Сьвятая мітусьня: Жыцьцё, поўнае цяжкае працы й добрага адпачынкуУзор

Мне цяжка адпачываць праз маю прыродную схільнасьць мітусіцца й моцна старацца. І я пражыла з маімі заганамі дастаткова доўга, каб зразумець, што глыбока ўнутры я думаю, што калі я не працую, дык я цярплю няўдачу. А калі я цярплю няўдачу, дык я нічога ня вартая. Але я перакананая ў тым, што гэтак жа як мы можам служыць Богу праз нашую працу, мы можам шанаваць Яго праз наш адпачынак.

Мы мусім запавольвацца, праводзіць час у Слове й быць дастаткова ціхімі, каб пачуць Божы голас, і гэтак мы будзем лепей падрыхтаванымі дзеля працы, да якое Ён кліча нас. Калі я спрабую працаваць 24 гадзіны 7 дзён на тыдзень безь перапынку, дык я ня толькі зьнясільваюся й занядбоўваю маю сям’ю ды здароўе, але й раблю пасьпешныя рашэньні паводле ўласнага раскладу ды ўласных мараў, заміж таго, каб прыслухацца да ціхага Божага настаўленьня.

Чарльз Суіндал напісаў: “Бог ніколі ня просіць нас самастойна разабрацца зь ціскам ды патрабаваньнямі жыцьця. І Ён ніколі не патрабуе ад нас здабыць Ягоную ласку праз імпазантны збор добрых справаў. Заміж гэтага, Ён запрашае нас увайсьці ў Ягоны адпачынак.”

Бог адпрацаваў шэсьць дзён і назваў тое добрым; Ён адпачыў у сёмы дзень і назваў тое сьвятым.

Мы маем запрашэньне далучыцца да Яго ў гэным адпачынку, бо там мы можам скінуць наш цяжар, быць зь Ім ды рабіць тое, што Ён наканаваў нам рабіць дзеля таго, каб нашыя душы змаглі адпачыць перад наступнымі днямі.

Раней адпачываць для мяне азначала сядзець на канапе й бяздумна жаваць нешта, гледзячы тэлебачаньне. Мне падавалася, што я заслугоўвала гэны перапынак, што я павінна была адпачываць, робячы “нічога”. Але часта я пачувалася нават больш зьнясіленаю, таўстою ад усяго таго цукру, што я зьела, і мне цалкам бракавала жаданьня нешта рабіць.

Ці я магу разьвеяць для цябе адзін міт? Адпачынак для ўсіх выглядае па-рознаму. У мяне ёсьць сябры, якія набіраюцца сілаў праз доўгі ранішні бег, падчас якога яны могуць быць сам-насам са сваімі думкамі, малітвамі ды асфальтам. У мяне ёсьць іншыя сябры, якія ажыўляюцца, зьбіраючы людзей у сваёй хаце, каб добра паесьці ды прыемна пагутарыць. А ты, магчыма, адпачываеш найлепш, калі чытаеш кнігу, ствараеш мастацтва, граеш музыку або займаесься гародніцтвам.

Бог стварыў нас з гэтакай руплівасьцю, што мы не павінны зьдзіўляцца, што наш адпачынак можа быць гэткім жа ўнікальным, як нашая праца.

* * *

Калі табе спадабаліся гэтыя пасьвячэньні, адаптаваныя з кнігі Крысталі Стайн “Holy Hustle: Embracing a Work-Hard, Rest-Well Life”, і ты хочаш даведацца болей пра тое, як жыць паводле Божае мэты на тваё жыцьцё, наведай https://amzn.to/2I3ow1d.