гэтага: “Той, Хто не пашкадаваў Сына Свайго, але выдаў Яго за ўсіх нас, як жа Ён не даруе і нам разам зь Ім усяго?”, а 2 Карынцянаў 8:9 кажа: “Вы ведаеце ласку Госпада нашага Ісуса Хрыста, Які, будучы багатым, дзеля нас стаўся бедным, каб сваёю беднасьцю нас узбагаціць.”

Дык чаму Ён зрабіў нам гэты падарунак? Чаму Кароль нябёсаў сышоў на зямлю й жыў з намі? 1 Цімафея 1:15 дае нам адказ: “Ісус Хрыстос прыйшоў у сьвет, каб збавіць грэшнікаў.” У Рымлянаў 6:23 шчыра напісана: “…адплата за грэх - сьмерць.” Гэта тое, што мы заслугоўваем. Гэта доўг, якім мы вінаваты Богу праз наш грэх. Грэшныя, мы зьяўляемся адлучанымі ад сьвятога й бязгрэшнага Бога. Але наш Госпад, поўны любові, ласкі й міласэрнасьці, распрацаваў плян, каб выправіць тое. Ён зрабіў нам “Божую ласку” —  “вечнае жыцьцё ў Хрысту Ісусу, Спадару нашым.” І зрабіў Ён тое, паслаўшы “у сьвет Адзінароднага Сына Свайго, каб мы атрымалі жыцьцё празь Яго” 1 Яна 4:9.

Як пасьлядоўнікі Хрыста, мы атрымалі падарунак, які заўжды застанецца найлепшым — падарунак, які ніколі не састарэе, ніколі не сапсуецца, ніколі ня зломіцца, ніколі ня скончыцца і ніколі ня страціць сваёй вартасьці; найлепшы ў сьвеце падарунак…і каб атрымаць яго, мы проста мусім паверыць. Ісус заплаціў максымальную, найвышэйшую цану, каб набыць нам гэты падарунак і даць нам яго задарма! Яна 3:16 зьяўляецца найбольш вядомым біблійным вершам, бо гэта наймацнейшае ды найпрасьцейшае выказваньне Божае любові да нас. І ведаеце што? Ці вы ведаеце, што адчувае Бог, калі нехта прымае Ягоны падарунак? У Лукаша 15:7 Ісус кажа нам, што на нябёсах ёсьць вялікая радасьць, калі адзін грэшнік каецца ды прымае Ісуса!

Таму сёньня, рыхтуючыся да сьвяткаваньня нараджэньня Ісуса, гатуючы куцьцю або зьбіраючыся пайсьці ў царкву, ведайце, што вы не сьвяткуеце адны… Будзьце ўпэўненыя ў тым, што ваш Тата сьвяткуе ў небе той момант, калі мы з вамі сталі Ягонымі дзецьмі, і што нябёсы будуць весяліцца, калі іншыя людзі будуць набліжацца, каб пазнаёміцца зь Ім.