Сьвятая мітусьня: Жыцьцё, поўнае цяжкае працы й добрага адпачынкуУзор

У нашай хаце не баяцца мітусьні. Гэта зусім нармальна.

Слоўнік дае мітусьні гэткае азначэньне: “хуткі й бесьперапынны рух у розных напрамках.” Ці гэтае азначэньне нагадвае вам трохі Каласянаў 3:23? “І ўсё, што робіце, рабеце ад душы, як Госпаду, а не чалавеку.” Калі я адчуваю сябе вінаватаю за тое, што цяжка працую, ды спрабую трымацца парадаў аб адпачынку ды дагляданьні за душой, якія цяперака зьяўляюцца надта папулярнымі, дык мяне заўсёды перамагае гультайства. Калі ж я наадварот пачынаю працаваць безь перапынку, мітусячыся, як тое робіць сьвет, дык я адчуваю сябе як у баі і вельмі стамляюся.

Як ні круці, у выніку я ўсё адно адчуваю сябе пагана.

Мы служым Богу, Які стварыў зямлю ды ўсё, што на ёй, зь нічога за шэсьць дзён. Бог даў нам узор працы - напружаная, творчая, цяжкая праца, а потым адпачынак. Памаліўшыся аб тым, як гэты ўзор можа працаваць з азначэньнем сучаснае мітусьні, я зразумела наступнае:

1. Мітусьня ня ёсьць нечым благім, калі нашая цяжкая праца прыносіць Богу славу ды карысьць Ягонаму Валадарству.
2. Сьвятое Пісьмо зьмяшчае шмат прыкладаў пра дабраславеньні за цяжкую працу.
3. Мы ня можам жыць сто адсоткаў свайго жыцьця па ўзоры шасьці дзён стварэньня ды ігнараваць сёмы дзень.

Мітусьня ня мусіць азначаць дасягаць посьпеху, адносіцца зь непавагай да сваіх калегаў або прыцягваць увагу выключна да сябе. Сьвятая мітусьня - гэта цяжкая праца паводле загаду ў Каласянаў 3:23, плённае жыцьцё ў тым месцы, куды Бог паставіў нас, ды адкрыцьцё для сябе раўнавагі працы й адпачынку, што аднаўляе.

Адвядзі троху часу сёньня на тое, каб памаліцца аб тваёй цяперашняй раўнавазе працы й адпачынку. Папрасі Бога паказаць табе тое, што ідзе супроць Ягонага пляну на тваё жыцьцё, сфэры твайго жыцьця, у якіх ты працуеш занадта цяжка й адпачываеш замала, або сфэры, дзе ты адпачываеш зашмат і працуеш замала. Занатуй твае мэты, усё што табе хацелася б зрабіць, напрыклад, за наступны год, а потым пакорліва аддай усе гэныя мэты Богу.

Выкрасьлі ўсё тое, што Ён папросіць цябе выкрасьліць, і дадай усё тое, што Ён скажа табе дадаць. Папрасі Бога паказаць табе, як ты можаш праславіць Ягонае вялікае імя праз тваю працу над гэтымі справамі, папрасі Яго дараваць табе за тыя гадзіны, калі табою апанавала сквапнасьць, пагоня за славай або ймкненьне да спадужніцтва зь іншымі.

* * *

Гэтыя пасьвячэньні зьяўляюцца адаптацыяй кнігі “Holy Hustle: Embracing a Work-Hard, Rest-Well Life” Крысталі Стайн. Каб даведацца болей пра тое, як працаваць без пачуцьця сораму й адпачываць без пачуцьця віны, наведай https://amzn.to/2I3ow1d.