Сьвятая мітусьня: Жыцьцё, поўнае цяжкае працы й добрага адпачынкуУзор

Ці ты хоць-калі задумваўся над тым, ці робіш усё правільна? Або над тым, ці ты сапраўды знаходзісься там, дзе Бог хоча, каб ты знаходзіўся? Або над тым, ці можа недзе існуе нешта яшчэ, нешта такое большае, альбо адрознае, альбо лепшае для цябе? Альбо, магчыма, ты дзівісься, ці кошт твайго пакліканьня варты момантаў, якія - як табе падаецца - ты прапускаеш.

Вельмі часта ў жыцьці нам падаецца, што мы знаходзімся ў пакоі, дзе адключылася сьвятло, і мы навобмацак шукаем уключальнік, сьвечку або ліхтарык, каб убачыць куды ісьці. У гэтакія моманты, давярай Богу. Моцна прычапіся да Ягонае працягнутае рукі й вер, што Ён абавязкова накіруе цябе да наступных дзьвярэй, якія Ён падрыхтаваў дзеля цябе. Мы ня мусім баяцца цемры, калі мы ходзім са Сьвятлом Сьвету.

Але гэныя пытаньні, якія ты сам сабе задаеш, зьяўляюцца слушнымі. Ты ня мусіш саромецца тваіх страхаў ды згрызотаў. Калі б мы ўсе селі разам ды пагутарылі б аб нашай працы, захапленьнях ды веры, дык я зьдзівілася б, калі нехта сказаў бы, што іхняе жыцьцё выйшла дакладна так, як яны яго заплянавалі былі. Што б ты сказаў твайму сябру, які меў гэныя пытаньні? Ці ты сказаў бы яму, што ён мае рацыю ды мусіць папросту здацца?

Спадзяюся, што не.

Мы б яго любілі ды маліліся б за яго. Мы б яго падбадзёрылі ды адшукалі б спосабаў сказаць яму, што тое, што ён робіць ёсьць добрым, вартым ды каштоўным, і што калі ён ведае ў сваім духу, што Бог жадае, каб ён быў менавіта тутака ў гэтую пару жыцьця, дык у гэтым няма памылкі.

Я сказала б табе, што я цьвёрда веру, што Бог заўжды кліча пакорлівых і робіць іх сьвятымі, і што паслушэнства (а не памер, слава альбо прызнаньне) - гэта тое, што мае значэньне ва ўплыве, які мы робім праз нашую працу дзеля Валадарства.

Бог зьяўляецца верным ва ўсім, што Ён робіць. Дзе ты знаходзісься, што ты робіш, ды людзі побач з табою, якім Бог папрасіў цябе служыць, — усё гэта не зьяўляецца памылкамі. Цяжкасьці, расчараваньні й няўдачы не зьяўляюцца памылкамі.

Бог выкарыстае кожны кавалачак нашае асабістае гісторыі на тое, каб прадэманстраваць Сваю Славу.